Dingdong Dantes, pamilya tinamaan ng COVID-19

ni Lolet Abania | January 23, 2022

Inamin ni Dingdong Dantes na siya at ang kanyang pamilya ay nagpositibo sa test sa COVID-19. Sa kanyang Facebook ngayong Linggo, nai-share ng aktor ang isang video niya, habang dinidetalye ang mga struggles na hinarap sa loob ng nakalipas na dalawang linggo matapos na tamaan ng virus.

Ayon kay Dingdong, ngayon ay ika-10 araw na ng kanyang quarantine. Hindi man nabanggit ng aktor kung sinu-sinong miyembro ng kanilang household ang nagpositibo sa COVID-19, sinabi ni Dingdong na nagsimula ito nang halos lahat sila ay nakaranas ng lagnat at iba pang mga sintomas.

“Hanggang sa lahat kami dito sa bahay nilagnat na at nagkaroon ng sintomas kaya iniisip namin mukhang ‘eto na ‘yun, mukhang nasama na kami sa surge so nag-test kami at ‘yun na nga nag-positive kami sa COVID,” sabi ni Dingdong.

“Hindi namin alam kung saan at papaano kami nahawa pero mabuti na lang [ay] mild lang ang sintomas namin,” ani aktor na dagdag niya, sila ay nakatanggap na ng kanilang booster shots ilang linggo bago pa sila ma-infect ng virus.

Sinabi ni Dingdong na nahirapan sila nang husto sa paggawa at mga gawaing bahay gaya ng pagbili ng medisina at paghahanda ng pagkain dahil sa lahat sila ay tested positive. Gayunman aniya, labis ang pasasalamat nila sa mga tumulong sa kanila, kabilang na ang mga kaibigan at pamilya.

Binanggit naman ni Dong ang kanyang inang si Angeline na nagpapa-deliver para sa kanya at sa mga anak niya ng mga paborito nitong pagkain.

Ayon kay Dingdong, maayos na ang kanyang pakiramdam at nakatakda na ring bumalik sa trabaho sa Lunes. Paalala niya sa lahat na ang magpositibo sa test sa virus ay hindi dapat na ikahiya.

“Hindi po kasalanan o dapat ikahiya ang pagkakaroon ng COVID kasi kahit anong pag-iingat ang gawin, nandiyan pa rin ang panganib na makuha ito,” sabi ng aktor.

Bukod sa pagsunod sa mga safety protocols, ayon kay Dingdong dapat ding tumanggap ng extra protection mula sa available na mga vaccines at booster shots.

“’Yung pagsubok na ‘to na pinagdadaanan natin ng buong mundo, isang napakahirap na hamon para sa ating lahat pero malalampasan nating lahat ito kung tayo’y magtutulungan at patuloy na iisipin ang kapakanan ng bawat isa,” ani pa ni Dingdong.

300 empleyado ng DOH, may COVID-19

ni Lolet Abania | January 18, 2022

Nasa 300 empleyado ng Department of Health (DOH) ang nagpositibo sa test sa COVID-19 habang halos 400 naman ang sumasailalim sa quarantine, ayon sa isang opisyal ng ahensiya.

“Marami rin po infected, marami rin po naka-quarantine kaya ngayon po medyo mababa po ‘yung workforce namin. But we are still doing and continuing work,” ani DOH Undersecretary Maria Rosario Vergeire sa isang radio interview ngayong Martes.

Sinabi ni Vergeire na ang operasyon ng DOH ay hindi naman masyadong naapektuhan dahil bawat unit ng ahensiya ay may nakalaang skeletal workforce.

Gayunman, ayon sa kalihim, marami na sa mga personnel ng ahensiya ang nagsimula nang magbalik sa kanilang trabaho dahil sa bagong polisiya hinggil sa pagpapaiksi ng isolation at quarantine period para sa mga fully vaccinated healthcare workers na na-infect o na-expose sa COVID-19.

“But because of this new policy direction that we have, ‘yung shift, nakapagbawas na po kami and we are slowly nakakapag-return sa mga bilang ng mga tao sa bawat opisina,” sabi pa ng opisyal.

Una namang sinabi ni DOH Secretary Francisco Duque III na ang pagpapaiksi ng isolation ay discretionary lamang para sa mga medical frontliners matapos na maraming sektor ang nagpahayag ng pagtutol hinggil dito.

161 empleyado ng CSC, positive sa COVID-19

ni Lolet Abania | January 17, 2022

Humigit-kumulang sa 161 personnel ng Civil Service Commission (CSC) ang nagpositibo sa test sa COVID-19.

Sa Laging Handa public briefing ngayong Lunes, sinabi ni Commissioner Aileen Lizada na ang latest data ay nanggaling sa CSC central at regional offices.

“More or less, we have 161 positive po and awaiting ho kami doon sa ibang close contact or ‘yung naghihintay ng result ng swabbing so ‘yun ho ang aming minomonitor. Right now, we are 161 positive,” ani Lizada.

Ayon kay Lizada, dahil sa patuloy na pagtaas ng kaso ng COVID, tatalakayin nila sa CSC kung magpapatupad sila ng polisiya hinggil sa mandatory vaccination sa kanilang mga empleyado.

“Magkakaroon ho kami ng commission meeting twice ngayong week, if I’m not mistaken naka-agenda na po ‘yan so we are finalizing our policy on this one,” sabi ni Lizada.

Nagpahayag naman ng suporta si Lizada para sa mandatory testing ng mga empleyado ng gobyerno upan matiyak ang kaligtasan ng bawat personnel laban sa COVID-19 at para magarantiya ang mahusay serbisyo nito sa publiko.

Sinabi pa niya na ang COVID-19 testing ay walang bayad sa mga empleyado.

“Kukunin ho sa MOOE (maintenance and other operating expenses) ninyo so kung mayroon kayong teams, Team A, Team B, puwede ho kayong magtesting, let's say every two weeks kung kailan ho 'yung palitan ng next team natin,” saad ng opisyal.

“So let us be preventive and protective as well so at least assured kayo na lahat ho ng nandoon sa inyong bubble ay safe po at di tayo makakahawa sa ibang tao,” dagdag pa ni Lizada.