Special COVID-19 vaccination days, ie-extend ng gobyerno

ni Jasmin Joy Evangelista | April 3, 2022

Nakatakdang ie-extend ng gobyerno ang special vaccination days ngayong Abril upang mapabilis ang pagbibigay ng COVID-19 vaccine sa mga lugar sa bansa na mayroong mababang vaccination rate, ayon kay National Vaccination Operations Center (NVOC) chairperson Dr. Myrna Cabotaje ngayong Linggo.

Sa interview ng Super Radyo dzBB, ipinaliwanag ni Health Undersecretary Cabotaje na ang special vaccination days ay ‘variant’ ng national vaccination days na "Bayanihan, Bakunahan.”

Makatutulong umano ito upang malaman kung anong mga lugar sa bansa ang nangangailangan ng “special help” sa pagsasagawa ng vaccination drive.

“Ang gagawin in April, titignan na talaga kung sino mga areas ang kailangan ng espesyal na tulong para ‘yung mga kalapit rehiyon o kalapit na probinsiya ay makatulong sa mga siyudad na medyo mahina ang kanilang bakunahan,” aniya.

Nauna nang isinagawa ng Department of Health (DOH) ang naturang special vaccination days sa Cebu province, Davao region, at Cotabato City mula March 29 hanggang 31, at sa Bangsamoro Autonomous Region in Muslim Mindanao (BARMM) mula March 30 hanggang April 1.

Ayon pa kay Cabotaje, nananatiling hamon para sa kanila ang pagbabakunasa BARMM dahil ito ang nasa pinakahuling listahan dahil nasa 26% o 940,000 pa lamang ang nabakunahan mula sa target population na 3.5 milyon.

Base sa national COVID-19 vaccination dashboard ng DOH, at least 65.8 milyong Pilipino na ang fully vaccinated laban saCOVID-19 as of March 30. Sa bilang na ito, 64.3 million ang nakatanggap ng unang dose, habang 12 million naman ang nakatanggap na ng kanilang booster shots.

NVOC inilalatag na ang second booster shot sa Abril

ni Jasmin Joy Evangelista | March 28, 2022

Plano ng National Vaccinations Operation Center (NVOC) na makapagbakuna ng fourth dose ng COVID-19 vaccines o second booster shots sa mga piling grupo sa Abril.

Ayon kay NVOC Chairperson at Health Undersecretary Myrna Cabotaje, target ang pagbabakuna ng ikaapat na dose sa huling linggo ng Abril kung saan uunahin ang mga frontliners, senior citizens, at mga immunocompromised.

“Nag-apply na po ang DOH ng amendments sa EUA para sa mga piling bakuna na puwedeng ibigay pang fourth dose o second booster,” ani Cabotaje sa report ni Athena Imperial sa 24 Oras Weekend nitong Linggo.

“Humihina na ang immunity lalong lalo na sa edad nila, humihina ang proteksyon, so kailangang palakasin ito sa pamamagitan ng additional shot,” dagdag niya.

Ayon kay Cabotaje, kasalukuyan nang pina-finalize ang guidelines, kung saan hinihikayat ang mga target na grupo na kumonsulta sa kani-kanilang doktor bago magpabakuna ng second booster.

Sinabi naman ni Philippine College of Chest Physicians President Dr. Imelda Mateo na ang recommended interval ng first at second booster shot ay isa hanggang tatlong buwan, depende sa assessment ng doktor.

“Sabi po nila, a fourth dose of the same mRNA platform will offer 30% more protection against infection. For those who are immunocompromised, ibig sabihin [meaning] senior citizens and with comorbidities, [the] added 30% will matter,” aniya.

171,000 COVID-19 vaccines sa Central Visayas, na-expire

ni Jasmin Joy Evangelista | March 12, 2022

Nasa 170,000 doses ng COVID-19 vaccines sa Central Visayas ang nasayang dahil sa mahabang power outages matapos ang pananalasa ng bagyong Odette noong Disyembre 2021.

Ayon sa Visayas Vaccination Operations Center (VVOC), 171,703 doses ng COVID-19 vaccines ang nasayang as of Feb. 28, kung saan nasa 171,703 indibidwal sana ang nabakunahan.

Ang mga nasayang na nabakuna ay mga hindi nabuksang vials, na hindi na puwedeng iturok dahil sa breakage, expiration, temperature excursion at contamination, ayon sa VVOC.

Ipinaliwanag ni Dr. Mary Jean Loreche, spokesperson ng VVOC at chief pathologist ng Department of Health (DOH) sa Central Visayas, na karamihan sa mga bakunang nae-expire ay dahil sa pananalasa ng bagyong Odette sa Central Visayas kung saan matinding hinagupit ang mga probinsiya ng Cebu, Negros Oriental, at Bohol.

“Let us remember that there was Typhoon Odette. Many of the vaccines were nearing expiry at that time,” aniya.

Iginiit din ni Loreche na nagdulot ang bagyong Odette ng pagkawala ng power supply sa rehiyon kabilang ang mga ospital at iba pang health institutions kung saan nakaimbak ang mga COVID-19 vaccines.

Ang kawalan ng kuryente at internet connection ay naging dahilan din ng pagkakatigil ng vaccination drives ng mga local government.

Nakatanggap ang Central Visayas ng 10.1 million COVID-19 vaccines na iba-ibang brands. Sa bilang na ito, 8.9 million ang naibakuna.

Ayon sa VVOC, 6.5 million indibidwal ang eligible na mabakunahan sa Central Visayas. As of March 10, 61.42 percent, o at least 4 million, ang fully vaccinated na sa rehiyon.