133 pulis, nagpositibo sa COVID-19

ni Lolet Abania | May 2, 2021

Isandaan at tatlumpu’t tatlong kapulisan ang nadagdag sa mga positibo sa COVID-19, kaya umabot na sa kabuuang bilang na 20,398 ang infected ng virus sa kanilang hanay.

Gayunman, sa isang Facebook post, iniulat ng Philippine National Police (PNP) na ang active cases sa ngayon ay 1,669 lamang.

Umakyat naman sa kabuuang bilang na 18,673 na PNP ang nakarekober sa COVID-19 matapos na 142 pulis ang gumaling sa virus.

Nananatili sa 56 ang mga naitalang nasawi sa pulisya dahil sa COVID-19.

73 Pinoy sa India na positibo sa COVID-19, bawal umuwi

ni Ronalyn Seminiano Reonico | May 2, 2021

Pauuwiin na ang mga Pinoy sa India na nais bumalik sa Pilipinas kapag muli nang binuksan ang mga commercial flights at kapag inalis na ang mga ipinatupad na travel ban, ayon sa ambassador sa New Delhi ngayong Linggo.

Una nang ipinagbawal ang pagdating sa bansa ng mga manggagaling sa India dahil sa paglobo ng kaso ng COVID-19 doon. Sa teleradyo interview kay Ambassador Ramon Bagatsing, Jr., aniya ay 73 na ang mga Pilipinong nagpositibo sa COVID-19 sa India.

Aniya, “Ang report na sa amin is 73… it is all over India. India is very, very huge… 73 po ang naka-record sa amin but most of them… sa aking balita, wala pa namang ganu’n kaseryoso maliban lang sa dalawang nasawi.” Ayon din kay Bagatsing, dahil sa mga ipinatupad na travel ban at walang direct flights mula sa India papuntang Pilipinas, hindi pa mapapauwi ang mga Pilipino.

Aniya, “No matter how much we want to come up with the repatriation flight, it’s extremely difficult. Logistically difficult dahil wala ngang flights na papapasukin. At ngayon, nag-order ang gobyerno natin na bawal ang India, we have to follow that. Bagama’t Filipino citizen ito, we have to follow that.” Hindi rin naman daw ganu’n karami ang mga Pinoy sa India na nais nang umuwi sa Pilipinas.

Saad ni Bagatsing, “Hindi pa naman ganu’n karami. Although, isang Pilipinong gustong umuwi, kinakailangang tulungan natin. But on the logistic side, we need at least 150 passengers to make it viable. "Sabi ni (Foreign Affairs) Secretary (Teodoro) Locsin, habang 'di pa puwede 'yan, siguro 'pag June or middle of the month, 'pag medyo okay na. But otherwise, we wait until the commercial flights to resume and then we can do that."

Samantala, noong Sabado, nakapagtala ang India ng highest record na mahigit sa 400,000 kaso ng COVID-19 sa isang araw lang. Sa kabuuang bilang, umabot na sa mahigit 19.5 million cases ang naitala sa India at higit 211,000 ang mga pumanaw.

Navotas Rep. Tiangco, positibo sa COVID-19

ni Lolet Abania | April 28, 2021

Nagpositibo sa test sa COVID-19 si Navotas City Representative John Rey Tiangco. Sa isang Facebook post, sinabi ni Tiangco na base ito sa isang antigen test na isinagawa sa kanya, subalit sasailalim pa rin siya sa RT-PCR test.

“Para po sa inyong kaalaman, base sa antigen test ko ngayong gabi (kagabi), ako ay nagpositibo sa COVID-19. Bukas po ay magpapa-RT-PCR test po ako,” ani Tiangco.

Agad na sumailalim sa isolation si Tiangco habang aniya, maayos naman ang kanyang pakiramdam. Matatandaang ngayong buwan, inanunsiyo ng Department of Health (DOH) na ang mga antigen test results ay isasama na sa official tally ng COVID-19 cases sa NCR Plus bilang bahagi ng programa ng gobyerno laban sa coronavirus.

Pinayuhan naman ni Tiangco ang lahat ng kanyang mga naging direct contact na sumailalim din sa test sa COVID-19. “Sa akin pong mga nakasalamuha, mainam po kung kayo ay magpa-swab test para na rin sa inyong kaligtasan.

Libre po ang RT-PCR swab test natin kaya makipag-ugnayan lamang po sa inyong barangay o health center,” sabi ni Tiangco.