Mga pulis sa Jemboy case, may apela

ni Angela Fernando - Trainee @News | March 1, 2024

Umapela ang 8 dating pulis na may kaugnayan sa pagkamatay ng 17-anyos na biktimang si Jerhode 'Jemboy' Baltazar sa kanilang pagkatanggal sa serbisyo, ayon sa Philippine National Police (PNP) nitong Biyernes.

Sa isang press conference, sinabi ni PNP spokesperson Police Colonel Jean Fajardo na ang mga nasabing pulis ay nagsumite ng kanilang apela sa Regional Appellate Board mula pa nu'ng Nobyembre 2023.

"Under appeal po sila. 'Yung mga na-dismiss po nag-appeal po sila as early as November 2023. Na-dismiss po sila September. I was informed earlier na nag-submit po sila ng appeal sa Regional Appellate Court," saad ni Fajardo.

Anim sa 8 pulis ang kinasuhan sa pagpatay kay Baltazar, na namatay nu'ng Agosto 2, 2023.

Matatandaang binaril ng mga pulis ng Navotas City si Jemboy habang papunta sa pangingisda matapos mapagkamalang suspek sa pamamaril sa Barangay NBBS Kaunlaran.

Lalaking nag-amok, patay nang barilin ng gwardiya sa Ermita

ni Angela Fernando - Trainee @News | February 9, 2024

Patay ang isang nag-amok na lalaki matapos na barilin ng isang gwardya sa Mabini sa may kanto ng Pedro Gil sa Ermita, Maynila.

Pagbabahagi ng isang saksi, isang alyas Bogart ang nakaalitan ng lalaki bago ang nasabing pamamaril.

Ilang ulit na hinataw ng itak ng lalaki si Bogart na nakatakbo ngunit bumagsak din pagkaraan ng ilang sandali.

Lumapit ang kalapit na gwardya ng isang hotel para awatin ang suspek na hindi huminto.

Nagpaputok ng warning shot ang gwardya at nang humarap ang suspek ay natakot itong hatawin din siya ng itak kaya nagdesisyon siyang barilin ito sa dibdib.

Saad ni Police Captain Dennis Turla, hepe ng Homicide Section ng Manila Police District (MPD), nagbigay ng paunang lunas ang gwardya bago isugod ang biktima ng pananaga sa ospital.

Narekober sa crime scene ang dalawang bala ng baril at kasalukuyang nasa kustodiya ng MPD-Homicide ang gwardya na nasa ilalim ng imbestigasyon.

14-anyos, nakipagkita sa BF, tinodas

ni Angela Fernando - Trainee @News | February 8, 2024

Malamig na nang makita ang katawan ng isang menor-de-edad na babae matapos na makipagkita sa kanyang kasintahan sa Davao City.

Tumawag pa ang 14-anyos na biktima para humingi ng tulong sa kanyang kapatid.

Natagpuan sa katawan ng biktima ang sugat sa ulo nang makita ito sa bakanteng lote sa Brgy. Bato.

Nahuli sa CCTV ang biktima kasama ang isang lalaki sa labas ng isang establisimyento bago mangyari ang krimen.

Agad na nadakip ang boyfriend ng menor-de-edad na umaming hinampas niya ng bato ang ulo nito.

Haharap naman sa mga kasong inihanda ng pulisya ang may sala.