Pangalan ng aso, nasa listahan ng SAP

Nagreklamo ngayon ang isang residente ng Rodriguez, Rizal matapos makitang sa halip na pangalan niya ay pangalan ng alagang aso ang nasa listahan ng mga benepisyaryo para sa Social Amelioration Program (SAP).

Photo: Nurharija Lim

Ayon kay Nurharija Lim Rosqueta, residente ng Kasiglahan Village, Barangay San Jose sa Rodriguez, Rizal, nagulat siya nang makita sa listahan ng SAP beneficiaries ang pangalan ng kanyang aso na si Margarita Lim Rosqueta.

Nagpakita umano si Nurharija ng ID para patunayan ang address niya na nasa masterlist.

Pero hindi pa rin niya nakuha ang ayuda kaya nagreklamo ito sa barangay.

Pero ang barangay hindi rin umano maipaliwanag kung bakit Margarita ang pangalan sa listahan.

Ang apelyido ng amo ay karaniwang inilalagay sa dog book o record ng mga alagang hayop.

Liquor ban sa QC, binawi na

Pinapayagan na muli ng Quezon City government ang pagbebenta at pagbili ng mga inuming nakalalasing sa lungsod.

Sa ipinalabas na Executive Order No. 31 ni Quezon City Mayor Joy Belmonte, binabawi na nito ang liquor ban ngunit may itinakdang paghihigpit.

Batay sa EO, papayagan lang ang pagbebenta ng alak simula ala-1:00 ng hapon hanggang alas-5:00 ng hapon.

Maaari lamang ikonsumo ang mga alak sa loob ng pribadong lugar o mga bahay habang nasa ilalim ng Modified Enhanced Community Quarantine (MECQ).

May itinakda ring limitasyon sa dami ng bote ng alak na papayagang maibenta sa isang kustomer kada araw.

Halimbawa sa sari-sari store ay pupuwede ang anim na tig-isang litro ng beer sa bawat kustomer habang sa grocery ay papayagang magbenta ng limang case ng alak sa isang tao kada araw.

Kinakailangang magpakita muna ng valid na government ID ang bibili ng alak bago mabentahan.

Sa mga bibili na may planong mag-resell, dapat munang magprisinta ng valid na business permit at Licensing Department-issued business permit.

Desisyon pa rin ng IATF at DOH ang masusunod sa sports activities

Nakabase sa desisyon ng Inter-Agency Task Force (IATF) at Department of Health (DOH) ang susunod na hakbang ng Philippine Sports Commission (PSC) hinggil sa pagbibigay ng senyales na ibalik ang lahat ng sports activities sa bansa.

Hindi umano gagawa ng anumang kilos ang pamunuan ng ahensya ng pampalakasan sa magiging kinabukasan ng mga Filipinong atleta matapos naunang iutos nito na ipatigil ang lahat ng kumpetisyon at aktibidades dulot ng pananalasa ng coronavirus disease (COVID-19) sa buong mundo.

“Without IATF, without DOH advising us, as head of the Philippine Sports Commission, I will not allow any activities for the athletes, or even going out,” pahayag ni PSC chairman William “Butch” Ramirez sa panayam ng ABS-CBN News. “I must have that authorization that everything is normal. You and I are aware that there is no longer the old normal. There will be a new normal in the coming days,” dagdag nito.

Opisyal ng nakansela ang mga taunang multi-sports event na Philippine National Games, Palarong Pambansa, Batang Pinoy at Asean Paragames, maging ang mga international events gaya ng prestihiyosong 2020 Tokyo Olympics ay iniurong. Tinitignang aabot ng hanggang Disyembre ang pagkansela sa mga sports events sa bansa, kung saan wala ring kasiguruhan ang mga collegiate league tulad ng UAAP at NCAA; at proffessional leagues na PBA at MPBL.

“Being under (the) Office of the President, as the head of the office, it was my position to cancel all activities,” saad ni Ramirez. “Without the authorization of the IATF and the DOH, I will not send any athletes for foreign engagement.”

Idinagdag rin Ramirez na gumagawa na ang mga ito ng mga bagong protocols para sa mga atleta at coaches kung paano pamahalaan ang kanilang aktibidades sa kasagsagan ng pandemya.