Kasambahay ng senior citizen, babakunahan na rin — DOH

ni Lolet Abania | August 15, 2021

Pinag-iisipan ng Department of Health na isama sa priority sector ng pagbabakuna ng gobyerno kontra-COVID-19 ang mga kasambahay ng mga senior citizens kasabay ng patuloy na paghahanap ng mga awtoridad ng supply ng bakuna.

Ayon kay DOH Undersecretary Myrna Cabotaje, binubuo na nila ang mga guidelines para sa polisiya sa gitna ng pagdami ng bilang ng mga fully vaccinated na seniors sa buong bansa na umabot na sa 43% ang kabuuan.

“We are coming up with another strategy – ‘yung A2 (senior citizens) plus one. Ibig sabihin, senior citizen, dinala ng household member, pati ang household member, babakunahan,” sabi ni Cabotaje, chairwoman din ng National Vaccine Operations Center (NVOC).

Sinabi pa ni Cabotaje na posibleng isama sa pagbabakuna ang household member na nag-aalaga mismo sa senior citizen. Gayundin, ayon sa kalihim, ang mga nasa A3 o people with comorbidity members at kanilang caretakers ay maaari na ring mabakunahan. Samantala, hanggang nitong Agosto 12, nakapagtala na ang National Task Force against COVID-19 ng 12,282,006 Pilipino o 17.19% ng eligible target na populasyon ng bansa na nakakumpleto ng dalawang dose ng COVID-19 vaccines.

Ang mga eligible target population ay mga nasa edad 18 at pataas. Nasa 26,677,269 doses naman ng COVID-19 vaccines ang na-administer na mula sa 41,515,350 doses ng bakuna na na-secure ng pamahalaan mula sa iba’t ibang manufacturers.

7,103 bagong kaso ng COVID-19, pinakamataas na naitala

ni Ronalyn Seminiano Reonico | March 19, 2021

Pumalo na sa 648,066 ang kaso ng COVID-19 sa Pilipinas matapos maitala ang pinakamataas na karagdagang bilang na 7,103 sa loob lamang ng isang araw ngayong Biyernes mula nang tumama sa bansa ang coronavirus noong nakaraang taon.

Ayon sa Department of Health (DOH), sa tally ngayong Biyernes, hindi pa naisama ang datos mula sa 5 accredited laboratories dahil hindi nakapagsumite ang mga ito sa takdang oras.

Sa kabuuan ay umabot na sa 73,264 ang aktibong kaso kung saan 93.9% ang mild, 3.3% ang asymptomatic, 1.1% ang severe at 1% ang nasa kritikal na kondisyon.

Naitala rin ang 13 karagdagang bilang ng mga pumanaw at sa kabuuan ay umabot na ito sa 12,900.

Tumaas naman sa 390 ang bilang ng mga gumaling na at sa kabuuan ay 561,902 na.

Samantala, sa ngayon ay umabot na sa 241,000 ang bilang ng mga healthcare workers na nabakunahan at patuloy pa rin ang vaccination program ng pamahalaan.

P-Du30, inayunan na maliit na bagay lang ang virus… Roque: COVID-19, lilipas din!

ni Mary Gutierrez Almirañez | March 16, 2021

Dinepensahan ni Presidential Spokesperson Harry Roque ang naging pahayag ni Pangulong Rodrigo Duterte noong Lunes na “maliit na bagay” lang ang COVID-19.

Saad ni P-Duterte sa kanyang public address, “Kaya natin ito. Itong COVID-19. Maliit na bagay lang ito. Marami tayong nadaanan. Huwag kayong matakot, hindi ko kayo iwanan.”

Depensa ni Roque, "Ang sinasabi po ng Presidente ay patuloy naman pong ang Pilipinas ay nabubuhay sa kabila ng COVID-19.

"Ang sinasabi ng Presidente, temporary lang 'yan, hindi po iyan forever, lilipas po iyan. At pagdating po ng bakuna, magkakaroon tayo ng solusyon sa ating problema, magkakaroon po tayo ng new normal.

"Hindi po minamaliit ng Presidente ang ating paghihirap pero ang sinasabi po niya, babangon naman po tayo r'yan, we will heal as one."

Samantala, noong Lunes, naitala ang pinakamataas na record na 5,404 bagong kaso ng COVID-19. Ngayong araw naman ay nakapagtala ang bansa ng 4,000 panibagong kaso at sa kabuuan ay umabot na sa 626,893 ang cases ng COVID-19 sa bansa. Nasa 53,479 ang aktibong kaso at 12,837 naman ang bilang ng mga nasawi.