COVID-19, 4th wave na… Nightclubs, karaoke bars, bawal uli sa South Korea

ni Ronalyn Seminiano Reonico | April 9, 2021

Muling nagpatupad ang South Korea ng nightclub at karaoke bar ban dahil sa banta ng 4th wave ng COVID-19. Ipinagbabawal din ng awtoridad ang operasyon ng iba pang nightly entertainment facilities.

Ayon kay Prime Minister Chung Sye-kyun, epektibo ito simula sa Lunes at magtatagal nang 3 linggo matapos makapagtala muli ang S. Korea ng mataas na kaso ng COVID-19.

Mananatili rin umano ang dining curfew na 10 PM at ang pagbabawal sa gatherings ng higit sa apat na katao.

Pahayag ni Chung, "Signs of a fourth wave of epidemics that we had so striven to head off are drawing nearer and becoming stronger.

"We will maintain the current distancing level, but actively reinforce various specific measures depending on the situation."

Nakapagtala ang Korea Disease Control and Prevention Agency (KDCA) ng 671 bagong kaso ng COVID-19 noong Huwebes at ang total number of infections sa naturang bansa ay umabot na sa 108,269, at umakyat na rin sa 1,764 ang death toll.

12,225 bagong kaso, 401 patay sa COVID-19 sa isang araw

ni Ronalyn Seminiano Reonico | April 9, 2021

Umakyat na sa 840,554 ang kabuuang kaso ng COVID-19 sa bansa matapos maitala ang karagdagang bagong cases na 12,225 ngayong Biyernes, ayon sa ulat ng Department of Health (DOH).

Sampung laboratoryo naman ang hindi nakapagsumite ng datos sa takdang oras, ayon din sa ahensiya.

Umabot na rin sa 178,351 ang aktibong kaso ng COVID-19 sa bansa na tinatayang pinakamataas na bilang ngayong taon. Sa naturang bilang, 97.5% ang mild, 1.4% ang asymptomatic, 0.5% ang severe, at 0.4% ang nasa kritikal na kondisyon.

Nakapagtala rin ang DOH ng pinakamataas na bilang ng mga nasawi sa COVID-19 ngayong araw na umabot sa 401, kaya umakyat na sa 14,520 ang death toll sa bansa.

Nadagdagan naman ng 946 ang mga pasyenteng nakarekober na sa COVID-19 at sa kabuuang bilang ay umabot na ang mga gumaling sa 647,683.

483 Pinoy abroad, dagdag-positibo sa COVID-19

ni Ronalyn Seminiano Reonico | April 8, 2021

Umabot na sa 17,064 Pinoy abroad ang nagpositibo sa COVID-19 matapos makapagtala ng 483 bagong kaso ngayong araw, ayon sa Department of Foreign Affairs (DFA).

Umakyat naman sa 10,077 ang bilang ng mga gumaling matapos makapagtala ng 7 bagong recoveries.

Tumaas din ang death toll matapos pumanaw ang 7 Pinoy at sa kabuuang bilang ay 1,066 na ang mga namamatay na Pilipino abroad.

Nasa 5,921 naman ang kasalukuyan pang sumasailalim sa gamutan dahil sa COVID-19.

Samantala, ang Middle East/Africa pa rin ang nangungunang bansa kung saan maraming Pinoy ang positibo sa COVID-19. Umabot na sa 9,529 ang mga Pinoy sa naturang lugar na nagpositibo sa COVID-19, 685 ang pumanaw at 4,963 naman ang gumaling na.