8-Public Assistance Center, binuksan sa Davao

ni Mylene Alfonso | April 24, 2023

Walong Public Assistance Center ang binuksan nina Tingog Partylist Rep. Yedda Marie Romualdez at Speaker Martin Romualdez sa iba’t ibang lugar sa Davao region.

Unang pinasinayaan ang mga Alagang Tingog Center (ATC) sa Samal Island, Panabo City, at bayan ng Carmen sa Davao del Norte.

Makatutulong umano ang mga ATC upang hindi maging balakid ang lokasyon sa pagkuha ng mga residente ng tulong mula sa gobyerno.

Binuksan din ang mga ATC sa Tagum City, at mga bayan ng Asuncion at San Isidro at sa Dujali at Sto. Tomas.

Dumalo sa pagbubukas ng mga ATC si House Deputy Sec. General Ponyong Gabonada na kumatawan kay Romualdez at mga opisyal mula sa iba’t ibang lokal na pamahalaan.

Sinundan ito ng pamamahagi ng financial assistance sa ilalim ng Assistance to Individuals in Crisis Situations (AICS) program ng Department of Social Welfare and Development (DSWD).

Tig-P2,000 ang natanggap ng 1,000 residente sa Samal Island, 800 naman sa Panabo City, at 500 sa Carmen.

Kaparehong tulong din ang natanggap ng 500 residente sa San Isidro, 500 benepisyaryo mula sa transport sector ng Asuncion, 1,700 magsasaka sa Tagum City, 500 sa Dujali, at 500 residente ng Sto. Tomas.

Nagsulat sa armchair, binatikos... Kampo ni Sara Duterte, nagpaliwanag

ni Zel Fernandez | May 10, 2022

Kasunod ng mga batikos matapos sulatan ang armchair na ginamit sa presintong pinagbotohan kahapon, nagpaliwanag si vice-presidential candidate Davao City Mayor Sara Duterte.

Nilinaw ng kampo ni Mayor Sara Duterte, ang isinulat nito sa arm chair ng eskuwelahan kung saan siya bumoto ay kahilingan mismo ng pamunuan ng Daniel R. Aguinaldo National High School (DRANHS) sa Davao City.

Paglalahad ng Hugpong ng Pagbabago Regional Party kung saan tagapangulo si Mayor Inday, ang mga katagang “Mahalin natin ang Pilipinas” ang isinulat ni Mayor Inday kalakip ang lagda at petsa ng pagboto nito kahapon ng Mayo 9, 2022. Bilang kapalit ay nagbigay ng limang upuan bilang donasyon si Inday Sara.

Samantala, ang naturang upuan ay ilalagak naman umano sa museo ng paaralan.

891 empleyado ng SPMC sa Davao, may COVID

ni Lolet Abania | January 29, 2022

Halos 900 empleyado ng Southern Philippines Medical Center (SPMC) sa Davao, ang nagpositibo sa test sa COVID-19 ngayong buwan.

Ito ang kinumpirma ng medical chief ng SPMC na si Dr. Ricardo Audan na karamihan sa 891 empleyado na tinamaan ng virus ay sumailalim sa home isolation, habang 30 lamang ang na-admit sa healthcare facility. “I think it’s the work of Omicron.

Ang mabuti lang dito, ’yung lahat ng nag-positive, fully vaccinated. And I think, karamihan din, naka-booster na,” sabi ni Audan sa isang interview. Sinabi ni Audan na dahil sa kakulangan ng mga staff ng ospital, binawasan ng SPMC ang quarantine period ng mga infected na empleyado na mula sa 7 araw ay ginawang 5 araw na lamang.

“Bale sinunod din namin ’yung guidelines ng IATF na 7 days fully vaccinated, ginawa na naming 5 days (ang quarantine) kasi talagang medyo ma-paralyze ang operation. But then, hindi kami nag-close, patuloy pa rin ‘yung serbisyo namin sa mga tao,” sabi ni Audan.

Gayundin, humingi na ang pamunuan ng ospital ng karagdagang personnel mula sa Department of Health (DOH), subalit ani Audan, ang ahensiya ay wala ring sapat na staff para ibigay sa kanila.

Ayon kay Audan, sumulat na rin ang ospital kay National Task Force Against COVID-19 chief implementer Carlito Galvez Jr., hinggil sa request nila na mga health workers na mula sa Armed Forces of the Philippines (AFP) at sa Bureau of Fire Protection (BFP).

Una nang natugunan ng mga naturang ahensiya ang kakulangan ng staff sa SPMC nang maitala ang unang surge ng COVID-19 sa Davao Region noong nakaraang taon. Subalit, bumalik din ang mga personnel na ito matapos na lumuwag ang sitwasyon sa lugar.

Samantala, parehong ang ICU at ward bed utilization rates sa SPMC ay umabot na sa 100 percent, kung saan ang lahat ng kanilang 87 ICU beds at 473 ward beds ay okupado na.

“Wala kaming problema mag-expand. In fact, mayroon kaming waiting na another 60 beds for expansion. The problem is ’yung staffing talaga,” sabi pa ni Audan.

Ang SPMC, isa sa pinakamalalaking mga ospital sa bansa, ay pangunahing ginagamot ang mga moderate hanggang critical COVID-19 cases dahil na rin ito sa pagdami ng mga pasyenteng tinatamaan ng coronavirus.

Gayundin, pansamantalang isinara ng ospital ang kanilang outpatient department na face-to-face services, habang pinayuhan ang mga pasyenteng mag-virtual consultation na lamang sa ngayon.