Bawas-presyo sa gas, posible sa susunod na linggo – DOE

ni Lolet Abania | March 31, 2022

Ipinahayag ng isang opisyal ng Department of Energy (DOE) na kinakikitaan na ng indikasyon na posibleng bumaba ang presyo ng mga produktong petrolyo sa susunod na linggo.

Ayon kay Rino Abad, director ng Oil Industry Management Bureau ng DOE, ang presyo ng langis ay bumaba sa nakaraang tatlong araw na kalakalan o three trading days.

“Bumababa po ang price. I hope na matuloy ngayong araw hanggang bukas ang pagbaba o ma-maintain ang pagbaba para po masigurado natin na may rollback next week,” sabi ni Abad.

“Hindi muna ako magsasabi ng figure pero malaki ang indikasyon na talagang may rollback as far as three trading days are concerned,” saad pa ng opisyal.

Sinabi naman ni Abad na ang presyo ng langis ay nananatili pa ring pabagu-bago.

Paliwanag ng opisyal, ang nagaganap na peace talks sa pagitan ng Russia at Ukraine ay sadyang nakaimpluwensya kaugnay sa oil trading ngayong linggo.

Gayunman, ayon kay Abad, may reports na ang peace talks sa pagitan ng dalawang bansa ay pinipigilan at maaaring makaapekto ito sa tsansa ng rollback sa presyo ng mga produktong petrolyo.

Nitong Martes, nagpatupad ang mga lokal na kumpanya ng langis ng isa pang bigtime price hike sa mga petroleum products, kung saan umabot na sa 12 mula sa 13 linggo na pagtataas ng presyo nito ngayong taon.

Guidelines sa paggamit ng electric vehicles, bubuuin ng DOE

ni Lolet Abania | March 21, 2022

Lilikha ang Department of Energy (DOE) ng mga guidelines o alituntunin para sa paggamit ng mga electric vehicles habang ang pending bill hinggil dito ay nakatakda pang pirmahan.

Sa isang interview ngayong Lunes kay Undersecretary Gerardo Erguiza Jr., sinabi nitong nakasama sa panukala ang isang framework o balangkas na mag-aawtorisa sa DOE at Department of Transportation (DOTr) para buuin ang mga guidelines.

“Pangalawa, pipirmahan na rin po naka-pending na hong batas on electric vehicles,” ani Erguiza.

“Nakalagay na po diyan ang framework at binigyan ng authority ang DOE at gagawin nilang more particular ito, in coordination with the DOTr, at gagawin ang guidelines na ho rito,” dagdag pa niya.

Ayon kay Erguiza, nag-isyu na ng isang circular para sa certification sa mga nagnanais na magtayo ng mga charging stations para sa mga electric vehicles.

Sinabi pa ni Erguiza na nagde-develop na rin ng hydrogen fuel na mai-install sa mga electric vehicles para hindi na nila kakailanganin pa na i-charged ang mga ito.

“’Yung electric vehicle natin, merong tsina-charge, merong hindi na, merong hybrid. ‘Yung mga hybrid tumatakbo on their own, meron nang sariling mechanism sa sasakyan,” paliwanag pa ni Erguiza.

‘Pag patuloy tumaas sa global market... P86.72 sa gasolina, P81.10 sa diesel at P80.50 sa kerosene

ni Lolet Abania | March 14, 2022

Posibleng pumalo ng hanggang P86.72 kada litro ang presyo ng gasolina habang P81.10 kada litro sa diesel kapag patuloy ang pagtaas ng produktong petrolyo sa pandaigdigang merkado, ayon sa Department of Energy (DOE).

“This is not just a problem of the executive department. This is a problem of course that will be a problem of all sectors in the government. We have a framework where we have the objective of fair pricing, but still we are unable to do that,” paliwanag ni DOE Undersecretary Gerardo Erguiza Jr. sa hearing ng Senate Committee on Energy ngayong Lunes hinggil sa epektong dulot ng krisis sa Russia at Ukraine sa suplay at presyo ng langis sa Pilipinas.

Umabot na sa 10 sunud-sunod na linggo ang pagtaas ng presyo ng krudo sa bansa, habang may nakaamba pang bigtime oil price hike sa Martes.

Una nang nagbigay ng forecast ang Unioil Petroleum Philippines nitong weekend, na ang presyo ng kanilang produktong petrolyo mula Marso 15 hanggang 21 ay posibleng tumaas ng P12.20-P12.30 kada litro sa diesel, at P6.80-P7.00 kada litro sa gasolina.

Ayon sa DOE, itinakda na ang Dubai crude price ay nasa $80 kada barrel lamang bilang pamantayan sa panahon ng krisis, pero ang presyo ng langis ay umabot na sa $120.34 kada barrel hanggang nitong Marso 14, 2022.

Babala ni Erguiza, kapag patuloy ang pagtaas ng krudo sa global market at umabot ang Dubai crude oil sa $140 kada barrel, posibleng pumalo ang presyo ng gasolina ng P86.72 kada litro, P81.10 kada litro sa diesel, at P80.50 kada litro sa kerosene sa mga lokal na pamilihan.

“The DOE has been strictly monitoring the sufficiency of supply, the quality of what’s being sold in the market… We want to assure the public that our supply is sufficient and what is really the problem is the cost of fuel,” giit ni Erguiza.