Sequenced samples ng 574 biyahero, lahat Delta variant – PGC

ni Lolet Abania | December 12, 2021

Ipinahayag ng Philippine Genome Center (PGC) ngayong Linggo na lahat ng samples sequenced noong Nobyembre at Disyembre mula sa mga biyahero na galing sa mga bansang apektado ng Omicron variant ay lumabas na mga kaso ng Delta COVID-19 variant, bukod sa isa na nagkaroon ng B.1.1.203 variant.

“Last week, we sequenced about 574 and doon sa ating nai-sequence na ‘yon, puros naman ‘yon Delta. Tapos, gumawa rin tayo ng kung baga emergency run kasi may mga samples na nanggaling sa airport, at sa ating lumabas na sequencing, halos lahat naman doon Delta except na merong B.1.1.203,” sabi ni PGC Executive Director Dr. Cynthia Saloma sa isang radio interview.

Gayunman, nilinaw ni Saloma na ang B.1.1.203 variant ay hindi isang variant of concern o kaya variant of interest, maliban sa ito ay nagmula sa “B lineage.”

“’Pag sinabi natin kasi na lineage na hindi naman variant of concern, most likely hindi naman siya nagko-contain ng mutations na concerning,” paliwanag ng opisyal.

“It’s a B.1.1.203, but it’s not classified as either a variant of concern or variant of interest sa dahilan na hindi naman siya nagkakaroon ng mga mutations kung saan parang you would think na meron siyang changes in transmissibility, wala namang ganoon,” dagdag niya.

Nitong Sabado, sinabi ng Department of Health (DOH) na wala sa mahigit 250 travelers mula sa South Africa na dumating sa bansa noong Nobyembre 15 hanggang 29 na nagpositibo sa test sa Omicron variant.

Giit naman ng DOH na ang naturang biyahero ay na-detect na may B.1.1.203 COVID-19 variant na dumating sa Pilipinas noong Nobyembre 16 at lumabas ang kanyang test result noong Nobyembre 21.

Ayon pa kay Saloma, ang sequencing ng PGC ay hindi lamang nanggagaling sa mga airports kundi sa mga rehiyon na mayroong clusters ng infections na aniya, karamihan ay Delta variants.

Matatandaang noong Agosto 16, sinabi ni Saloma na nalagpasan o nahigitan na ng mas nakahahawang Delta variant ang iba pang variants na na-detect sa Pilipinas at kinokonsidera na ngayon bilang dominant variant sa bansa.

Gayunman, ayon kay Saloma, hindi pa ligtas na sabihin na ang ibang variants na nag-e-evolve matapos ang Delta variant ay less severe hangga’t walang sapat na clinical data.

“Kaya kailangan talaga nating pag-aralan nang mabuti. That’s why nakita natin, for example, itong Omicron with so many mutations in the spike region. Ito ang sinasabi nating ‘the most evolved SARS-CoV-2 virus today’ itong Omicron kasi mga 50 mutations,” sabi pa ni Saloma.

571 dagdag na Delta variant cases — DOH

ni Lolet Abania | December 6, 2021

Nakapagtala ang Department of Health (DOH) ng karagdagang 571 kaso ng mas nakahahawang Delta COVID-19 variant na umabot na sa kabuuang 7,848 cases.

Ayon kay DOH Undersecretary Maria Rosario Vergeire, mula ito sa pinakabagong na-sequenced sa 629 samples, kung saan isa ang nagpositibo sa test sa Beta variant habang isa rin ang positibo sa test sa Alpha variant.

Umabot naman sa kabuuang 3,630 Beta variant cases at 3,168 Alpha variant cases ang naitala sa bansa.

Batay sa datos ng DOH, lumabas na ang Delta variant ang nananatili pa rin sa tinatawag na most common lineage sa bansa mula sa mga sequenced samples ng 40.54%, kasunod ang Beta variant ng 18.75%, at Alpha variant ng 16.36%.

Sa ngayon, nakapag-sequenced na ang bansa ng kabuuang 19,305 samples na na-assigned na may lineage.

Samantala, sinabi ni Vergeire na wala pang na-detect na Omicron variant, isang variant of concern na mayroong 50 mutations habang ito ay may tinatayang 30 mutations in spike protein sa bansa.

“Out of all of those samples tested in this latest whole-genome sequencing run, wala pong na-detect na Omicron variant. Most of the detections were that of the Delta variant,” sabi ni Vergeire sa media briefing ngayong Lunes.

Negative sa swab test… 2-anyos sa Zambales, positibo sa Delta variant

ni Ronalyn Seminiano Reonico | August 28, 2021

Nakapagtala ang Zambales ng unang kaso ng COVID-19 Delta variant kung saan isang 2-anyos na batang babae ang tinamaan nito, ayon sa kumpirmasyon ni Zambales Gov. Hermogenes Ebdane, Jr..

Ayon kay Ebdane, asymptomatic ang bata at kasalukuyang nasa quarantine isolation kung saan kasama nito ang kanyang ina na nurse na nagpositibo rin sa COVID-19, pati ang ama nito na positive rin.

Paglilinaw naman ni Ebdane, ang bata lamang ang positibo sa Delta variant.

Aniya, noong Agosto 5 dinala sa Philippine Genome Center ang nakuhang specimen samples mula sa bata at noong Agosto 23 naman inilabas ang resulta nito kung saan lumabas na positibo siya sa Delta variant.

Saad pa ni Ebdane, “Pero ‘yung huling check naman before that ay negative na siya sa COVID-19. ‘Yun nga ‘yung problema. Kaya nu’ng natanggap 'yung resulta ng PGC, we decided to put them on additional restriction kaya hanggang ngayon, nandoon pa 'yung mag-aama sa quarantine center at nag-request kami na magpadala uli ng specimen sa genome center."

Saad pa ni Ebdane, “Ang problema rito kasi, nakita namin na while positive sa Delta, negative ang RT-PCR nila.”

Nagtataka rin umano ang mga awtoridad kung bakit ang bata lamang ang nagpositibo sa Delta variant, ayon kay Ebdane.

Nagpatupad na rin umano ng mahigpit na border control at nagsagawa na rin ng contact tracing upang mapigilan ang pagkalat ng Delta variant sa Zambales.

Saad pa ni Ebdane, "Nagpa-meeting kasama ang mga mayors at municipal health officers kahapon, ang napagkasunduan dito ay magkaroon ng granular lockdown.”

Aniya pa, “Ipapatupad natin ulit ang mahigpit na curfew bawat barangay para wala nang lalabas. We also discouraged the holding of birthdays, weddings, and other parties sa mga bayan-bayan."

Samantala, sa ngayon ay mayroong 892 aktibong kaso ng COVID-19 ang Zambales, ayon pa kay Ebdane.