DENR Usec. Antiporda, positibo sa COVID-19

ni Ronalyn Seminiano Reonico | April 6, 2021

Positibo sa COVID-19 si Department of Environment and Natural Resources (DENR) Undersecretary Benny Antiporda, ayon sa kanyang Facebook post ngayong Martes.

Aniya, noong March 22 ay nakaramdam na siya ng sintomas ng COVID-19 katulad ng pamamaos at pangangati ng lalamunan at sumailalim siya kaagad sa antigen test kung saan positibo ang resulta nito.

Negatibo naman daw sa antigen test ang mga kasama niya sa bahay.

Nang malaman niyang COVID positive siya ay kaagad din siyang sumailalim umano sa self-isolation.

Saad pa ni Antiporda, bukod sa vitamin c at zinc, niresetahan din siya ng doctor ng Zythromax at Lianhua.

Aniya pa, “My COVID-19 fight. Hindi ko sinabing gayahin n'yo pero ito ang pinagdaanan ko.

“Day 2. Mar. 23, 2021: Dr. Rogel prescribed Zythromax (once a day).

“With 4 tabs of Lianhua every meal.”

Noong March 24, aniya ay lumala ang kanyang lagay at bumaba ang oxygen level niya.

Nu’ng March 25, may nagpadala umano sa kanya ng Avigan.

Aniya, “Day 4 Mar. 25, 2021: Jojo Soliman sent Avigan meds for me, natakot naman ako baka magkahalu-halo na at ‘yun pa ang ikamatay ko.”

Kasunod nito ay nag-post si Antiporda ng kanyang larawan kasama ang tila healthcare worker na naka-protective suit.

Saad pa ni Antiporda, “Check-up time. COVID teletubbies on the move. Kaya natin ito.”

Plastic straw at coffee stirrer, bawal na — DENR

ni Lolet Abania | February 3, 2021

Ipinahayag ng Department of Environment and Natural Resources (DENR) na ang mga plastic straws para sa mga softdrink at coffee stirrers ay posibleng ipagbawal na sa bansa.

Sa isang statement, sinabi ng DENR na ang mga produktong ito ay nakabilang na sa listahan ng non-environmentally acceptable products (NEAP) na pinag-aralan ng National Solid Waste Management Commission.

Sa ilalim ng Ecological Solid Waste Management Act of 2000 o Republic Act 9003, anumang items na nakabilang sa listahan ng NEAP ay ipagbabawal, ayon sa itinatakda ng Commission.

"I am elated that after 20 years since the birth of RA 9003, the NEAP listing has now commenced,” sabi ni DENR Undersecretary Benny Antiporda.

“This is long overdue and we need to catch up with the demand of solid waste management in our country,” sabi pa ni Antiporda.

Ayon sa DENR, ang resolusyon ay pinasa sa kabila ng mga oposisyon mula sa ilang miyembro ng commission gaya ng Department of Trade and Industry (DTI), at ang mga sektor ng manufacturing at recycling industries.

“We have long been fighting for and we are committed in having a NEAP list to comply with the law to combat environmental damage,” saad ni Antiporda.

"The prohibition on these two single-use plastic items may be small steps in the NEAP listing, but it is a big leap when it comes to compliance with the provisions of RA 9003," dagdag ng kalihim.

2 nagbebenta ng bayawak, arestado

ni Lolet Abania | September 9, 2020

Nasagip ng mga tauhan ng Department of Environment and Natural Resources (DENR) Region III at pulisya ang 11 bayawak na ibebenta sana sa Pampanga.

Inaresto rin ng awtoridad ang dalawang tindero matapos na maaktuhang nagbebenta ang mga ito ng bayawak na nagkakahalaga ng P300 hanggang P900 kada isa depende sa laki. Wala namang binanggit na pagkakakilanlan sa mga suspek.

Ayon sa dalawang suspek, galing umano sa palaisdaan ang mga bayawak. Subali’t tinanggalan na ang mga ito ng mga ngipin. Gayunman, sasampahan ng kaukulang kaso ang mga naturang tindero.

Samantala, dinala na ang mga bayawak sa isang rehabilitation center sa Clark, Pampanga bago ito tuluyang pakawalan.

Ayon sa Republic Act 9147 of 2001 o Wildlife Resources Conservation and Protection Act, nakapaloob dito ang pag-iingat at proteksiyon sa wildlife species at sa mga tirahan nito. May karampatang parusa sa sinumang lalabag sa batas.

Itinuturing na endangered species ang bayawak kaya ipinagbabawal ang panghuhuli, pagbebenta at pag-aalaga ng mga ito.