Baboy, bawal na sa Iloilo

ni Mary Gutierrez Almirañez | February 14, 2021

Pinagbawalan ni Iloilo Governor Arthur Defensor na makapasok sa pamahalaang lungsod ang mga baboy mula Eastern Visayas dahil sa naitalang kaso ng African Swine Flu (ASF) sa Leyte.

Ayon sa Department of Agriculture (DA), 4 na bayan sa Leyte na ang may kumpirmadong kaso ng ASF. Mahigit 3,000 baboy ang isinasailalim sa depopulation at marami pang hog raisers ang hindi nagsu-surrender.

Kabilang din sa mga binabantayan ang ilang bayan sa Masbate tulad ng Ajuy, Anilao, Batasan, Banate, Barotac Nuevo, Barotac Viejo, Batad, Carles, Concepcion, Dumangas, Estancia, at San Dionisio.

Mga baboy sa Misamis Oriental, patay sa ASF

ni Ronalyn Seminiano Reonico | February 11, 2021

Kinumpirma ng Department of Agriculture (DA) na African swine fever (ASF) ang ikinamatay ng mga baboy sa ilang lugar sa Misamis Oriental.

Ayon kay DA Regional Executive Director Carlene Collado, isinailalim sa test ang blood samples ng mga baboy mula sa Barangay Hampason, Pagawan, Manticao at Initao, Misamis Oriental at nagpositibo ang mga ito sa ASF.

Samantala, mabilis namang inaksiyunan ng awtoridad ang insidente at kaagad na isinailalim sa isolation ang mga apektadong lugar at inihiwalay ang mga infected na hayop.

Saad ni Collado, "Rest assured that the Regional ASF Task Force, concerned LGUs (local government units), hog industry and other stakeholders are doing its best to isolate, eliminate and compensate; manage, contain and control this viral disease.”

Price freeze sa presyo ng baboy, aprub kay P-Digong

ni Lolet Abania | February 1, 2021

Ipinag-utos ni Pangulong Rodrigo Duterte ang pagpapatupad ng price cap para sa baboy at manok sa loob ng 60 araw sa National Capital Region, batay sa isang report na inilabas ng PTV-4 na istasyon ng gobyerno.

Pinirmahan ni Pangulong Duterte ang Executive Order 124 matapos ang naging kahilingan ng Department of Agriculture (DA).

Matatandaang iminungkahi ng DA kay P-Duterte na magpatupad ng price freeze sa mga nasabing produkto gaya ng P270 kada kilo para sa kasim at pigue, P300 kada kilo sa liempo, at P160 kada kilo para naman sa karne ng manok.

Sinisi naman ni DA Secretary William Dar ang mga mapagsamantalang traders at wholesalers sa pagtaas ng presyo ng baboy sa gitna ng pagkalat ng African swine fever (ASF).

Ayon kay Dar, ilang mga traders at wholesalers ang nagkakaroon ng malaking profit margin ng mahigit sa P200 kada kilo sa pagitan ng farmgate price ng buhay na baboy at sa retail price ng karneng baboy sa mga palengke at pamilihan.

Noong nakaraang linggo, naiulat na ang COVID-19 task force ng gobyerno ay sinuportahan ang hindi pagluluwas at pagbibiyahe ng mga baboy mula sa Visayas at Mindanao.

Gayunman, ayon sa DA, ang mga imported na baboy ay inaasahang darating nitong February mula sa mga ASF-free na bansa na umabot sa kabuuang 54,000 metric tons.