2.2 M doses ng Pfizer COVID-19 vaccine, dumating na sa ‘Pinas

ni Ronalyn Seminiano Reonico | June 11, 2021

Dumating na ang karagdagang 2.2 milyong doses ng Pfizer COVID-19 vaccine mula sa COVAX Facility sa Ninoy Aquino International Airport (NAIA) noong Huwebes nang gabi.

Ilalaan umano ang kalahati ng doses ng bakuna sa National Capital Region (NCR) at ang kalahati pa ay ipamamahagi sa Davao at Cebu.

Si Vaccine Czar Secretary Carlito Galvez Jr. at iba pang opisyal ng Department of Health (DOH) ang sumalubong sa pagdating ng naturang bakuna.

Samantala, noong Mayo 10 dumating ang unang 193,050 doses ng Pfizer COVID-19 vaccine sa bansa kaya ito na ang ikalawang shipment nito sa Pilipinas.

2.2 M doses ng Pfizer, sa June 11 pa ang dating

ni Lolet Abania | June 1, 2021

Darating na ang karagdagang 2.2 milyong doses ng Pfizer-BioNTech COVID-19 vaccine sa bansa sa Hunyo 11, ayon kay Vaccine Czar Secretary Carlito Galvez, Jr..

“At ngayon, June 11 ay ia-announce ko na po na ‘yung 2.2 million ay darating po dito ngayon sa ating bansa,” ani Galvez sa Palace briefing ngayong Martes.

“At ito po ay… diretso na po sa mga bayan natin sa Cebu, sa Davao, at saka dito sa Metro Manila,” dagdag niya.

Matatandaang sinabi ni Galvez na ang mga doses ay nakatakdang dumating bago matapos ang Mayo.

Sa ngayon, ayon kay Galvez, ang Pilipinas ay may matatag nang supply ng bakuna mula sa COVAX Facility, kung saan mahigit sa dalawang milyong doses kada buwan ang kanilang ibibigay.

“‘Yung vaccine supply natin will be stabilized on the month of July, lalo na ‘yung AstraZeneca, Moderna, Sinovac, at saka Sputnik,” sabi ng vaccine czar.

Kahapon, nabanggit ng Malacañang, tinatayang 3.4 milyong doses ng COVID-19 vaccines ang inaasahang i-deliver sa Pilipinas ngayong Hunyo.

Samantala, nitong Mayo 30, umabot na sa 1.2 milyong indibidwal ang fully vaccinated kontra-COVID-19.

2.2 M Pfizer COVID-19 vaccines, diretso sa Cebu at Davao

ni Mary Gutierrez Almirañez | May 13, 2021

Darating na sa katapusan ng Mayo ang karagdagang 2.2 million doses ng Pfizer-BioNTech COVID-19 vaccine mula sa COVAX facility, ayon sa kumpirmasyon ni Vaccine Czar Secretary Carlito Galvez, Jr. ngayong umaga, Mayo 13.

Aniya, “‘Yung next na delivery ng ating Pfizer, more or less 2.2 million doses, I was informed yesterday, is before the end of the month.”

Dagdag pa niya, “Meron kaming arrangement with UNICEF na diretso na kaagad sa Davao, diretso na kaagad sa Cebu, diretso na sa mga areas na paglalagakan natin ng Pfizer para wala po tayong double handling.”

Matatandaan namang dumating kamakailan ang initial 193,050 doses ng Pfizer na ngayon ay sinimulan na ring iturok sa Metro Manila.