319 bagong kaso... 3,027 Delta variant ng COVID-19

ni Lolet Abania | September 20, 2021

Nakapagtala ang Department of Health (DOH) ng 319 kaso ng Delta variant ng COVID-19 nitong Setyembre 18, kaya umabot na sa kabuuang 3,027 o 24.16% mula sa 12,530 sequenced samples sa buong bansa.

Ayon sa DOH, ang mas nakahahawang Delta variant ng coronavirus sa ngayon ay tinatawag na most common lineage o pinakakaraniwang variant na tumama mula sa mga sequenced samples ng COVID-19 cases sa Pilipinas.

Sa 319 bagong kaso ng Delta variant, 40 ang na-detect sa Region 2, habang sa Caraga ay may 31 cases. Sa Calabarzon ay nakapagtala ng 26 cases, habang sa Region 1 at sa NCR ay mayroong 24 kaso bawat isa. May 18 cases naman mula sa returning overseas Filipinos (ROF).

“This variant is now the most common lineage among sequenced samples as of the latest whole genome sequencing run,” ani DOH Undersecretary Maria Rosario Vergeire sa isang online press briefing ngayong Lunes.

Samantala, nasa 21.82% o 2,734 kaso na ng Beta variant habang ang Alpha variant ay mayroong 19.64% o 2,461 cases. Dalawang samples o 0.02% naman ang positibo sa Gamma variant, habang may isang sample na Lambda variant ang naitala sa bansa.

Ayon pa sa DOH, 9 na Beta variant cases at 13 Alpha variant cases ang nai-record sa pinakabagong sequencing run.

Sinabi rin ng ahensiya na binubuo ang mga variants of concern cases ng 97.7% ng mga sequenced samples mula pa noong Agosto.

“The increased proportion of these variants can be attributed to their increased transmissibility. However, sampling methodology also affects these proportions as samples from target areas or populations are prioritized more,” sabi ni Vergeire.

“Such populations or areas include samples belonging to clusters, severe or critical cases, admitted cases, samples from areas with sudden increase in COVID-19 cases, fully vaccinated individuals, and cases from returning overseas Filipinos. Infections from these populations are more likely to be associated with variants of concern,” dagdag ng kalihim.

640 bagong kaso ng Delta COVID-19 variant

ni Lolet Abania | September 13, 2021

Nakapagtala ang Department of Health (DOH) ng 640 karagdagang kaso ng mas nakahahawang Delta COVID-19 variant kaya umabot na sa kabuuang 2,708 cases ng virus ngayong Lunes.

Ayon sa DOH, sa 640 bagong kaso ng Delta variant, nasa 584 ang local cases, 52 ay returning overseas Filipinos (ROF). “Four cases are currently being verified if these are local or ROF cases,” pahayag ng DOH.

Sa 584 local cases, may 112 na residente ng National Capital Region, 52 sa Cagayan Valley, at 49 sa Calabarzon.

Sinabi rin ng ahensiya na ang dalawa pang Delta cases na nai-record ay residente naman ng Bangsamoro Autonomous Region in Muslim Mindanao.

“Based on the case line list, three cases are still active, 13 cases have died, while 624 cases have been tagged as recovered,” ani DOH. “Case details are being validated by the regional and local health offices.”

Sinabi pa ng DOH na ang latest count ay mula sa 748 samples na na-sequence ng University of the Philippines-Philippine Genome Center at ng University of the Philippines-National Institutes of Health.

279 bagong kaso ng Delta variant ng COVID-19

ni Lolet Abania | September 6, 2021

Umabot na sa mahigit 2,000 ang naitalang kaso ng mas nakahahawang Delta variant ng COVID-19 sa bansa, ayon sa Department of Health (DOH) ngayong Lunes.

Sa isang update ng DOH, University of the Philippines-Philippine Genome Center (UP-PGC), at ng University of the Philippines-National Institutes of Health (UP-NIH), nasa 279 kaso ng Delta variant ang na-detect mula sa 367 samples na naisumite ng 60 laboratories kaya pumalo na sa kabuuang 2,068.

Sa karagdagang 279 Delta variant cases, 245 ay local, 21 ay returning overseas Filipinos (ROF), at 13 kaso ay bineberipika pa kung ito ay local o ROF.

Ang pinakabagong batch ng kaso ng Delta variant na na-detect sa mga sumusunod na lugar:

• Ilocos Region (17 cases)

• Cagayan Valley (17)

• Central Luzon (24)

• Calabarzon (35)

• Mimaropa (9)

• Bicol Region (19)

• Western Visayas (3)

• Central Visayas (5)

• Eastern Visayas (14)

• Zamboanga Peninsula (1)

• Northern Mindanao (22)

• Davao Region (10)

• BARMM (5)

• Cordillera Administrative Region (13)

• National Capital Region (51)

Ayon sa DOH, dalawang kaso ng Delta variant ay nananatiling aktibo, walo ang nasawi, 267 kaso ang naitalang nakarekober na, habang ang dalawang kaso ay bineberipika pa.

“All other details are being validated by the regional and local health offices,” ani DOH.

Nakapagtala naman ang DOH ng 29 bagong Alpha variant cases, kung saan lahat ay local, kaya umabot na sa kabuuang 2,424 ang kaso nito.

Ayon sa ahensiya, isang kaso ang nananatiling active, isa ang nasawi, habang 27 ang nakarekober na sa Alpha variant.

Umakyat naman sa 2,697 ang Beta variant cases na unang na-detect sa South Africa, matapos makapagtala ng 28 bagong kaso subalit nakarekober na ang mga ito.

Ang P.3 variant na na-detect sa Pilipinas ay umabot naman sa 442 kaso matapos na maitala ang 13 bagong kaso nito. Sinabi ng DOH, isa ang nasawi habang 12 cases ang nakarekober na sa P.3 variant.

Hanggang nitong Setyembre 3 nai-report na may kabuuang 51 active cases ng Delta variant, na unang na-detect sa India, may 19 active cases ng Alpha variant, 14 aktibong kaso ng Beta variant at isa lamang na active case ng P.3 variant.

Gayunman, wala pang naiulat na bagong kaso ng Gamma at Lambda variants sa Pilipinas.