Bahay-bahay na libreng pagkain, aprub

ni Mary Gutierrez Almirañez | April 26, 2021

Pinaboran ng Philippine National Police (PNP) ang rekomendasyon na gawing bahay-bahay na lamang ang pamimigay ng mga donasyong pagkain katulad nu’ng nakasanayan, sa halip na lumabas papuntang community pantry, batay kay PNP Spokesman Brigadier General Ronaldo Olay.

Aniya, "Maganda rin ‘yung suggestion na ‘yan na ibahay-bahay na lang para hindi na maglabasan ang mga tao sa daan."

Sang-ayon din siya sa rekomendasyong mga kamag-anak na lamang ang pakukuhanin ng donasyon para hindi na ma-expose sa COVID-19 ang mga vulnerable na indibidwal, partikular na ang mga senior citizen, lalo pa’t nasa ilalim pa rin ng modified enhanced community quarantine (MECQ) ang NCR Plus.

Sabi pa niya, "Tama 'yan, nasa MECQ pa rin tayo at batay sa panuntunan ng IATF, ang mga 18 years old o mas bata, 65 years old o mas matanda, hindi muna lalabas sa tahanan."

Sa ngayon ay naglabas na ng guidelines ang Quezon City para sa mga nais mag-organisa ng community pantry na sinuportahan naman ni Department of the Interior and Local Government (DILG) Secretary Eduardo Año.

Ayon kay Año, “It's the organizer's responsibility to impose the minimum health standards. That's the primary reason why they have to coordinate with the LGU’s (local government units) so that the latter can provide assistance.”

Kaugnay ito sa pinaiimbestigahan ng DILG sa PNP, hinggil sa pagkamatay ng isang senior citizen na pumila sa community pantry ng aktres na si Angel Locsin.

“Since somebody died, the PNP has to conduct an investigation. We cannot ascertain yet who could be liable until the completion of the investigation,” sabi pa ni Año.

'Di raw nagpaalam para sa community pantry... Angel, inilaglag ni Mayor Belmonte

ni Lolet Abania | April 24, 2021

Hindi umano inabisuhan ng aktres na si Angel Locsin ang lokal na pamahalaan ng Quezon City sa pagsasagawa nito ng community pantry na naging dahilan umano ng pagkamatay ng isang lolo.

Sa isang pahayag kay QC Mayor Joy Belmonte, binanggit nitong maaaring naiwasan ang insidente kung nagsabi lamang ang aktres tungkol sa gagawing community pantry.

Labis na ikinalungkot ng alkalde ang nangyari kasabay ng paalala nito sa lahat ng pantry organizers na dapat makipag-ugnayan sa mga lokal na opisyal para matulungan at maserbisyuhan sila nang maayos.

Gayunman, ayon kay Belmonte, patuloy pa rin ang suporta ng lungsod sa mga itinatayong community pantries subali't dapat na makiisa sa mga hakbang at may koordinasyon sa barangay at LGU ang lahat ng organizers nito para hindi na maulit pa ang insidente.

Matatandaang namatay ang isang senior citizen na si Rolando dela Cruz. Hinimatay ito habang nakapila sa community pantry ni Locsin sa Holy Spirit Drive sa Bgy. Holy Spirit, Quezon City at kalaunan ay idineklarang dead-on-arrival sa ospital.

Nagpaabot naman ng pakikiramay ang aktres sa pamilya ng 67-anyos na balut vendor. Sinabi ni Locsin na habambuhay siyang hihingi ng kapatawaran sa naiwang pamilya ni Mang Rolando. Nakahanda namang tulungan ng lokal na pamahalaan ng Quezon City ang pamilya ng biktima.

Ipinahayag ni Belmonte na sasagutin nila ang mga gagastusin sa burol habang magbibigay ng tulong-pinansiyal sa pamilya nito.

Angel Locsin, todo-sorry sa pamilya ng senior na namatay sa community pantry

ni Ronalyn Seminiano Reonico | April 23, 2021

Kinumpirma ni Angel Locsin ang balitang may namatay na senior citizen habang nakapila sa binuksan niyang community pantry sa Quezon City ngayong Biyernes at humingi rin ng paumanhin ang aktres sa insidente.

Post ni Angel sa kanyang Instagram account, “Sa tingin ko, tama lang po na sa akin ninyo na marinig na totoo po ang balita na may inatake at namatay habang nasa pila ng community pantry. Senior citizen po siya na pumila raw po nang 3 AM at may nakainitan sa pila.”

Kinilala ng station commander ng Holy Spirit Police Station na si Lt. Jeffrey Bilaro ang naturang senior citizen na si Rolando dela Cruz, 67-anyos at residente rin ng naturang barangay.

Hindi pa malinaw ang sanhi ng pagkamatay ni Dela Cruz.

Ayon naman kay Angel, pinuntahan niya sa ospital ang pamilya ni Dela Cruz at personal siyang humingi ng tawad sa nangyari.

Aniya pa, “Bago po ang lahat, humihingi po ako ng tawad sa pamilya. Kanina po, pinuntahan at nakapag-usap po kami nang personal ng mga anak n’ya sa ospital.

“Habang buhay po akong hihingi ng patawad sa kanila.”

Ayon kay Angel, masipag na ama si Dela Cruz at nagtitinda ng balut. Saad pa ng aktres, “Si tatay po ay isang masipag na ama na nagtitinda ng balut. Hindi ko man po siya nakilala, pero sa pagkakakilala ko sa mga anak niya ay mabuti po siyang ama at maayos niyang napalaki ang mga anak niya.”

Dahil sa dami ng mga senior citizens na nagpunta sa community pantry ng aktres ay nagtayo sila ng fast lane na tent na may mga upuan.

Aniya pa, “Pero hindi naman po ibig sabihin na ini-encourage po namin ang mga seniors na lumabas at alam po natin na bawal po according sa IATF rules.”

Hindi nilinaw ni Angel kung muli pa bang bubuksan ang kanyang community pantry ngunit aniya, “Pagkatapos po, ido-donate na lang po namin ang mga natitirang goods sa ibang community pantries at barangay.

“Ang nangyari po ay akin pong pagkakamali. Sana po’y ‘wag madamay ang ibang community pantries na maganda po ang nangyari.”

Ayon din kay Angel ay tutulungan niya ang pamilya ni Dela Cruz. Saad pa ng aktres, “Sa ngayon po, I will prioritize helping the family and I will make it my responsibility to help them get through this.

“I am very, very sorry."