Magulang na nagbayad ng taga-sagot sa module, lagot sa DepEd

ni Lolet Abania | March 6, 2021

Iniimbestigahan na ng Department of Education (DepEd) ang ilang mga magulang na diumano'y nagbabayad ng tao upang sagutan ang mga learning modules ng kanilang mga anak.

“Iyon naman po ay pinapatingnan natin sa ating mga kasama at magpapa-validate tayo ng mga naiulat,” ani DepEd Undersecretary Diosdado San Antonio sa Laging Handa briefing ngayong Biyernes.

Aniya, ang mga magulang na masasangkot sa ganitong gawain ay kanilang isa-sanction.

“Ang maliwanag po simula’t simula, binigyang-diin din natin na hindi puwedeng gawin ito kasi hindi ito makakatulong sa pagtuturo ng honesty, pagiging honest ng mga kabataang Pilipino kung ang mga magulang mismo ang mamimili o ang tutulong sa pagbibigay ng sagot,” saad ni San Antonio.

“Kapag napatunayan pagkatapos ng mahabang proseso ay mabibigyan ng angkop na kaparusahan,” dagdag niya. Ito ang tiniyak ni San Antonio matapos na ibunyag ni Senador Sherwin Gatchalian ang diumano’y nangyayari sa distance learning sa isang Senate inquiry noong Miyerkules, kung saan tinatalakay ang education system ng bansa sa gitna ng COVID-19 pandemic.

Si Gatchalian ang chairperson ng Senate committee on basic education. Samantala, ipinaliwanag ni San Antonio ang tungkol sa naging report ng ahensiya na 99% sa higit 14 milyong estudyante ang nakakuha ng passing grades sa ilalim ng distance learning sa First Quarter ng school year 2020-2021.

“Iyon po kasing 99% na pumasa, hindi naman naliwanag namin na pati iyong markang 75 ay considered pasado na,” sabi ni San Antonio. Gayunman, ikinagulat ito ng ilang senador subalit ipinaliwanag ni San Antonio na ito ay bilang konsiderasyon na rin ng mga guro sa mga estudyante.

“Ang gusto kong mabigyang-diin ay puwede po talaga na naging mas considerate ang mga kasamang guro natin pero po may naiwan pa ring 1% na parang hindi naman nakipag-coordinate, nakipag-cooperate sa kanilang mga teachers,” dagdag niya.

Matatandaang binanggit na rin ng ahensiya na 14.5 milyong estudyante ang nakakuha ng passing grades habang mahigit sa 126,000 ang nakakuha naman ng failing marks.

Pagsasara ng klase, hanggang July 10

ni Ronalyn Seminiano Reonico | March 2, 2021

Extended ang school year sa bansa para sa basic education level hanggang July 10, 2021, ayon sa Department of Education (DepEd) dahil sa COVID-19 pandemic.

Sa DepEd Order No. 012, s. 2021, nakasaad na isinusulong ang pag-extend ng school year dahil sa mga learning gaps sa mga estudyante sa implementasyon ng distance learning. Ito rin ang magiging daan umano upang magkaroon ng panahon ang mga guro para sa iba’t ibang learning delivery modalities.

Saad pa ni Briones, “These learning gaps are attributable to reduced academic opportunities at home and substantial loss of live contact with teachers.” Mula Marso 22, iniurong ng DepEd ang third grading period sa Mayo 15 at ang fourth quarter naman ay sa Hulyo 10 mula sa Mayo 17.

Magsasagawa ang mga paaralan ng intervention at remediation activities para sa mga estudyante mula Marso 1 hanggang 12. Saan pa ng DepEd, “These interventions and remediation activities shall be indicated in the two-week home learning plan to be prepared by the teachers, with the assistance of the assigned learning support aides (LSAs) as applicable.”

Dadalo naman sa professional development program ng DepEd ang mga guro sa Marso 15 hanggang 19. Pahayag din ng DepEd, “The additional two-week period shall be compensated by a similar adjustment in the school break between S.Y. 2020-21 and S.Y. 2021-2022.”

Sakop ng bagong polisiya ang mga pampublikong elementarya at sekondaryang paaralan sa buong bansa at hinihikayat din ang mga pampribadong eskuwelahan, technical and vocational institutions, at higher education institutions na nag-aalok ng basic education na ipatupad ang guidelines ng ahensiya ng pamahalaan.

Mga iskul gagawing COVID-19 vaccination centers, pinalagan ng DepEd

ni Lolet Abania | January 27, 2021

Hindi lahat ng mga clinic at classroom sa mga pampublikong paaralan ay maaaring gamitin bilang vaccination centers ng COVID-19.

Ito ang naging tugon ni Department of Education (DepEd) Secretary Leonor Briones, kung saan nakipag-usap na ang ahensiya sa Department of Health (DOH) sa suhestiyon nito na paggamit ng mga school facilities at gawing vaccination centers.

“Kailangang iplano 'yan nang maayos kasi mayroon tayong schools na malaki ang clinic, mayroon namang schools na maliit lang. So, depende 'yan sa sitwasyon ng eskuwelahan,” sabi ni Briones sa Laging Handa public briefing ngayong Martes.

“Hindi tayo makasabi generally lahat ng clinics magagamit, dahil baka mag-create pa ng problema kasi maliit masyado, kulang ang personnel o malayo sa isang health station,” dagdag pa ng kalihim.

Aniya, kinakailangan na pinag-iisipan nang mabuti ng mga opisyal sakaling balak nilang gamitin bilang quarantine at vaccination centers ang mga paaralan dahil maraming dapat na ikonsidera rito.

“Dapat hindi sila magkalapit. Kung may quarantine center, we think twice about using them also as vaccination center, especially kung iyong campus iisa lamang,” ani Briones.

Binigyang-diin pa ni Briones na hindi dapat kabilang ang mga public school teachers sa mga tutulong sa pagtuturok ng vaccine kontra sa COVID-19. “Idine-deny namin iyong perception na ang mga teacher ay sila mismo ang mag-vaccinate,” saad ni Briones.