Magsisimba, 30% na ang puwede — IATF

ni Lolet Abania | May 21, 2021

Itinaas na ng Inter-Agency Task Force for the Management of Emerging Infectious Diseases (IATF) sa 30 porsiyento ang seating capacity para sa mga religious gatherings sa NCR Plus at iba pang mga lugar sa bansa, ayon kay Department of Justice (DOJ) Secretary Menardo Guevarra.

Sinabi ni Guevarra na ang bagong polisiya, kung saan maisasagawa rin sa mga lugar sa ilalim ng general community quarantine (GCQ) with heightened restrictions, ay inaprubahan ng IATF kahapon matapos ang hiling at pakiusap ng mga simbahan.

Gayunman, ito ay ipapatupad nang hanggang May 31.

“This applies to all religious faiths, sects, and denominations,” ani Guevarra.

Matatandaang ipinatupad ng gobyerno ang limitadong 10% venue capacity para sa mga religious gatherings upang maiwasan ang pagkalat pa ng COVID-19.

Gayunman, isinailalim ni Pangulong Rodrigo Duterte ang Metro Manila at karatig-probinsiya gaya ng Bulacan, Rizal, Cavite, at Laguna – na tinatawag na NCR Plus -- sa GCQ with heightened restrictions mula May 15 hanggang May 31.

Lumabag sa curfew, pinag-push-up nang 300 beses, namatay

ni Mary Gutierrez Almirañez | April 6, 2021

Iimbestigahan ang pagkamatay ng isang curfew violator sa Cavite matapos mag-pumping exercise ng 300 beses, ayon kay Department of the Interior and Local Government (DILG) Undersecretary Jonathan Malaya ngayong umaga, Abril 6.

Aniya, “Lumalabas sa report, diumano, itong tao raw na ito ay inaresto ng mga village guards at inilipat sa barangay at ‘yung barangay naman ay ibinigay sa pulis. So, meron pong dalawang ahensiya dito na involved. Unang-una, 'yung local government unit. Pangalawa, ‘yung ating kapulisan.”

Kuwento pa ni Reichelyn Balce, live-in partner ng yumaong si Darren Peñaredond, lumabas ng bahay si Darren nitong Sabado para sana bumili ng mineral water ngunit hinuli at dinala ito sa General Trias Police Station kung saan unang ipinagawa rito ang 100 beses na pumping exercise. Ipinaulit pa iyon hanggang umabot nang 300 beses.

Nilinaw ni Reichelyn na may sakit sa puso si Darren. Nang gabi ring iyon ay isinugod nila sa ospital ang lalaki ngunit namatay din kalaunan.

Itinanggi naman ng General Trias Police na si Chief Police Lieutenant Colonel Marlo Solero ang ipinagawa kay Darren at iginiit na pinag-community service lamang nila ito.

Paliwanag ni Malaya, “Nakipag-ugnayan na po tayo sa Kampo Crame, kay Lt. Gen. Cesar Hawthorne Binag, at nagbigay na po tayo ng direktiba na imbestigahan kaagad-agad kung mayroon bang mga paglabag sa protocol o kaya naman nagkaroon ng iregularidad ‘yung ating mga kapulisan. We can assure the public na kung meron mang pagkukulang ang ating kapulisan, sisiguraduhin po natin na sila ay mananagot dito. Ito naman pong LGU ay meron ding imbestigasyon at hinihintay po namin ang report mula naman sa city government of General Trias.”

Samantala, inirekomenda naman ni Department of Justice Secretary Menardo Guevarra na palitan na lamang ng community service ang parusa sa mga quarantine violators sa halip na ikulong o pagmultahin ang mga ito.

Aniya, “I also recommended that in the enforcement, the stricter enforcement of the ordinances, that LGUs consider the possibility of imposing na lamang the penalty of community service for those who will continue to violate our ordinances rather than imprison or rather than putting them in jail or fining them, eh, kasi talaga ngang mahirap na ang buhay sa ECQ.”

Aktibista sa Laguna, niratrat, patay

ni Mary Gutierrez Almirañez | March 29, 2021

Patay ang vice-chairperson ng Pamantik Kilusang Mayo Uno (KMU) na si Dandy Miguel matapos magtamo ng 8 tama ng bala ng baril sa katawan at madatnang nakahandusay sa kalsada ng Asia 1, Canlubang, Calamba Laguna kagabi, Marso 28.

Batay sa tweet ng PAMANTIK KMU, “Pamamaslang ba ang regalo kay Duterte sa kanyang kaarawan? Mas marami pa bang mga pamamaslang at pag-aresto ang aasahan sa loob ng pagbabalik ng ECQ?”

Anila, kabilang si Miguel sa naghain ng reklamo sa Commission on Human Rights kaugnay sa naganap na ‘Bloody Sunday’ kung saan 9 na aktibista ang napatay ng mga pulis.

Sa ngayon ay inaalam pa ng awtoridad ang motibo sa pagpatay at kung sino ang salarin.

Giit pa ni Justice Secretary Menardo Guevarra, “We’ll do a preliminary assessment first. If there's any indication that Miguel's death had something to do with his being a labor leader, the AO 35 committee will include his case for investigation.”