Dating deputy speaker na si Raneo Abu, positibo sa COVID-19

ni Ronalyn Seminiano Reonico | March 28, 2021

Nagpositibo sa COVID-19 si dating House of Representatives Deputy Speaker Raneo Abu, ayon sa kanyang Facebook post noong Sabado.

Ayon kay Abu, sumailalim siya at ang mga kasama niya sa opisina, pati ang kanyang pamilya sa RT-PCR test noong Huwebes, March 25.

Aniya, “Bilang pag-iingat sa banta ng COVID-19, ang aming buong opisina at ang aking buong pamilya ay sumailalim sa buwanang RT-PCR at nitong nagdaang March 25, muli kaming sumailalim sa aming regular na swab test matapos kong manggaling sa Kongreso kung saan ito ay huling araw bago mag-recess bilang paggunita sa Mahal na Araw.

“Kinabukasan ay lumabas ang resulta ng aking swab test at sa hindi inaasahang pagkakataon ay nagpositibo ako sa COVID-19.” Kasalukuyan nang naka-quarantine sa isolation facility si Abu alinsunod sa protocol ng Inter-Agency Task Force (IATF) at Department of Health (DOH).

Aniya pa, “Sa parehas namang araw ay agad akong nagtungo sa isang isolation facility upang magpagaling kahit ako ay asymptomatic. “Ito ay aking ginawa bilang pagtalima sa ipinatutupad na regulasyon ng IATF at ng DOH.”

Saad pa ni Abu, “Nagnegatibo naman sa parehong swab test ang aking anak na si Dra. Reina Abu.” Samantala, pumalo na sa kabuuang bilang na 712,442 ang naitalang COVID-19 cases sa bansa kung saan 581,161 ang bilang ng mga gumaling na at 13,159 ang mga pumanaw.

6,666 bagong kaso ng COVID-19

ni Lolet Abania | March 24, 2021

Umakyat na sa kabuuang bilang na 684,311 ang COVID-19 cases matapos na makapagtala ng 6,666 bagong kaso ngayong araw ng infections sa bansa, ayon sa Department of Health.

Mayroon namang 91,754 ang aktibong kaso o patuloy na ginagamot sa sakit.

Sa nasabing bilang ng mga aktibong kaso, 95.3 percent ang mild, 2.5 percent ang asymptomatic, 0.9 percent ang severe cases, at 0.8 percent ang nasa critical condition.

Nasa 1,072 naman ang mga nakarekober ngayong Marso 24 kaya umabot na sa kabuuang bilang na 579,518 ang mga gumaling. Mayroong 47 ang nadagdag na nasawi kaya may kabuuang bilang na 13,039 ang mga namatay dahil sa COVID-19 sa bansa.

Malabon Mayor Oreta, positibo sa COVID-19

ni Lolet Abania | March 23, 2021

Nagpositibo sa test sa COVID-19 si Malabon City Mayor Lenlen Oreta. Sa kanyang Facebook post, ayon kay Oreta, nagpa-swab test siya na bahagi ng isinasagawa para sa contact tracing ng lungsod at natanggap niya ang positive result ngayong Martes.

Gayunman, sinabi ng alkalde na siya ay asymptomatic kaya patuloy siyang magtatrabaho sa bahay.

Ayon pa kay Oreta, nagsasagawa na ng contact tracing sa lahat ng kanyang mga naging close contact o nakasalamuha. “This only shows na matindi pa rin ang epekto ng COVID-19 sa Malabon.

Matinding pag-iingat ang kailangan lalo na ang pagsunod sa mga health protocols,” ani Oreta.

“On behalf of the city, we would continue to ensure that we bring down the cases of COVID-19 in our city,” dagdag ni Oreta.