Positibo sa COVID… Mayor Isko, 10 araw sa ospital, lumabas na

ni Lolet Abania | August 25, 2021

Nakalabas na si Manila Mayor Isko Moreno sa Sta. Ana Hospital ngayong Miyerkules matapos na magpositibo sa test sa COVID-19 noong Agosto 15.

“Nakalabas na ng Manila Infectious Disease Control Center ng Sta. Ana Hospital si Punong Lungsod Francisco ‘Isko Moreno’ Domagoso matapos gumaling mula sa sakit na COVID-19,” ayon sa Manila Public Information Office, kung saan namalagi sa Sta. Ana Hospital ang alkalde ng 10-araw. Sa isang Facebook post, nai-share ni Moreno ang kanyang mga photos habang papaalis na ng Manila Infectious Disease Control Center.

“Salamat po sa Diyos,” ani Moreno. Ayon kay Manila Public Information officer Julius Leonen, kahit kinokonsiderang nakarekober na si Moreno, kailangan pa rin niyang mag-isolate sa humigit-kumulang na tatlong araw.

“Eleventh day ngayon ng illness ni Mayor. Fifth day na na asymptomatic. Pero isolate muna siya for more or less three days. Tagged na siya as recovered,” sabi ni Leonen sa isang text message. Unang naiulat na ang alkalde ay nakaranas ng pag-uubo, sipon at pananakit ng katawan.

Nitong Agosto 20, sinabi naman ni Sta. Ana Hospital director Dr. Grace Padilla sa isang medical bulletin na si Moreno ay nawalan ng pang-amoy at panlasa. Gayunman, ayon kay Padilla si Moreno ay mayroon lamang mild COVID-19 symptoms.

9,737 bagong gumaling sa COVID-19

ni Lolet Abania | February 21, 2021

Umabot na sa 561,169 ang kabuuang bilang ng mga tinamaan ng COVID-19 sa bansa, ayon sa Department of Health (DOH).

Ito ay matapos na makapagtala ng 1,888 kaso ng coronavirus ngayong Linggo. May 20 naman ang nadagdag sa mga nasawi kaya umakyat na ang bilang na naitala sa 12,088.

Nakapagtala naman ang ahensiya ng 9,737 nakarekober kaya umabot sa 522,843 ang mga gumaling sa nasabing sakit.

Gayundin, mayroong naitalang 18 dagdag na bagong kaso ng B.1.1.7 variant. Dahil dito, umakyat na sa 62 ang kabuuang bilang ng tinamaan ng UK variant ng COVID-19 sa bansa.

117-anyos na madre, nakaligtas sa COVID-19

ni Lolet Abania | February 11, 2021

Isang 117-anyos na madre, na itinuturing na pinakamatandang babae sa Europe, ang nakarekober sa COVID-19 at magdiriwang ng kanyang kaarawan bukas, Huwebes.

Si Lucile Randon, na tinawag na Sister Andre nang sumali sa Catholic charitable order noong 1944, ay nagpositibo sa Coronavirus matapos na pumasok sa kanyang retirement home sa Toulon, Southern France noong January 16.

Isinailalim siya sa isolation subali't hindi nakitaan ng anumang sintomas ng virus. Sa isang interview ng BFM television ng France kay Sister Andre, sinabi niyang, "No, I wasn't scared because I wasn't scared to die... I'm happy to be with you, but I would wish to be somewhere else – join my big brother and my grandfather and my grandmother."

Ayon kay David Tavella, spokesman ng Sainte Catherine Labouré retirement home, nasa maayos nang kalagayan si Sister Andre.

"We consider her to be cured. She is very calm and she is looking forward to celebrating her 117th birthday on Thursday."

Sinabi pa ni Tavella na kahit bulag si Sister Andre ay punumpuno ito ng sigla. Ipagdiriwang nila ang kanyang kaarawan na dadaluhan lamang ng ilang residente ng retirement home dahil sa panganib ng Coronavirus.

"She has been very lucky," dagdag ni Tavella. Isinilang si Sister Andre noong February 11, 1904 at tinaguriang ikalawang pinakamatandang tao sa buong mundo na nabubuhay ayon sa Gerontology Research Group's (GRG) World Supercentenarian Rankings List., habang ang oldest person naman ay si Kane Tanaka ng Japan na 118-anyos noong January 2. Ayon pa sa GRG list, ang 20 pinakamatatandang tao sa buong mundo ay babae lahat.