3.6 M expired COVID-19 vax doses, papalitan ng COVAX nang libre – DOH

ni Lolet Abania | April 27, 2022

Nasa 3.6 milyon na mga expired COVID-19 vaccine doses ang nakatakdang palitan ng COVAX facility na walang karagdagang babayaran o additional cost, ayon kay Department of Health (DOH) Secretary Francisco Duque III.

Sa taped Talk to the People ni Pangulong Rodrigo Duterte na ipinalabas ngayong Miyerkules, sinabi ni Duque na nakausap na nila ang mga COVAX representatives at hiniling nila sa kanila na palitan hindi lamang ang mga donated vaccines na malapit nang mag-expire kundi pati na rin ang mga na-procured ng gobyerno.

“’Yung COVAX, meron po silang stockpile ng mga bakuna with longer shelf life. So ang gagawin, ‘yung mga nag-expire na sa atin, umabot na ng mga about 3.6 million doses, which is just about 1.46% of our total inventory ng bakuna. So, yes sir, papalitan po ‘yan. Ire-replace ng COVAX facility,” report ni Duque kay P-Duterte.

Ang nasabing 1.46% vaccine wastage ay mas mababa kumpara sa 10% indicative wastage rate na ginamit ng World Health Organization (WHO).

Ang COVAX ay isang global vaccine-sharing program na inilunsad noong 2020 para matiyak na ang mga COVID-19 vaccines ay makakaabot sa mahihirap na mga bansa.

Sa parte naman ni Pangulong Duterte, masaya niyang tinanggap ang pagpapalit ng mga expired COVID-19 vaccines, kung saan gagawin ito ng COVAX nang libre.

“That’s nice of them to do that,” ani Pangulo. “That’s a distinct humanitarian sentiment.”

Nitong Lunes, ayon sa DOH, mahigit sa 67.4 milyong indibidwal o 74.98% ng target population ng gobyerno ang fully vaccinated na laban sa COVID-19.

3.2 M doses ng J&J COVID-19 vaccines, pang-senior citizens at maysakit lang

ni Lolet Abania | July 12, 2021

Nasa 3.2 milyong doses ng Johnson and Johnson (J&J) COVID-19 vaccines ang nakatakdang ideliber sa bansa sa July 19, 2021.

Ayon kay Department of Health (DOH) Undersecretary Myrna Cabotaje, ang 3.2 milyong J&J vaccine doses ay donasyon mula sa gobyerno ng United States sa pamamagitan ng global aid COVAX Facility na gagamitin para sa mga senior citizens at persons with comorbidities.

“The directive from [vaccine czar] Secretary [Carlito] Galvez is to use the J&J largely on senior citizens since that will be very convenient for senior citizens and those residing in far flung areas,” ani Cabotaje sa Laging Handa forum ngayong Lunes.

Hindi tulad ng ibang brands, ang J&J vaccine ay isang single-dose vaccine lamang. Aniya pa, sakaling mai-deliver, ito ang kauna-unahang J&J shipment na darating sa Pilipinas.

Samantala, sinabi ni Cabotaje na ang mahigit sa 3 milyon ng two-dose AstraZeneca COVID-19 vaccine na dumating sa bansa noong nakaraang linggo, kung saan ang 1 milyong doses ay donasyon ng Japan, ay nakalaan sa NCR Plus 8, 1.5 milyong doses naman para sa second dose ng mga indibidwal at ang natitirang 500,000 doses ay ibibigay sa iba pang lugar sa buong bansa.

Gayundin, ayon sa kalihim, nagbigay ng direktiba si Chief Implementer at Vaccine Czar Secretary Carlito Galvez, Jr. na ang COVID-19 vaccines ay dapat nang ipamahagi sa Basilan, Sulu at Tawi-Tawi provinces, na may malalayong borders at sa gitna ng pagtaas ng bilang ng kaso ng transmissible na Delta variant sa kalapit na bansang Malaysia at Indonesia.

Ipinahayag din ni Cabotaje na umabot na sa 13 milyong indibidwal ang nabakunahan, habang 3.52 milyon naman ang mga fully vaccinated.

Japan, nag-donate ng AstraZeneca vaccines sa ‘Pinas

ni Lolet Abania | June 15, 2021

Magbibigay ang gobyerno ng Japan ng donasyong AstraZeneca COVID-19 vaccines sa Pilipinas, ayon kay Japanese Ambassador to the Philippines Kazuhiko Koshikawa ngayong Martes.

“Glad to be the bearer of good news today! Japan will donate AstraZeneca vaccines to the Philippines, and we’ll make sure to deliver them at the soonest possible time so no one gets left behind during this pandemic,” ani Koshikawa sa kanyang Twitter.

Una nang inianunsiyo ni Department of Finance (DOF) Secretary Carlos Dominguez III, ang tungkol dito sa isang pagdinig sa Senate of the Whole kung saan tinatalakay ang paggamit ng gobyerno ng P82.5-bilyong budget para sa vaccination program.

“Japan Foreign Minister Toshimitsu Motegi just announced this morning the donation of Japan-made AstraZeneca vaccines to some countries, including the Philippines,” ani Dominguez.

“We have not yet been officially informed of the number of doses that are going to be donated by Japan,” dagdag ni Dominguez.

Sinabi rin ni Dominguez na maraming mayayamang bansa ang pumayag sa kasunduan na mag-donate ng 1 bilyong doses ng COVID-19 vaccine sa World Health Organization-led COVAX Facility.

“The decision taken during the G7 summit this weekend, for the rich countries to donate a billion doses to COVAX could significantly increase our allocation,” sabi pa ng kalihim.

Ayon naman kay Vaccine Czar Secretary Carlito Galvez, Jr., nakatanggap na ang Pilipinas ng kabuuang 8,329,050 COVID-19 doses mula noong Pebrero hanggang Mayo.

Nitong Hunyo, ang target naman ng gobyerno para sa mga COVID-19 vaccine deliveries ay umabot ng 10,804,820.

Samantala, tinatayang 11.670 milyong COVID-19 vaccines ang inaasahang dumating sa bansa sa July.

Ayon pa kay Galvez, inaasahan naman ng pamahalaan na makakamit natin ang target na herd immunity sa National Capital Region (NCR) at kalapit-probinsiya sa Nobyembre.

Nais din ng gobyerno na mabakunahan ang nasa 70 porsiyentong populasyon ng mga Pilipino upang makamit ang herd immunity bago matapos ang 2021.

Sa ngayon, patuloy ang pagbabakuna ng gobyerno sa mga medical frontliners, senior citizens, persons with comorbidities, habang sinimulan naman ang mga economic frontliners.