OFW at construction worker sa QC, positibo sa Delta variant

ni Lolet Abania | July 26, 2021

Kinumpirma ng lokal na pamahalaan ng Quezon City ngayong Lunes ang isang kaso ng Delta variant ng COVID-19 sa lungsod na isang returning overseas Filipino worker.

Ayon sa Quezon City government, ang 34-anyos na lalaki mula sa Saudi Arabia na dumating sa bansa noong Hunyo 24 at nanatili sa isang hotel sa Makati City nang 10-araw para sa kanyang mandatory quarantine bago nai-transfer sa isang hotel sa Manila mula Hulyo 4 hanggang 11 ay nagpositibo sa Delta variant.

Sa isang pahayag ng lokal na pamahalaan, ang nasabing pasyente na nakarekober na noong Hulyo 11 ay symptomatic. “He experienced a slightly itchy throat on June 28 and was swabbed on June 30. He was considered recovered and was allowed to go home to his family on July 11,” batay sa statement ng Quezon City.

Gayunman, ang kanyang sequenced sample ay naipaalam lamang sa Epidemiology and Surveillance Disease Unit (CESU) ng Quezon City nu'ng Linggo nang gabi, kung saan agad na sumailalim sa swab test ang pasyente at kanyang pamilya ngayong Lunes. Isinailalim na rin ang pasyente at ang kanyang pamilya sa mahigpit na home quarantine para maiwasan ang tinatawag na chain of transmission.

“He will undergo another swab test, along with his family, as part of our protocol even if he is considered a recovered patient. We are doing extensive contact tracing on his close contacts just to make sure,” ani CESU head Dr. Rolly Cruz.

Tiniyak naman ni Mayor Joy Belmonte sa mga residente na nakapaghanda ang lokal na pamahalaan ng extensive measures upang maiwasan ang pagtaas ng COVID-19. “What is important is that we are intensifying testing and aggressive contact tracing,” ani Belmonte.

Samantala, nakikipag-ugnayan na rin ang Quezon City government sa isa pang local government unit (LGU) matapos na isang construction worker ang magpositibo rin sa Delta variant. Sa ulat, naninirahan ang pasyente sa ibang siyudad subalit nagtatrabaho sa isang factory sa Quezon City na tinamaan ng mas nakahahawang Delta variant.

Gayundin, ang buntis na asawa ng construction worker ay na-diagnose ng pagkakaroon ng severe respiratory ailment. “CESU has been conducting contact tracing and swabbing at his place of work since Saturday. There are no reported cases yet at his place of work but we are doing this as a preventive measure to make sure we contain any possible transmission early,” ani Cruz.

Sinabi pa ng QC government na ang construction worker ay nakaranas ng mahirap na paghinga, sipon, lagnat at sore throat noong Hulyo 4, habang kinabukasan ay nagpositibo ito.

Agad na na-admit ang pasyente sa Philippine General Hospital at na-discharge naman noong Hulyo 18. Ang kanyang asawa, kahit na walang naging sintomas, ay nagpositibo sa test noong Hulyo 8 at positibo uli noong Hulyo 17. Ang mag-asawa ay nananatili sa isang quarantine facility sa ibang siyudad hanggang sa katapusan ng Hulyo.

Dumalo sa birthday party… 5 positibo sa Covid

ni Ronalyn Seminiano Reonico | July 26, 2021

Nagpositibo sa COVID-19 Delta variant ang apat na katao matapos dumalo sa isang birthday party sa Cagayan de Oro.

Ayon sa ulat, mula sa trabaho sa Bukidnon, umuwi sa Cagayan de Oro ang isang indibidwal para dumalo sa birthday party noong June 18.

Ilang araw din umanong nanatili sa Cagayan de Oro ang naturang indibidwal at nakaranas ng mga sintomas ng COVID-19. Nang sumalang ito sa RT-PCR test, nakumpirmang positibo siya sa Coronavirus.

Lima sa mga bisita ang nagpositibo sa COVID-19 kung saan apat ang tinamaan ng Delta variant. Kaagad namang nagsagawa ng contact tracing ang health authorities at mino-monitor na ang mga nagpositibo.

Saad ni Dr. Rontgene Solante, infectious diseases expert, “Even if you are fully vaccinated, your vaccination will only protect you from getting the more severe COVID, but that will not also make you not vulnerable from not getting the infection.”

Samantala, sa ngayon ay mayroon nang naiulat na 119 kaso ng Delta variant sa bansa kung saan 12 ang active cases, 103 ang gumaling at 4 ang nasawi.

55 bagong kaso ng Delta variant COVID-19

ni Lolet Abania | July 25, 2021

Nasa 55 karagdagang kaso ng mas nakahahawang Delta variant ng COVID-19 ang na-detect sa bansa ngayong weekend, ayon sa Department of Health.

Sa datos na inilabas ng Philippine Genome Center, nakapagtala ang Pilipinas ng kabuuang 119 cases ng Delta variant nitong Sabado, Hulyo 24. Sa kabuuang bilang ng naturang variant, 12 ang active cases, 103 ang nakarekober habang apat na ang nasawi.

Ang Delta variant na unang na-detect sa India ay naiulat na mas mabilis makahawa kumpara sa orihinal na strain kaya muling nagpatupad ang pamahalaan ng mas mahigpit na quarantine restrictions tulad ng mahabang curfew hours.

Samantala, ayon sa DOH nakapagtala naman ng 94 karagdagang kaso ng Alpha variant na unang na-detect sa United Kingdom, kaya umabot na sa kabuuang 1,773 cases, kung saan 19 ang active cases; 1,636 ang nakarekober at 116 ang nasawi.

Sa Beta variant, na unang na-detect sa South Africa, mayrooong 179 bago kaso nitong Sabado na nasa kabuuang 2,019, kabilang dito ang 19 active cases; 1,926 ang gumaling at 72 ang namatay.

Mayroon namang 9 karagdagang kaso ng Theta o P.3 variant na unang na-detect sa Pilipinas, na may kabuuang 244, kabilang ang isang active case; 240 ang nakarekober at 3 ang nasawi. Nakapagtala naman ang DOH ngayong Linggo, Hulyo 25 ng 5,479 bagong kaso ng COVID-19, kaya pumalo na sa 1,548,755 kaso ng sakit, kabilang dito ang 54,262 active cases; 1,467,269 ang nakarekober habang 27,224 ang namatay.