Dahil sa COVID-19... 7.3 milyong Pinoy, tambay

Umabot sa 7.3 milyong Pinoy o katumbas ng 17.7% ang naitalang nawalan ng trabaho dahil sa covid-19 hanggang nitong Abril ng taong ito.

Batay ito sa datos na inilabas ng Philippine Statistics Authority (PSA).

Ayon sa National Statistician na si Dennis Mapa, ito na ang pinakamataas na unemployment rate na naitala sa bansa.

Noon aniyang Enero, ang unemployment rate ay 5.3% lamang o katumbas ng 2.4 milyon. Nabatid na noong Abril 2019, ay nasa 5.1% lamang ang unemployment rate o katumbas ng 2.3 milyon katao.

Ang datos na ito ng PSA ay mas mataas kaysa pagtaya ng Department of Labor and Employment (DOLE) na maaaring umabot sa 5 milyon ang mawalan ng trabaho dahil sa covid-19.

Sinabi ni Mapa na 38.4% ng mga employed workers ang nagsabing hindi sila makapagtrabaho dahil sa lockdown na ipinatutupad dahil sa covid-19.

Noong Abril ay mas mataas din ang underemployment o mga may trabaho pero naghahanap pa ng karagdagan upang makaagapay sa pangangailangan na umabot ng 18.9% o katumbas ng 6.4 milyong katao.

Kabilang sa mga apektadong sektor dahil sa covid-19 ay nasa art, entertainment at recreation sector kung saan nasa 54% ang nawalan ng trabaho.

COVID-19, posibleng lumala... Hirit ng PNP: Iwasang mag-rally

Umapela ang Philippine National Police (PNP) sa publiko na iwasan ang pagsasagawa ng mass protests ngayong umiiral ang general community quarantine (GCQ).

Bilang responsableng mamamayan dapat umanong iwasan ang lahat ng gawain na posibleng magdulot ng human to human transmission ng COVID-19.

Dahil umano sa isinagawang mass action, nakompromiso ang public health at kapakanan maging ng mga ralista.

Una nang dinakip ang pitong estudyante na miyembro ng progresibong grupo makaraang magsagawa ng kilos-protesta para kondenahin ang Anti-terrorism bill sa harapan ng University of the Philippines (UP) sa Cebu.

Ayon kay Police Lieutenant Colonel Melbert Esguerra, nilabag ng mga nagprotesta ang pagbabawal sa mass gatherings.

Aniya, binigyan lamang nila ng 10-minuto ang mga estudyante para mag-disperse subalit, hindi sumunod.

20,626 Positibo sa COVID-19

Umakyat na sa 20,626 ang kabuuang bilang ng covid-19 cases na naitala sa bansa.

Batay sa datos ng Department of Health, ito ay matapos silang may maitalang 244 na karagdagan pang kaso.

Pero sa bilang na ito ay 168 ang fresh cases habang 76 naman ang late cases.

Sa mga fresh cases na ito, 24 ang mula sa National Capital Region, 127 sa Region 7, ang 17 naman ay mula sa iba pang lugar sa bansa.

Sa mga late cases naman, ang 24 ay mula sa NCR, 11 naman sa Region 7, 41 naman sa iba pang lugar sa bansa.

May 82 namang naitala na bagong nakarekober mula sa covid-19.

Kaugnay nito, umakyat na sa 4,330 ang bilang ng mga pasyenteng gumaling mula sa virus. Habang may 3 namang naiulat pang nasawi dahil sa covid-19.

Sa kabuuan, nasa 987 na ang bilang ng nasawi sa bansa dahil sa covid-19.