Negative sa swab test… 2-anyos sa Zambales, positibo sa Delta variant

ni Ronalyn Seminiano Reonico | August 28, 2021

Nakapagtala ang Zambales ng unang kaso ng COVID-19 Delta variant kung saan isang 2-anyos na batang babae ang tinamaan nito, ayon sa kumpirmasyon ni Zambales Gov. Hermogenes Ebdane, Jr..

Ayon kay Ebdane, asymptomatic ang bata at kasalukuyang nasa quarantine isolation kung saan kasama nito ang kanyang ina na nurse na nagpositibo rin sa COVID-19, pati ang ama nito na positive rin.

Paglilinaw naman ni Ebdane, ang bata lamang ang positibo sa Delta variant.

Aniya, noong Agosto 5 dinala sa Philippine Genome Center ang nakuhang specimen samples mula sa bata at noong Agosto 23 naman inilabas ang resulta nito kung saan lumabas na positibo siya sa Delta variant.

Saad pa ni Ebdane, “Pero ‘yung huling check naman before that ay negative na siya sa COVID-19. ‘Yun nga ‘yung problema. Kaya nu’ng natanggap 'yung resulta ng PGC, we decided to put them on additional restriction kaya hanggang ngayon, nandoon pa 'yung mag-aama sa quarantine center at nag-request kami na magpadala uli ng specimen sa genome center."

Saad pa ni Ebdane, “Ang problema rito kasi, nakita namin na while positive sa Delta, negative ang RT-PCR nila.”

Nagtataka rin umano ang mga awtoridad kung bakit ang bata lamang ang nagpositibo sa Delta variant, ayon kay Ebdane.

Nagpatupad na rin umano ng mahigpit na border control at nagsagawa na rin ng contact tracing upang mapigilan ang pagkalat ng Delta variant sa Zambales.

Saad pa ni Ebdane, "Nagpa-meeting kasama ang mga mayors at municipal health officers kahapon, ang napagkasunduan dito ay magkaroon ng granular lockdown.”

Aniya pa, “Ipapatupad natin ulit ang mahigpit na curfew bawat barangay para wala nang lalabas. We also discouraged the holding of birthdays, weddings, and other parties sa mga bayan-bayan."

Samantala, sa ngayon ay mayroong 892 aktibong kaso ng COVID-19 ang Zambales, ayon pa kay Ebdane.

1,273 na kaso ng Delta variants sa 'Pinas

ni Lolet Abania | August 23, 2021

Pumalo na sa 1,273 ang tinamaan ng mas nakahahawang Delta variant ng COVID-19 matapos na makapagtala ang Department of Health (DOH) ngayong Lunes ng 466 bagong kaso nito sa bansa.

Ayon sa DOH, sa nabanggit na bilang, 442 kaso rito ay local, 14 ay returning overseas Filipinos (ROFs), at ang 10 ay bineberipika pa sa ngayon.

Ang mga local cases ay na-detect sa mga lugar sa Metro Manila - 201 cases, Central Luzon - 69 cases, Cagayan Valley -7 cases, Calabarzon - 49 cases, Mimaropa - 14 cases, Bicol Region - 4 cases, Western Visayas - 52 cases, Central Visayas - 19 cases, Northern Mindanao - 6 cases, Davao Region - 11 cases, SOCCSKSARGEN - 7 cases, Ilocos Region - 3 cases.

Sinabi pa ng DOH na sa 466 bagong kaso, isa lamang ang nananatiling active, walo naman ang nasawi at 457 ang nakarekober na.

“All other details are being validated by the regional and local health offices,” ayon sa statement ng ahensiya.

Una nang inianunsiyo ng DOH ngayong Lunes na mayroon nang community transmission ng Delta variant sa Metro Manila at Calabarzon, kung saan may tinatawag na ‘clustering of cases’ at walang mga link sa mga nahawahang indibidwal.

“Analysis of the latest sequencing results for the determination of community transmission is ongoing for other regions,” sabi ng DOH.

1 patay sa Delta variant sa Marinduque

ni Lolet Abania | August 20, 2021

Pumanaw na ang isa sa anim na residente sa lalawigan ng Marinduque na tinamaan ng Delta variant ng COVID-19.

Sa Laging Handa briefing ngayong Biyernes, sinabi ni Governor Presbitero Velasco, Jr. na ang nasawing pasyente ay mayroong comorbidity. Wala namang iba pang binanggit na detalye ang gobernador tungkol sa pasyente.

“Sa anim po, ‘yung isa po, ay minalas tayo, pumanaw na po. Pero ang sabi po sa akin ay meron naman pong comorbidity ‘yun, may ailment,” ani Velasco.

Noong Agosto 16, ang probinsiya ay nakapagtala ng 6 na kaso ng nakahahawang Delta variant ng COVID-19 sa 2 barangay ng munisipalidad ng Santa Cruz.

Agad na ipinag-utos ni Santa Cruz Mayor Antonio Uy ang paghahanda ng local government unit ng isasagawang mas mahigpit na quarantine sa lugar.

“We made sure that our contingencies were in place and food, medicines, tents, and isolation units are prepared for stricter quarantine protocols that will be imposed,” ani Uy.

Sa ngayon ayon kay Velasco, nakapagtala ng tinatayang 1,300 kaso ng COVID-19, kung saan aniya, tumaas nang husto ang bilang mula sa 390 infections lamang noong Mayo.

Gayunman, sinabi ni Velasco na nasa kabuuang 250 ang nananatiling active cases.

Hiniling naman ng governor na ipatupad ang mas mahigpit na quarantine classification ng kanilang probinsiya, na mula sa modified general community quarantine (MGCQ) ay gawing general community quarantine (GCQ).