168,355 kabataang edad 5-11, rehistrado na sa COVID-19 vax – DOH

ni Lolet Abania | January 29, 2022

Nasa kabuuang 168,355 kabataang edad 5 hanggang 11, ang nakapagparehistro na para sa pagbabakuna kontra-COVID-19 sa kanilang local government units (LGUs), ayon sa Department of Health (DOH).

“Hindi ibig sabihin na naka-concentrate o sila lang ang bibigyan. Ine-expand natin ito habang dumadami ang bakuna na dadating sa ating bansa,” paliwanag ni DOH Undersecretary Myrna Cabotaje sa Laging Handa briefing ngayong Sabado.

Ayon kay Cabotaje, ang mga batang mayroon at walang comorbidities ay babakunahan nang sabay-sabay.

“Hindi kagaya ng 12 to 17 na nauna ang may comorbidity, gusto natin mas mabilis ang bakunahan, kaya pagsasabayin natin ang pagbakuna ng may comorbidity at walang comorbidity,” ani Cabotaje.

Taliwas ito sa naging pahayag ni National Task Force against COVID-19 adviser Dr. Ted Herbosa na aniya, ang mga edad 5 hanggang 11 na may comorbidities, ang ipa-prioritize sa COVID-19 vaccination program ng gobyerno.

Para sa mga kabataang may comorbidities, ang kanilang mga guardians ay required na magprisinta ng kanilang medical certificates at patunay ng kanilang relasyon, sa mga vaccination centers.

Ang mga minors na edad 7 at pataas naman ay hihilingin na pumirma sa isang consent form hinggil sa kanilang vaccination.

Kung ang isang bata ay walang ID, maaaring tumayong witness o saksi ang barangay captains, na magpapatunay na sila ay sinamahan ng kanilang mga magulang o guardians.

Samantala, tinatayang 780,000 doses ng COVID-19 vaccine para sa mga kabataan, ang inaasahang darating sa Enero 31, habang kasunod nito ang marami pang deliveries ng mga bakuna sa mga susunod na araw.

Ilang ospital naman ang napili bilang vaccination sites, kabilang na ang National Children’s Hospital, Philippine Children’s Medical Center, at ang Philippine Heart Center.

Mga ‘di residente, puwede na ring magpabakuna sa Mandaluyong

ni Ronalyn Seminiano Reonico | August 20, 2021

Maaari na ring magpabakuna laban sa COVID-19 kahit ang mga hindi residente ng Mandaluyong, ayon sa Public Information Office ngayong Biyernes.

Ayon sa Mandaluyong City Public Information Office, kailangan lang magparehistro sa MANDAVAX ( www.mandaluyong.gov.ph/vaccine/ ) ang mga nais magpabakuna laban sa COVID-19 na hindi residente ng naturang lugar.

Pagkatapos magrehistro, makatatanggap ng tawag o text mula sa MANDAVAX Call Center kung saan, kailan at anong oras pupunta.

Paalala rin ng lokal na pamahalaan, huwag kalimutang magdala ng government o valid IDs.

Saad pa ng Mandaluyong PIO, “Strictly by APPOINTMENT, HINDI MAAARI ang WALK-IN.”

Nabakunahan sa Maynila, higit 1M na

ni Ronalyn Seminiano Reonico | July 19, 2021

Umabot na sa mahigit isang milyon ang naibakuna sa Manila simula nang mag-umpisa ang vaccination program laban sa COVID-19 noong Marso, ayon sa lokal na pamahalaan.

Ayon sa Manila Public Information Office, umabot na sa 1,000,021 ang naiturok na COVID-19 vaccines ngayong Lunes, alas-9:00 nang umaga.

Sa naturang bilang, 657,748 ang para sa first doses habang 342,273 naman ang para sa second doses.

Samantala, patuloy na nananawagan sa publiko si Manila City Mayor Francisco ‘Isko Moreno’ Domagoso na magpabakuna laban sa COVID-19.

Saad ni Mayor Isko, “Sama-sama tayo na makipaglaban at proteksiyunan ang bawat isa sa atin, bawat tao. Hindi lang dahil tayo ay taga-Maynila, kung hindi bawat mamamayan.

"Huwag tayong matatakot. Huwag tayong susuko. Huwag tayong mawawalan ng pag-asa. Mananalo tayo. Siguradong mananalo tayo.

“Magtulung-tulong tayo. Tayo rin ang magkikita sa finals. Isang bangka lang tayo, wala nang iba.”