Trabaho para sa mga estudyante, oks na — DOLE

ni Madel Moratillo | May 7, 2023

Naglunsad ang Department of Labor and Employment (DOLE) ng special employment program para sa mga mahihirap na working students.

Sa ilalim ng special program for employment of students ng DOLE, pwedeng magtrabaho ang isang estudyante sa loob ng 20 hanggang 70 araw.

Kabilang sa pasok dito ay mahirap pero deserving students, out-of-school youth, at dependent nang nawalan ng trabaho at gustong makatulong sa pamilya at maipagpatuloy ang pag-aaral.

Kabilang sa requirements ay dapat na hindi bababa sa 15-anyos pero hindi lalagpas sa 30.

Ang pinagsamang net income ng magulang ay hindi lagpas sa regional poverty threshold, ang estudyante ay dapat na may average na passing grade, kung out-of-school youth naman ito ay dapat na certified ng local Social Welfare and Development Office bilang OSY.

Ang mga interesadong indibidwal ay pinapayuhang magtungo sa mga public employment service office sa kanilang mga lugar.

P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

P5K-P10K ayuda sa mga nawalan ng trabaho

ni Mary Gutierrez Almirañez | March 28, 2021

Nakahandang maglaan ng financial assistance ang pamahalaan para sa mga empleyadong mawawalan ng trabaho habang ipinapatupad ang isang linggong lockdown sa NCR Plus Bubble, ayon kay Department of Labor and Employment (DOLE) Secretary Silvestre Bello III ngayong araw, Marso 28.

Aniya, "We are prepared anyway to provide cash assistance sa ating displaced workers, especially 'yung nasa formal employment, and of course' yung ating mga OFWs. For the formal workers, we will rely on employers who will submit to us mga pangalan ng workers nila na na-displace. Hopefully, with this one week lockdown, medyo maiwas-iwasan natin ‘yung unemployment result nitong matinding health protocols.”

Paliwanag pa niya, makakatanggap ng P5,000 ang mga displaced formal workers, habang P10,000 naman ang matatanggap ng mga OFWs at para sa mga informal workers na kaka-hire lamang at biglang nawalan ng trabaho dahil nag-lockdown ay makakatanggap din ito ng ayuda na katumbas ng minimum wage salary.

Giit naman ni Employer’s Confederation of the Philippines President Sergio Ortiz Luiz Jr., "Ang nakikita kong mapeperhuwisyo, ‘yung mga no-work, no-pay na mga empleyado... Pinapakiusapan 'yung malalaking miyembro namin, sana kargahin na lang ninyo ‘yung Lunes, Martes, Miyerkules para hindi naman masyadong mahirapan ang mga tao nila." Simula bukas ay ipapatupad na sa Metro Manila, Bulacan, Rizal, Laguna, at Cavite ang mas mahigpit na quarantine restrictions, kasabay ng mas pinaagang curfew mula alas-6 nang gabi hanggang alas-5 nang madaling-araw.

Sa ilalim nito ay maaari pa ring mag-commute ang mga papasok na empleyado sapagkat pinapayagan namang bumiyahe ang pampublikong transportasyon, gayunman limitado lamang ang kapasidad ng mga puwedeng sumakay.

Sa pagtatapos ng enhanced community quarantine (ECQ) sa ika-4 ng Abril ay inaasahang mapapababa nito ang bilang ng mga nagpopositibo sa COVID-19, partikular na sa Metro Manila na sentro ng pandemya.