700 toda members, sumalang sa COVID testing

Sumailalim kahapon sa Expanded Targeted Testing ng lokal na pamahalaan ang mga miyembro ng Tricycle Operators and Drivers Association (TODA) sa Las Piñas City.

Halos 700 TODA members ang sumalang sa COVID rapid at swab testing.

Layunin nitong matiyak ang kalusugan ng mga tricycle driver ngayong panahon ng krisis kasabay ng pagpapahintulot na pumasada ang mga TODA.

Kabilang sa mga sumalang sa testing ay ang mga miyembro ng BFRSSCVTODA (255), BFRV-V TODA (269), SMCTODA (32) at ng PHILAMTODA (80).

Ayon kay Las Piñas City Mayor Imelda "Mel” Aguilar, prayoridad ng lungsod na maisalang sa testing ang mga tricycle driver, bukod sa mga suspected COVID-19 cases, healthcare workers at frontliners.

Sinabi naman ni City Health Office Chief Dr. Ferdinand Eusebio na patuloy ang isinasagawang testing at mas pinaigting pa ang kanilang hakbang sa screening at contact tracing upang tugunan ang COVID-19 cases sa lungsod.

20,382 Positibo sa COVID-19

Umakyat na sa 20,382 ang kabuuang bilang ng covid-19 cases na naitala sa bansa.

Batay sa datos ng Department of Health, ito ay matapos silang may maitalang 634 na karagdagan pang kaso.

Pero sa bilang na ito ay 313 ang fresh cases habang 321 naman ang late cases.

Sa mga fresh cases na ito, 114 ang mula sa National Capital Region, 101 sa Region 7, ang 97 naman ay mula sa iba pang lugar sa bansa habang 1 naman ang mula sa hanay ng repatriate.

Sa mga late cases naman, ang 44 ay mula sa NCR, 37 naman sa Region 7, 177 naman sa iba pang lugar sa bansa habang 63 naman ay mula sa hanay ng mga repatriate.

May 95 namang naitala na bagong nakarekober mula sa covid-19.

Kaugnay nito, umakyat na sa 4,248 ang bilang ng mga pasyenteng gumaling mula sa virus. Habang may 10 namang naiulat pang nasawi dahil sa covid-19.

Sa kabuuan, nasa 984 na ang bilang ng nasawi sa bansa sa nasabing sakit.

Pinoy, isa sa mga nagde-develop ng gamot ng U.S. kontra COVID-19

Pinuri ang Department of Health at ang Inter-Agency Task Force for the Management of Emerging Infectious Diseases sa pagbibigay pahintulot sa bansa na makibahagi sa trial test ng World Health Organization (WHO) sa bisa ng bagong gamot na ginagamit ng Estados Unidos, Japan at South Korea laban sa Covid-19.

Ang tinutukoy na gamot ay ang Remdesivir na gawa ng Gilead, ang pharmaceutical company na nakabase sa California, USA.

Sa privilege speech ni Lone San Jose Del Monte City Rep. Florida Robes, sinabi nitong ang isa sa nasa likod ng development ng Remdesivir ay isang Filipino-American mula sa San Jose Del Monte City na may kaugnayan sa kanyang pamilya pero, tumanggi na itong magbigay pa ng karagdagang detalye.

Matatandaang, lumahok ang Pilipinas sa WHO Solidarity Trial for Remdesivir na may 117 patients registered sa 15 study sites (14 hospitals sa NCR at 1 Davao).

Ayon sa WHO, ikukumpara ang Solidarity Trial sa apat na treatment options laban sa standard of care, upang masuri kung ano ang mas epektibong pangontra sa Covid-19.

Napag-alaman na ang test na isinagawa ng United Institute National Institute of Allergy and Infectious Diseases sa Remdesivir ay nagresulta ng pagbaba ng recovery time ng 11 araw kumpara sa 15 araw sa placebo group.

Nabawasan din nito ng walong porsiyente ang fatality rate na nabigyan ng Remdesivir kumpara sa 11 percent sa placebo group.