Unang kaso ng Omicron Subvariant FE.1, pasok sa 'Pinas

ni Madel Moratillo | June 20, 2023

Nakapagtala na rin ng unang kaso ng FE.1 subvariant ng Omicron sa bansa.

Ayon sa Department of Health, ang FE.1 ay sublineage ng XBB variant ng Omicron.

Kabilang din ito sa mga mino-monitor ng European Center for Disease Prevention and Control.

Ang FE.1 ay kalat na sa 35 bansa sa 6 na kontinente sa mundo.

Gayunman, ayon sa DOH, batay sa mga ebidensya, hindi pa naman ito nakitaan ng posibilidad na makapagdulot ng malalang sakit kumpara sa orihinal na variant ng Omicron.

Unang kaso ng BA.2.12 Omicron sa ‘Pinas, na-detect – DOH

ni Zel Fernandez | April 27, 2022

Inanunsiyo ng Department of Health (DOH) ngayong hapon ng Miyerkules ang pagkaka-detect sa unang kaso ng mas nakahahawang COVID-19 subvariant na BA.2.12 Omicron sa Baguio City.

Sa inilabas na pahayag, sinabi ng DOH na ang 52-anyos na babaeng pasyente na dumating sa Baguio City mula sa Finland ay fully vaccinated asymptomatic at hindi sumailalim sa routine isolation sa quarantine facility.

“The case then traveled to a university in Quezon City and then to Baguio City to conduct seminars. Nine days after her arrival in the country, she experienced mild symptoms such as headache and sore throat,” anang DOH.

Nang sumunod na araw ay nagpositibo umano sa COVID-19 ang dayuhan, at 9 na asymptomatic close contacts ang natukoy kabilang ang dalawang indibidwal na nagnegatibo naman sa virus.

Na-discharged naman ang pasyente matapos makumpleto ang kanyang pitong araw na isolation kasunod ng deklarasyong naka-recover na ito mula sa sakit at bumalik na sa Finland noong Abril 21.

Kasunod nito ay muling ipinaalala ng DOH na bagaman ang BA.2.12 ay hindi pa umano maikokonsidera bilang ‘variant of interest and concern’ o dapat ipangamba, mahalaga anilang patuloy na sundin ng publiko ang mga health and safety protocols na ipinaiiral ngayong may pandemya upang maiwasan ang paglaganap ng nakahahawang sakit.

Samantala, tiniyak nito na ang surveillance system ng kagawaran ay epektibo sa pag-detect ng mga bagong kaso at maging sa pagtukoy sa pinagmulan o kung saan kabilang ang virus.

Mas nakakahawang Brazilian variant ng COVID-19 sa Pinas, itinanggi ng DOH

ni Mary Gutierrez Almirañez | March 11, 2021

Kinumpirma ng Department of Health na hindi pa nakakapasok ang Brazilian variant ng COVID-19 sa bansa, taliwas sa unang pahayag ng Quezon City Epidemiology and Surveillance Unit kahapon, Marso 10.

Paglilinaw pa ni DOH Undersecretary Maria Rosario Vergeire, "Wala pa po tayong Brazilian variant. The Brazilian lineage must have been misinterpreted as a Brazilian variant."

Batay sa ulat, ang Brazil P.1 variants ang kinatatakutang variant ng COVID-19 sapagkat nagdudulot ito ng reinfection sa mga taong gumaling na mula sa virus at ito rin ang itinuturong dahilan sa pagkakaroon ng widespread infection ng COVID-19 sa Manaus, Brazil.

Gayunpaman, iginiit ng DOH na hindi dapat mangamba ang mga mamamayan dahil hindi iyon ang variant of concern na nakita sa Quezon City. Anila, "We would like to clarify that we have not detected the Brazilian variant of concern in the 3,420 samples we have sequenced as of this date. We would also like to clarify that a common variant identified among our sequenced samples was of Brazilian origin B.1.1.28 but not a variant of concern."

Kaagad namang binawi ng Quezon City Epidemiology and Surveillance Unit ang naging pahayag. Kaugnay nito, nilinaw ni Mayor Joy Belmonte na malaki ang kinalaman ng mga bagong variant sa paglobo ng COVID-19 sa Quezon City, kung saan 13 ang positibo sa U.K variant, habang apat naman sa South African variant at tinatayang mahigit 100 katao ang tinatamaan ng Coronavirus kada araw sa lungsod.

Aniya, “Malaki ang kinalaman ng presensiya ng mga variants na ito sa biglang pagkalat ng sakit na ito at 'yung mabilis na pagkahawa. 'Yun talaga for me is the sign that we are dealing with something that we have not dealt with before. Tingin ko, serious na po ang situation namin dito sa Quezon City. Medyo alarming na po. Medyo disturbing na po.”

Sa ngayon ay 12 na lugar sa 11 barangays ng Quezon City ang isinasailalim sa 14-day special concern lockdown kabilang ang mga sumusunod:

• Ilang lugar sa Durian Street, Barangay Pasong Tamo simula noong February 25;

• L. Pascual Street, Barangay Baesa simula noong February 26;

• De Los Santos Compound, Heavenly Drive, Barangay San Agustin simula noong March 1;

• No. 46 K-9th Street, Barangay West Kamias expanded hanggang No. 46-50, K-9th Street, Barangay West Kamias simula noong March 3 at 8;

• 49 & 51 E Rodriguez Sr. Ave., Barangay Doña Josefa simula noong March 4;

• Paul Street at Thaddeus Street, Jordan Park Homes Subdivision, Doña Carmen, Barangay Commonwealth simula noong March 4;

• No. 237 Apo Street, Barangay Maharlika simula noong March 4;

• No. 64 14th Avenue, Barangay Socorro simula noong March 6;

• No. 64-B Agno Extension, Barangay Tatalon simula noong March 7;

• No. 90 Gonzales Compound, Barangay Balon Bato simula noong March 8;

• No. 2A – 4 K-6th, Barangay West Kamias simula noong March 8; at

• Portion of Sitio 5, Jose Abad Santos, Barangay Sta. Lucia simula March 9.