200 kaso ng tuberculosis, naitala sa South Cotabato

ni Lolet Abania | June 2, 2022

Nasa tinatayang 200 kaso ng tuberculosis (TB) ang nai-record ng mga health officials sa lalawigan ng South Cotabato.

Ayon kay John Codilla ng integrated health office ng probinsiya, ang mga kasong ito ay na-detect matapos na magsagawa sila ng active case finding sa lugar.

“Ang direction kasi ng Department of Health is hanapin lahat ‘yung ating mga pasyenteng nagkaroon po ng tuberculosis,” ani Codilla.

“So sa first quarter po ‘yan. ‘Yung 200 po na nai-declare or nai-report po natin nu’ng, ngayong buwan lang po ‘yan, ay gawa po ng ating active case finding o pagbibigay po ng mga libreng x-ray doon sa ating mga geographically isolated and depressed areas,” sabi ni Codilla.

Sa ngayon aniya, nagbibigay sila ng libreng gamut sa mga bagong natukoy na tuberculosis patients.

“Libre po ‘yan na binibigay. ‘Yung lahat po ng ating munisipyo ay meron ng TB-DOTS facility, na may kakayahan din po na mag-detect ng iba’t ibang klaseng tuberculosis, hindi lang po doon sa baga kundi sa iba-ibang bahagi rin po ng kanilang mga katawan,”

pahayag ng opisyal.

Gayunman, sinabi ni Codilla na nahaharap sila sa problema kaugnay sa supply ng ilang mga medisina.

Ayon kay ni Codilla, may pondo ang provincial government para bumili ng mga gamot, subalit kailangan nila ng tulong ng national government para makuha ang mga ito ng probinsiya.

“Isa din natin hinihingi ‘no sa Department of Health sa central office, na kung pwede din natin matulungan din kami sa pagbaba din po ng supply galing diyan po sa Maynila,” paliwanag pa niya.

Matapos ang outbreak sa Zamboanga City.. 4 rehiyon, tumaas ang dengue cases — DOH

ni Lolet Abania | April 12, 2022

Ipinahayag ng Department of Health (DOH) ngayong Martes na nakitaan nila ng pagtataas ng dengue cases sa Zamboanga Peninsula, Cagayan Valley, Western Visayas, at Davao Region matapos ang deklarasyon ng isang dengue outbreak sa Zamboanga City.

Sa isang media briefing, ipinaliwanag ni DOH Undersecretary Maria Rosario Vergeire na sa kabila na pagtaas ng dengue cases kamakailan sa bansa, ang lingguhang nai-report na kaso nito sa kabuuang ngayong taon aniya ay “still significantly lower” kumpara sa mga kaso na nai-record noong 2021.

“Sa ngayon, kapag tiningnan natin ang breakdown among different regions, doon natin nakikita ‘yung pagtaas. Aside from Zamboanga or Region 9, meron din tayong nakikitang pagtaas ng mga kaso ng dengue sa Region 2, sa Region 6, at saka Region 11,” sabi ni Vergeire.

Ipinunto rin ng opisyal na ang mga kaso lamang sa Zamboanga City ang nag-exceed sa naitalang epidemic nito, kung kaya ideklara ang isang dengue outbreak sa lugar.

Ayon sa local na gobyerno, ang mga kaso ng dengue sa Zamboanga City ay umabot na sa 893, kabilang na 11 nasawi, mula Enero 1 hanggang Abril 2. Anila, 85 dengue cases ang nai-record sa morbidity sa week 13, kung saan 963% mas mataas sa parehong panahon noong 2021.

“The most probable cause for this rise in cases would be nag-uulan na po. So, kailangan lang talaga ng masusing linisin ang mga backyard natin, ang ating mga tahanan, ang ating mga pwesto sa komunidad, public spaces para mawala ang pinagbabahayan ng Aedes aegypti o ‘yung lamok na nakakapag-cause ng dengue,” saad ni Vergeire.

Nitong Lunes, ang DOH ay nakipag-ugnayan na sa regional health at government offices sa Zamboanga City habang nagtakda na rin ng mga preventive measures upang labanan ang naturang sakit.

Sa panawagang mag-resign... Presidente lang ang puwedeng magtanggal sa'kin – Roque

ni Lolet Abania | September 13, 2021

Ipinagkibit-balikat lang ni Presidential Spokesperson Harry Roque ang panawagan na siya ay mag-resign matapos ang ginawa niya sa mga doktor sa isang meeting ng COVID-19 response task force ng gobyerno.

“Unfortunately, only the President can fire me,” ani Roque sa press briefing ngayong Lunes.

Nagsimula ang naturang panawagan nang mag-viral at mapanood ang video na pinagagalitan at galit na reaksyon ni Roque kay Dr. Maricar Limpin, pangulo ng Philippine College of Physicians, sa naganap na meeting ng pandemic task force noong nakaraang linggo.

Ang nasabing footage ng insidente ay nag-leak sa social media.

Sa pulong, nakiusap si Limpin sa gobyerno na kung maaari ay manatili na muna sa mahigpit na restriksiyon sa gitna ng COVID-19 pandemic para hindi rin aniya, mahirapan ang healthcare system ng bansa.

Hindi sumang-ayon dito si Roque, bagkus sinabi nitong ang epekto ng naturang restriksyon ay lalong maglulugmok sa ating ekonomiya. Habang inakusahan ng kalihim si Limpin at kanyang grupo na puro kritisismo sa ginagawa ng administrasyon kaugnay sa pandemya.

Sinabi naman ni VP Leni Robredo na walang karapatan si Roque na mag-react ng ganoon sa mga health workers na silang nangungunang lumaban sa gitna ng pandemya, kahit pa hindi siya pabor sa mga suhestiyon ng mga ito.

Panawagan ng mga grupo ng health workers na sina Roque at Department of Health Secretary Francisco Duque III na mag-resign na dahil sa naging komento ni Roque at sa matagal nang naantalang benepisyo ng health workers sa gitna ng COVID-19 pandemic.

Subalit, ayon kay Roque, hinggil sa panawagan na si Duque ay mag-resign,“Only the President can fire Secretary Duque.”