23K food packs, ibinigay sa mga binagyo sa Eastern Visayas — DSWD

ni Lolet Abania | December 21, 2021

Nakapagbigay na ang Department of Social Welfare and Development (DSWD) ng kabuuang 23,778 family food packs sa 15 local government units (LGUs) sa Eastern Visayas na apektado ng Bagyong Odette ngayong Martes.

Ayon sa ahensiya, nakipag-ugnayan sila at katuwang ang Office of Civil Defense, Philippine Air Force, Philippine Army, at Philippine National Police para sa transportasyon ng family food packs (FFPs) patungo sa Southern Leyte:

Silago - 2,108;

Hinundayan - 2,100;

Hinunangan - 3,500;

Saint Bernard - 1,500;

Sogod - 2,400;

Maasin City - 1,000;

Liloan - 1,800;

Limasawa - 2,000;

Macrohon - 500;

Bontoc - 1,000;

San Francisco - 1,600;

San Juan - 700 at sa Leyte:

Dulag - 1,000;

Hilongos – 70;

Tacloban City - 2,500.

Bawat food pack ay naglalaman ng 6 na kilo ng bigas, 4 cans ng corned beef, 4 cans ng tuna flakes, 2 cans ng sardines, 5 sachets ng kape at 5 sachets ng cereal drink.

Ayon sa DSWD, bawat pakete ay makakapagsustena sa isang pamilya ng dalawa hanggang tatlong araw.

“These FFPs and its contents may not be sold, as it is intended for relief distribution to disaster-affected families,” batay sa statement ng DSWD.

Giit naman ni DSWD spokesperson Irene Dumlao, mayroon na silang mahigit P900 milyon halaga ng available stockpiles at standby funds para makatulong sa mga naapektuhan ng Bagyong Odette.

Sinabi rin ni Dumlao na hanggang nitong Sabado, nakapagbigay na ang DSWD ng tinatayang P3.5 milyong halaga ng assistance sa mga lugar na hinagupit ni Odette sa Caraga, Eastern at Western Visayas, at Mimaropa regions.

Paliwanag naman ng DSWD na batay sa Republic Act 10121, ang mga LGUs ang unang dapat na rumesponde sa panahon ng disasters o mga sakuna. Habang maaari namang mag-request ng karagdagang relief items mula sa ahensiya kung kinakailangan.

P10.4 B pondong nawawala sa SAP, pinabulaanan ng DSWD

ni Ronalyn Seminiano Reonico | July 4, 2021

Pinabulaanan ng Department of Social Welfare and Development (DSWD) ang alegasyon ni Senator Manny Pacquiao na may nawawala diumanong P10.4 bilyon pondo ng Social Amelioration Program (SAP) habang 1.4 milyong benepisyaryo ang hindi nakatanggap ng ayuda.

Ayon kay DSWD Spokesperson Irene Dumlao, handang humarap ang ahensiya sa anumang imbestigasyon kaugnay ng naturang alegasyon.

Aniya sa isang panayam, "Nais din nating bigyang-diin na wala pong nawawalang pondo hinggil sa SAP implementation.”

Kinuwestiyon din ng senador sa kanyang virtual press conference ang e-wallet na Starpay para sa SAP. Saad ni Dumlao, "Ang financial service providers (FSPs), kabilang ang Starpay, ay ini-liquidate lahat ng budget na kanilang natanggap. Anumang pondo na kanilang natanggap ay ini-refund sa DSWD. It is now being distributed sa mga natitira pang SAP beneficiaries.”

Samantala, ayon kay Pacquiao, may hawak siyang matibay na ebidensiya at nais niyang imbestigahan ito ng pamahalaan.

827 na edad 100 at higit pa, nakatanggap ng P100K cash incentive

ni Lolet Abania | June 30, 2021

Nasa 827 centenarians na ang nakatanggap ng kanilang P100,000 cash incentive na mandato ng gobyerno sa ilalim ng Republic Act No. 10868 o Centenarians Act of 2016.

Ayon sa Department of Social Welfare and Development (DSWD), hanggang nitong May, 2021, umabot na sa P82.7 milyong cash gift ang naibigay nila sa 827 centenarians mula sa 1,319 target na benepisyaryo ngayong 2021.

Para maiwasan ang posibleng transmission ng virus sa mga benepisyaryo, minabuti ng DSWD na ibigay ang mga cash incentives sa pamamagitan ng pagbabahay-bahay sa kanila.

“Field Offices CALABARZON and X have already completed the distribution of the centenarian incentive for their target beneficiaries numbering to 135 and 25, respectively,” ani DSWD sa isang statement.

Sa ilalim ng centenarian law, ang mga Pilipinong nasa edad 100 at pataas, naninirahan man sa bansa o abroad, ay bibigyan ng isang Letter of Felicitation na mula sa Pangulo at nakasaad dito, “congratulate them for their longevity.”

Para sa aplikasyon ng benepisyo, ang mga kaanak ng centenarian ay kailangang magsumite ng pangunahing dokumento gaya ng birth certificate at Philippine passport sa city o municipal social welfare office at sa Office for Senior Citizens Affairs (OSCA) sa kanilang lokalidad.

Sakaling ang passport at birth certificate ay hindi available, maaari ring tanggapin ng mga awtoridad ang pangunahing identification cards tulad ng Government Service Insurance System (GSIS) at Social Security System (SSS); driver’s license; Professional Regulations Commission (PRC) license; at Commission on Elections (COMELEC).