KyusiPass contact tracing app, required na sa QC

ni Mary Gutierrez Almirañez | March 8, 2021

Kailangan nang gamitin ng mga empleyado at konsumer ang KyusiPass contact tracing app tuwing pupunta sila sa mga establisimyento sa Quezon City.

Layunin nitong mapadali ang paghahanap sa mga naging close contact ng isang indibidwal na nagpositibo sa COVID-19, ayon sa pahayag ng pamahalaang lungsod noong Biyernes, ika-5 ng Marso.

Ayon kay Mayor Joy Belmonte, maaaring ma-access at makapagparehistro sa SafePass website, SafePass Facebook chatbot at text messages.

Aniya, “Digital copies of these logs should be readily available to the City Epidemiology and Disease Surveillance Unit (CESU) for any given time should contact tracing be necessary. We are very alarmed by the latest spike in cases and we will not allow this surge to continue. We do not want to experience the ordeal of having all our hospitals overwhelmed by patients, so we will employ all means to stop it.”

Dagdag pa niya, “For clarity, a lessee inside a larger establishment, like individual stores inside malls, should have its own contact tracing log.” Samantala, sa mga establisimyento namang gumagamit pa rin ng manual contract tracing form ay hinihikayat niyang pagamitin o pagdalahin ng kani-kanilang sariling panulat ang mga magsusulat sa form.

Kaugnay nito, ipinagbabawal pa rin sa lungsod ang pagbubukas ng mga indoor cinemas, video/interactive game arcades, theme parks/funfair, beerhouse, nightclubs, videoke/KTV bar, kids amusement center, daycare at playhouse.

Ipinaalala rin ng alkalde ang one seat apart sa mga pampublikong transportasyon at ang pagbabawal na maglamay sa bawat tahanan.

Sa ngayon ay mahigit 3,000 katao ng Barangay Disiplina Brigade Program ang lumahok sa Department of Public Order and Safety upang boluntaryong tumulong sa pagpapatupad ng mga ordinansang may kinalaman sa COVID-19.

Mga sinehan sa MM, bawal pa rin

ni Ronalyn Seminiano Reonico | March 7, 2021

Napagkasunduan ng mga Metro Manila mayors na ipagbawal pa rin ang operasyon ng mga sinehan at arcades dahil sa patuloy na pagdami ng kaso ng COVID-19 sa isinagawang pagpupulong noong Sabado, ayon kay Metropolitan Manila Development Authority (MMDA) Chairman Benhur Abalos.

Aniya, "Metro Manila Mayors will have one policy, one voice as far as Metro Manila is concerned. Movies, arcades, cinemas, will be suspended temporarily because of this upsurge.

“Importante talaga rito ay 'yung back to basic, it’s the minimum health protocols, ito ’yung face shield, mask, specially distancing and of course, ‘yung paghuhugas ng kamay. These 3 things could make a lot of difference, napakaimportante po nito.”

Ayon din kay Abalos, susuriin pa ng mga opisyal ng pamahalaang lokal ang sitwasyon kaugnay ng pagdami ng kaso ng COVID-19 sa rehiyon sa loob ng 3 hanggang 4 na linggo bago magdesisyon kung kailan muling papayagan ang operasyon ng mga naturang establisimyento.

Habang may COVID pa… Bagong pagbati — kamay sa dibdib, yuko at pipikit, aprub sa Kamara

ni Lolet Abania | January 20, 2021

Inaprubahan na sa ikatlo at huling pagdinig ng House of Representatives ang panukala ukol sa pagpapatupad ng ‘no-touch gesture’ upang maiwasan ang physical contact habang may pandemya ng COVID-19.

Sa bilang na 212 affirmative votes, isang negative vote at isang abstention, naaprubahan ng Kamara ang House Bill 8149 o ang panukalang "Bating Pilipino Para Sa Kalusugan Act," kung saan ang may-akda ay si Marikina City Representative Bayani Fernando.

Sa bagong pagbating gagawin, ang kanang kamay ay nakalagay sa gitna ng dibdib kasabay ng bahagyang pagyuko habang ang mga mata ay nakapikit o nakababa ang pagtingin.

Ang nasabing panukala ay dapat isagawa ng mga mamamayang Pilipino at lahat ng naninirahan sa Pilipinas.

Gayundin, sa ilalim ng panukala, ang lahat ng ahensiya ng gobyerno ay may mandatong magbigay at magpakalat ng impormasyon tungkol sa ‘no-touch gesture’ habang patuloy na isinasagawa ang ganitong bagong pagbati.