Pfizer at AstraZeneca, epektib vs. Delta variant

ni Ronalyn Seminiano Reonico | July 22, 2021

Epektibo ang dalawang doses ng Pfizer o AstraZeneca laban sa COVID-19 Delta variant, ayon sa pag-aaral na inilathala sa New England Journal of Medicine.

Sa isinagawang pananaliksik, napag-alaman na ang dalawang doses ng Pfizer vaccine shots ay 88% effective laban sa Delta variant at 93.7% effective laban sa Alpha variant.

Ang dalawang doses naman ng AstraZeneca vaccine shots ay 67% effective laban sa Delta variant at 74.5% effective laban sa Alpha variant.

Nilinaw din sa pag-aaral na ang isang dose ng Pfizer vaccine shot ay 36% lamang ang efficacy habang ang AstraZeneca naman ay 30% effective laban sa Delta variant.

Saad pa ng Public Health England, "Only modest differences in vaccine effectiveness were noted with the Delta variant as compared with the Alpha variant after the receipt of two vaccine doses.

"Our finding of reduced effectiveness after the first dose would support efforts to maximize vaccine uptake with two doses among vulnerable groups in the context of circulation of the Delta variant.”

8 Pinoy, positibo sa Delta variant

ni Ronalyn Seminiano Reonico | July 20, 2021

Walong Pinoy ang nagpositibo sa COVID-19 Delta variant matapos sumailalim sa RT-PCR retesting, ayon sa Department of Health (DOH) ngayong Martes.

Ayon kay Health Undersecretary Maria Rosario Vergeire, asymptomatic ang mga ito at sa naturang bilang, 4 ang mula sa Cagayan de Oro, isa sa Manila, 1 sa Misamis Oriental, at dalawa ang returning overseas Filipinos.

Saad pa ni Vergeire, “Lahat sila ay walang sintomas. Sila ay mino-monitor ngayon hanggang matapos nila ang 14-day quarantine.”

Sa ngayon ay 35 na ang naitatalang kaso ng Delta variant sa bansa kung saan 3 ang naiulat na nasawi habang ang iba pa ay nakarekober na.

Ayaw pa ring palabasin... Mga bata, mas mabilis magkalat ng COVID — MMDA

ni Ronalyn Seminiano Reonico | July 20, 2021

Nais ng mga mayors ng Metro Manila at Metro Manila Development Authority (MMDA) na pagbawalan pa rin ang mga menor-de-edad na lumabas ng bahay dahil sa banta ng COVID-19 Delta variant.

Pahayag ni MMDA Chairman Benhur Abalos sa taped briefing noong Lunes, “Kami po ay nagbotohan kanina. Kami po… mga mayors, nag-usap-usap po kami at hinihiling po sana namin sa IATF [Inter-Agency Task Force] na baka maaari na iyong polisiya sa five-year-old pataas ay baka puwedeng isuspinde muna sa Metro Manila."

Matatandaang pinayagan na ang mga bata sa mga lugar na nasa ilalim ng general community quarantine at modified GCQ na lumabas ng bahay at magpunta sa mga open spaces na lugar katulad ng parke, playgrounds, outdoor tourist sites, outdoor non-contact sports courts, at al fresco dining basta kasama ang mga magulang o guardian.

Ayon kay Abalos, maaaring maging superspreader ng virus ang mga bata.

Saad naman ni Metro Manila Council (MMC) Chairman Parañaque Mayor Edwin Olivarez sa isang teleradyo interview, "Alam naman nating ito pong mga bata ang mga superspreaders, asymptomatic ‘yan. Pag-uwi sa bahay, yayakap sa kanilang lolo, nanay nila, napakahirap po noon.

"Tinitingnan pa ho natin ang ating preparedness para sa variant na ito, preparedness ng ating healthcare facilities.”

Samantala, sa ngayon ay mayroon nang naitalang 35 kaso ng Delta variant sa bansa kung saan 3 ang namatay.