DepEd: Wala pang parusa vs viral video ng galit na titser

ni Angela Fernando - Trainee @News | March 19, 2024

Tuloy pa rin sa serbisyo sa isang pampublikong paaralan ang viral na titser na nakilala sa social media matapos niyang pagalitan ang kanyang mga estudyante nang live sa TikTok habang hinihintay ang resulta ng imbestigasyon sa kanyang ginawa, ayon sa Department of Education (DepEd) nitong Martes.

Sinabi ni DepEd Assistant Sec. Francis Bringas na hindi pa nila tinatanong ang pinuno ng paaralan kung ang titser ay patuloy pa ring nagtuturo, ngunit nilinaw nilang walang rason upang pigilan ito sa serbisyo dahil wala pang parusa ang ibinababa para sa nangyari.

“Wala naman tayong mga sanctions na ganyan until such time na meron tayong procedures na ipa-follow,” saad ni Bringas.

Matatandaan naglabas ng show cause order ang DepEd nu'ng Lunes laban sa hindi pa nakikilalang titser.

Binigyan ng nasabing ahensya sa National Capital Region ng 72 oras ang titser upang magsumite ng paliwanag hinggil sa isyu.

Pilot run ng K-10, aarangkada sa Sept. 25 — DepEd

ni Madel Moratillo @News | September 18, 2023

Sa Setyembre 25 magsisimula ang pilot implementation ng recalibrated Kindergarten to Grade 10 o K-10 curriculum sa ilang piling paaralan sa bansa.

Sa anunsyo ng Department of Education (DepEd), may 35 eskwelahan ang lalahok sa pilot run ng bagong MATATAG K-10 curriculum na una nang inilunsad noong Agosto 10.

Batay sa listahan ng DepEd, ang 5 eskwelahan ay nasa National Capital Region (NCR), tig-5 rin sa Cordillera Administrative Region (CAR), Ilocos Region, Cagayan Valley, Central Visayas, Soccsksargen, at Caraga.

Una rito, sinabi ni DepEd deputy spokesperson Assistant Secretary Francis Bringas na iko-consolidate ng DepEd lahat ng findings at resulta ng pilot run bilang paghahanda sa implementasyon nito sa mga susunod na taon.

By phase umano ang implementasyon ng bagong K-10 curriculum sa Kinder, Grade 1, Grade 4, at Grade 7 na magsisimula sa School Year 2024-2025.

Ang Grades 2, 5, at 8 naman ay sa SY 2025-2026; Grades 3, 6 at 9 naman sa SY 2026-2027, at Grade 10 naman sa SY 2027-2028.

Kulang ng klasrum.. P397B kailangan ng DepEd

ni Mylene Alfonso @News | August 24, 2023

Nasa P397 bilyon ang kakailanganin ng Department of Education (DepEd) upang matugunan ang kasalukuyang 159,000 classroom backlog sa buong bansa.

Ito ang nalaman sa pagdinig ng Senate Committee on Basic Education na pinamumunuan ni Sen. Sherwin Gatchalian kaugnay sa kahandaan ng mga pampublikong paaralan sa pagbubukas ng klase sa Agosto 29.

Ayon kay DepEd Assistant Secretary Cesar Bringas, kabilang sa 159,000 classroom backlogs ang 440 totally damaged classrooms at iba pa na winasak ng bagyo o kalamidad.

Sinabi ni Bringas na nagkakahalaga ng P2 milyon ang bawat silid-aralan at kung i-multiply ng 159,000, kailangan aniya ng P397 bilyon.

Sa 2023 national budget, sinabi ng DepEd official na binigyan lamang sila ng P10 bilyon na maaaring masakop ang pagtatayo ng mahigit 7,100 silid-aralan.

Sa datos naman na ipinakita ni Gatchalian, lumitaw na 32 percent ng mga classroom para sa Kinder hanggang Grade 6 ang maituturing na congested o hindi tumutugon sa ideal ratio na 1:32 students; 41 percent naman sa high school ang congested habang 50% sa senior high school.

Dahil dito, sinabi ni Bringas na ilang mga paaralan ang nagpapatupad ng hanggang tatlong shifts habang ang iba ay dalawang shifts.

Kinumpirma ng opisyal na nananatiling problema pa rin ng DepEd ang kakapusan ng mga guro kahit taun-taon ay mayroon silang 10,000 slots para sa mga bagong titser.