Manila Bay Dolomite Beach, bubuksan na sa Hunyo 12 — DENR

ni Lolet Abania | May 31, 2022

Magbubukas na muli sa publiko ang man-made beach na matatagpuan sa kahabaan ng Manila Baywalk sa Hunyo 12, kasabay ng selebrasyon ng 124th Independence Day ng bansa, ayon sa Department of Environment and Natural Resources (DENR).

Sa isang statement, sinabi ng DENR na ang reopening ng Manila Bay Dolomite Beach ay unang naiskedyul nitong Mayo subalit iniurong ito dahil sa ilang mga imprastruktura ang hindi pa natapos sa naturang lugar.

“We are excited to open the dolomite beach to the public again on June 12. This is the good legacy of the Duterte administration, that’s why we really aim to open it before President Rodrigo Roa Duterte’s term ends,” saad ni DENR Acting Secretary Jim Sampluna.

Matatandaan na maraming environmental groups ang bumatikos sa nasabing proyekto, dahil anila sa idudulot na epekto umano sa kalusugan ng isang indibidwal ng crushed dolomite na ginamit bilang “white sands.”

Gayunman, ipinagtanggol ng DENR ang proyekto, paliwanag nila ang mga concerned agencies at mga eksperto ay kanilang kinonsulta hinggil dito. Gayundin, ayon sa Malacañang ang P389-M dolomite beach project ay makatutulong para sa flood control at mapipigilan din ang soil erosion. Unang binuksan ang Manila Bay Dolomite Beach sa publiko noong Setyembre 2021.

Kaugnay nito, ayon kay DENR Undersecretary for Policy, Planning, and International Affairs Jonas Leones, ang 500-meter beach nourishment project aniya, “has withstood rains, typhoons and floods yet remains intact.” “This proves that the dolomite beach, thanks to the assistance of the Department of Public Works and Highways and the other agencies, is stable and will prevail,” sabi pa ni Leones.

DENR: Muling pagbubukas ng Manila Dolomite Beach sa Hunyo 3 na

ni Lolet Abania | May 17, 2022

Iniurong ng Department of Environment and Natural Resources (DENR) ang muling pagbubukas ng Manila Baywalk Dolomite Beach mula sa dating Mayo 20 ay ginawang Hunyo 3, 2022.

Batay sa ulat, ipinagpaliban ng DENR ang reopening nito ng dalawang linggo dahil sa ilang imprastruktura ang hindi pa natatapos sa lugar.

Gayundin ayon sa report, kailangan pa ring linisin ang lugar na malapit sa US Embassy sa Manila. Bukod dito, sinabi ng DENR na nais tiyakin ng ahensiya ang kalinisan at kaligtasan ng tubig sa Manila Bay bago ang muling pagbubukas nito.

Matatandaang unang binuksan ang dolomite beach sa publiko noong Setyembre 2022. Maraming mga environmental groups ang bumatikos sa naturang proyekto dahil anila, sa epektong idudulot sa kalusugan ng crushed dolomite na ginamit bilang “white sands.”

Subalit, dinepensahan ng DENR ang kanilang Manila Baywalk Dolomite Beach, paliwanag ng ahensiya kinonsulta nila ang mga concerned agencies at mga eksperto kaugnay sa naturang proyekto.

800 toneladang basura, nahakot ng DENR

ni Zel Fernandez | April 29, 2022

Tinatayang aabot umano sa mahigit 800 toneladang basura ang nakolekta ng Department of Environment and Natural Resources (DENR) Calabarzon sa unang quarter ng 2022.

Sa tulong ng mga trash traps at regular na paglilinis ng mga river rangers, napigilang umagos patungong Manila Bay ang tone-toneladang basura na karamihan ay nagmula umano sa mga lalawigan ng Calabarzon.

Sa tala ng DENR, ang mga nahakot na basura ay mula sa pinagsama-samang bilang ng Cavite na umabot sa higit 600 tonelada; Rizal na aabot sa 120 tonelada; Batangas na mayroong 68 tonelada, at Laguna nasa 56 na tonelada.

Habang sa kabuuan ay 600 tonelada ng mga nakolektang basura ng mga river ranger ang nagmula sa iba’t ibang lalawigan ng Calabarzon, ang natitirang 200 tonelada ay naipon naman ng mga trash trap.

Kaugnay nito, ang mga nakolektang solid waste ay itinapon sa iba’t ibang sanitary landfills at materials recovery facility sa tulong ng mga tinukoy na lokal na pamahalaan.

Ayon sa DENR Calabarzon, ngayong taon ay magdaragdag pa ng mga trash traps sa mga natukoy na daluyan ng tubig sa apat na probinsiya na sakop pa rin umano sa Manila Bay Region.

Gayundin, patuloy na magtatalaga ang kawani ng mga tagapangasiwa ng ilog upang regular na magsagawa ng paglilinis sa iba’t ibang tributaryo ng Manila Bay sa loob ng rehiyon.

Samantala, nananawagan ang DENR sa publiko na sundin ang wastong paghihiwalay o pag-uuri ng basura at ang pagtatapon nito sa mga angkop lugar upang maiwasang mapunta ito sa Manila Bay at iba pang mga karagatan sa bansa.