183 barangay officials, iniimbestigahan sa anomalya sa cash aid

Aabot sa 183 barangay officials ang iniimbestigahan ngayon ng Philippine National Police-Criminal Investigation and Detection Group (PNP-CIDG) dahil sa umano'y anomalya sa pamamahagi ng cash aid sa ilalim ng Social Amelioration Program.

Inihayag ni Department of the Interior and Local Government (DILG) Secretary Eduardo Año na inaalam na kung may sapat na ebidensiya para makasuhan at mapanagot ang mga idinidiing opisyal ng barangay.

“Sa dami ng ating reklamong natanggap, 183 na ang iniimbestigahan ng ating kapulisan dahil may posibleng probable cause dito. Hindi titigil ang ating kapulisan sa pagdakip sa mga mandarambong na mga barangay official na siyang talagang virus ng lipunan," ani Año.

“These are the kinds of arrests na kating-kati gawin ng ating PNP dahil talagang gigil din sila sa mga corrupt local officials,” dagdag ng kalihim.

Hindi muna inihayag ni Año ang mga inaakusahang barangay officials habang nagpapatuloy ang pagsisiyasat.

Sa unang linggo pa lamang ng buwan ng Mayo ay ilang barangay officials na ang dinakip ng pulisya kabilang si Danilo Flores na konsehal sa Hagonoy, Bulacan matapos umanong kupitan ng hanggang P3,500 ang P6,500 cash aid na ipinamamahagi sa mga benepisaryo ng SAP sa kanilang lugar.

Samantala, inihayag naman ng PNP na patuloy din ang kanilang pag-validate sa mga reklamo laban sa halos 200 barangay officials para masigurong walang ibang motibo sa isinumbong sa mga awtoridad.

“Patuloy ang ating ginagawang validation dahil ayaw din naman natin mangyari na ang mga sumbong ay baka naman sanhi lamang ng kanilang hindi pagkakaunawaan, may galit lamang kay kapitan o kaya naman ay gawa lamang ng pulitika. So, ayaw naman natin na madamay pa tayo diyan,” pahayag ni PNP Spokesman Brigadier General Bernard Banac.

Sinabi ni Banac na sakaling matukoy na sangkot sa katiwalian ang mga inireklamong opisyal ng barangay ay tutuluyan nang kasuhan ang mga ito.

“Kapag mayroon talagang sapat na ebidensiya ay kaagad na nagsasampa tayo ng kaso,” ani Banac.

Hinihimok naman ni DILG Spokesman Undersecretary Jonathan Malaya ang publiko na patuloy na magsumbong sa mga nakasasakop sa kanilang opisyal na posibleng nasasangkot sa ilegal na mga aktibidad.

“Magandang simula na may 183 barangay officials na ang iniimbestigahan ng ating kapulisan. This only means that the people are participating and are aware of their responsibility in protecting their rights,” ayon kay Malaya. “Huwag kayong matakot. Tulungan ninyo kami na usigin ang mga tiwaling lider ng mga barangay na ito. Kakampi ninyo ang Pangulong Duterte, ang DILG, at ang kapulisan dito,” dagdag nito.

Religious activities, sakaling payagan na, health protocols, sundin

Bagama’t sarado ang simbahan sa ilalim ng enhanced community quarantine (ECQ), may mga mananampalataya pa rin ang nagtitiyagang makinig ng misa sa labas nito.

Halos dalawang buwan na mula nang ipinasara ang mga simbahan sapagkat ipinagbabawal sa ilalim ng ECQ ang malakihang pagtitipon ng mga tao na karaniwang nangyayari kapag may misa.

Gayunman, kabilang din umano sa pangunahing serbisyo ang mga religious service kaya patuloy ang mga panawagan na payagan na magbukas ang mga simbahan kasunod ng pagtalima nito sa mga guidelines.

Kaugnay nito ay may inilatag nang health protocols sa Archdiocese of Manila sakaling pahintulutan na ang mga religious gatherings.

Inihayag ni Manila Archdiocese Apostolic Administrator Bishop Broderick Pabillo na babawasan ng kalahati ang kapasidad ng mga simbahan pero magkakaroon ng mas maraming misa.

Aniya, kailangang nakasuot ng face mask ang mga dadalo sa misa, maglalagay din ng mga hand sanitizer sa harapan at loob ng mga simbahan, mahigit ding ipatutupad ang social distancing at patuloy ang pagpo-post online ng mga misa para sa mga may edad na bawal lumabas.

Samantala, lilimitahan naman ang mga dadalo sa mga church event tulad ng kasal, binyag at iba pa.

Matatandaang inanunsiyo ng Malacañang bago ang unang araw ng Mayo na papayagan na ang mga religious activities sa ilalim ng GCQ, ngunit agad itong binawi matapos umapela ang mga local officials sa pangambang mas kumalat ang virus kapag pinayagang magtipun-tipon ang mga tao.

Hindi maitatangging marami ang nangangamba at nawawalan ng pag-asa sa panahon ngayon kaya mahalaga ang pagkakaroon ng psychological at spiritual resilience, pero kailangan pa ring maging maingat sa pagpapasya at iprayoridad palagi ang kaligtasan ng mga mananampalataya.

Ngayon, sakaling pagbigyan ang apela ng Simbahan, sana'y tiyaking maipatutupad ang mga panuntunan at susundin naman ng publiko.

Cebu City, naungusan na ang QC sa dami ng kaso ng COVID-19

Mas mataas na ang naitalang kaso ng Coronavirus Disease 2019 sa Cebu City kumpara sa Quezon City.

Ang Cebu City ay mayroon nang 1,571 na kaso ng COVID-19 matapos makapagtala ng 97 na panibagong kaso kahapon, Mayo 10. Habang ang Lungsod ng Quezon ay may kasong 1,524.

Umabot naman na sa 12 ang bilang ng mga nasawi sa Cebu City.

Ang 97 bagong kaso ay mula sa Barangay Mambaling na itinuturing nang ‘hotspot’ sa COVID-19.

Mahigit 2,400 katao pa ang nakuhanan ng swab samples ng City Health Department kahapon.