Mga guro, magulang at estudyante, binati ng DepEd na natapos ang klase kahit pandemic

ni Lolet Abania | July 11, 2021

Pinuri ng Department of Education (DepEd) ang lahat ng mga guro at estudyante na hindi natinag sa kanilang pagsisikap na mag-aral sa gitna ng pandemya ng COVID-19, kasabay ng pagtatapos ng school year 2020-2021 nitong Biyernes.

“Despite being tested in an extraordinary time, our learners persevered and made valuable gains for their future,” ani DepEd Secretary Leonor Briones sa isang statement.

“I am confident that this new breed of Filipino nation-builders -- one that has experienced unusual obstacles -- will be vital in moving the country for the years to come,” dagdag ni Briones.

Gayunman, hindi lahat ng mga estudyante ay nanatili sa pag-aaral dahil ilan sa kanila ay huminto sa online classes sanhi ng kawalan ng mga gadgets at internet connection na kinakailangan.

Matinding hamon din ang naranasan ng mga magulang dahil sa nagpalit ng pagtuturo at pag-aaral ang pamahalaan sa pamamagitan ng online learning.

Ayon kay Briones, malaki ang utang na loob ng ahensiya sa mga magulang at lahat ng guro, kung saan ilan sa kanila ang nagpupuyat at nagpapagod para ihanda ang mga modules na kailangan ng kanilang mga estudyante.

“We are greatly indebted to the dedication that you have given to your children during this crisis. Truly, your efforts have come to fruition as we celebrate this momentous day,” sabi pa ng kalihim.

Nakatakda sanang magtapos ang klase noong Hunyo, subalit nag-extend ang DepEd sa school year 2020-2021 para sa basic education hanggang nitong Biyernes, Hulyo 10.

Edukasyon sa 'Pinas, iniulat na kulelat, World Bank, nag-sorry

ni Ronalyn Seminiano Reonico | July 9, 2021

Humingi ng paumanhin ang World Bank sa naiulat na mababang kalidad ng edukasyon sa Pilipinas sa kanilang website kamakailan.

Saad ng World Bank, "We deeply regret that the report on education was inadvertently published earlier than scheduled and before the Department of Education (DepEd) had enough chance to provide inputs. This was an oversight on our part, and we conveyed our personal apologies in our communication with the government."

Ayon sa World Bank, binura na nila ang naturang educational report sa kanilang website at nakipag-ugnayan na rin sila kay DepEd Secretary Leonor Briones.

Ang naturang ulat ng World Bank ay may pamagat na: “Improving Student Learning Outcomes and Well-Being in the Philippines: What Are International Assessments Telling Us? (Vol.2): Synthesis Report Presentation.”

Ayon dito, 80 porsiyento ng mga estudyanteng Pinoy ang hindi man lang nakapasok sa minimum level ng expected proficiency o kulelat sa pag-aaral.

Samantala, una nang umapela ang DepEd hinggil dito at ayon kay Briones, luma ang pinagbasehang datos sa report ng World Bank at humingi rin siya ng public apology mula sa institusyon.

Saad pa ni Briones, “We would like the public to be aware of this and since the country was insulted [and] was shamed, we expect and look forward to a public apology.”

Online classes, sa August ang simula

ni Lolet Abania | June 23, 2021

Plano ng Department of Education (DepEd) na ang pagbubukas ng klase sa ilalim ng enhanced blended learning ay sa huling linggo ng Agosto o Setyembre habang patuloy ang pandemya ng COVID-19.

Nag-isyu ng statement ang DepEd matapos na hindi payagan ni Pangulong Rodrigo Duterte ang kanilang proposal na magsagawa ng limited face-to-face classes sa mga lugar na may mabababang panganib ng COVID-19 transmission.

“We will release the final school calendar for School Year 2021-2022 once we get the final approval of the President. We are proposing that he choose among either August 23, 2021, September 6, 2021, or September 13, 2021,” pahayag ng DepEd.

Sa ilalim ng enhanced blended learning scheme, ang mga estudyante ay magkakaroon ng online classes at/o learn lessons mula sa mga printed modules na ibibigay sa kanila ng mga guro. “We are hopeful that our partners and stakeholders will come together once again in this endeavor and work with us to serve the interest of our Filipino learners,” saad ng DepEd.

Sisiguruhin naman ng DepEd na prayoridad pa rin ang kaligtasan ng 27 milyong mag-aaral at mahigit sa 840,000 mga guro. “We will defer to the professional assessment of the Department of Health (DOH), the IATF, and the wisdom of the President in ensuring their protection,” dagdag pa ng DepEd.

Sa kabila ng natigil na face-to-face classes, tinitiyak ng DepEd sa publiko na patuloy ang ahensiya sa paghahanda at pagbibigay ng de-kalidad na edukasyon sa mga estudyante sa gitna ng COVID-19 pandemic.

“While we remain optimistic to open schools when our situation improves, we are ready to fulfill our constitutional mandate in supporting our learners and teachers in any form of learning available,” sabi ng DepEd.