1,164 bagong kaso.. 11 dedo sa COVID

ni Madel Moratillo @News | September 27, 2023

Tumaas ng 13 porsyento ang naitalang kaso ng COVID-19 sa bansa nitong nakaraang linggo.

Sa datos ng Department of Health, may 1,164 bagong COVID cases ang naitala mula September 18 hanggang 24.

Ang average na arawang kaso ng virus ay nasa 166.

Sa mga bagong kaso na ito, ayon sa DOH, 10 ang severe o nasa kritikal na kondisyon.

May 11 ring nasawi nitong nakalipas na linggo. Sa nasabing bilang, 6 ang nasawi sa pagitan ng September 11 hanggang 24. Sa ngayon, nasa 2,905 ang aktibong kaso ng COVID sa bansa.

Sa kabuuan, umabot na sa 4.113 milyon ang naitalang kaso ng virus infection sa Pilipinas mula nang magsimula ang pandemya noong 2020. May 66,696 naman sa mga ito ang nasawi

COVID public health emergency sa 'Pinas, inalis na ni P-BBM

ni Mylene Alfonso @News | July 23, 2023

Pormal nang inalis ni Pangulong Ferdinand Marcos, Jr., ang State of Public Health Emergency sa buong Pilipinas na dulot ng COVID-19.

“All prior orders, memoranda, and issuances that are effective only during the State of Public Health Emergency shall be deemed withdrawn, revoked or canceled and shall no longer be in effect,” ayon sa Proclamation No. 297 na inilabas ng Presidential Communications Office (PCO).

Inihayag ni Marcos na ipinatupad ang muling pagbubukas ng international borders at pagluwag ng health at safety protocol requirements dahil sa patuloy na pagbabakuna at pagbaba ng bilang ng mga kaso ng COVID sa bansa.

Gayunman, mananatili pa rin aniya ang bisa ng lahat ng emergency use authorization (EUA) para sa COVID-19 vaccines na inisyu ng Food and Drug Administration (FDA) sa loob ng isang taon.

Kaugnay nito, umapela si Senador Christopher 'Bong' Go kay Pangulong Marcos na tiyaking maibibigay pa rin ang COVID allowances ng mga healthcare workers at death benefits ng mga nagbuwis ng buhay.

Ito ay sa kabila na nirerespeto ni Sen. Go, chairman ng Senate Committee on Health ang naging desisyon ni P-BBM na alisin na ang public health emergency sa bansa.

Nanawagan din ang senador sa publiko na patuloy pa ring mag-ingat at unahin ang kalusugan sa gitna na rin ng mga natutunan noong panahon ng pandemya.

Samantala, inihayag ni Sen. Jinggoy Ejercito Estrada na hindi ito dapat maging dahilan para manumbalik sa nakagawian at sa halip, dapat aniyang isaisip ng bawat isa ang

"new normal", na panatilihin ang pagiging maingat at responsable sa araw-araw na gawain.

'Arcturus' COVID variant, pasok na sa 'Pinas

ni Madel Moratillo | April 26, 2023

Nakapasok na rin sa bansa ang Omicron subvariant na XBB.1.16 na kumakalat na sa buong mundo.

Sa biosurveillance report ng Department of Health, ang natukoy na kaso ng XBB.1.16 o 'Arcturus' ay nakita sa Western Visayas.

Sinasabing ito ay recombinant ng dalawang lineage ng BA.2.

Sa ngayon, kabilang ito sa variant of interest ng World Health Organization.

Nabatid na kumalat na ito sa 33 bansa na karamihan ng kaso ay natukoy sa India.

Bagama't wala pa umanong ebidensya na magdudulot ito ng malalang COVID-19, mahigpit itong binabantayan dahil sa immune escape characteristics nito.

Maliban dito, may 84 iba pang Omicron subvariants ang natukoy sa bansa.

Kabilang dito ang 38 XBB, 28 na BA.2.3.20 at iba pang Omicron sublineages.