Sa lahat ng degree programs.. Limited face-to-face, puwede na — CHED

ni Lolet Abania | November 5, 2021

Ipinahayag ni Commission on Higher Education (CHED) chairperson Prospero de Vera III ngayong Biyernes na ang mga unibersidad at kolehiyo ay maaari ng payagang magsagawa ng limited face-to-face classes sa lahat ng degree programs subalit magtatakda sila ng mga kondisyon.

Sa isang vaccination event sa Palawan, sinabi ni De Vera na tinalakay na ito ng komisyon at ng Inter-Agency Task Force for the Management of Emerging Infectious Diseases (IATF) nito lamang linggo. “It is already Category [Alert Level] 2, we will allow now limited face-to-face up to 50% capacity in all degree programs in these areas,” sabi ni De Vera.

Ayon kay De Vera, kabilang sa mga kondisyon na kanilang ipapatupad, dapat na ang mga eskuwelahan ay may mataas na vaccination rate ng mga estudyante at ng kanilang faculty at kinakailangan ding mayroong retrofitted facilities na ininspeksiyon ng mga awtoridad.

Sinabi rin ni De Vera na ang pagpapatupad ng limited face-to-face classes ay kailangang may consent mula sa sakop na local government units (LGUs). Aniya, posible itong mangyari sa Metro Manila dahil sa ang vaccination rate sa naturang rehiyon ay mataas na.

Samantala, inanunsiyo ng Malacañang nitong Huwebes ng gabi na ang IATF, ang policy-making body ng gobyerno na nakatuon sa COVID-19 pandemic ay inaprubahan na ang pagbaba sa Alert Level 2 ng Metro Manila simula ngayong Biyernes, Nobyembre 5, 2021.

Pagtanggal sa bar exams, pinalagan ni CJ Gesmundo

ni Lolet Abania | July 8, 2021

Hindi sang-ayon si Chief Justice Alexander Gesmundo sa naging panukala ni Department of Labor Secretary Silvestre Bello III hinggil sa pag-abolish ng bar exams at iba pang katulad nito.

“I don’t see the need to abolish the bar exam. We must continue having the bar exam,” ani Gesmundo sa isang interview ngayong Huwebes.

“I respect the view of Secretary Bello but as far as the practice of law, I think we should maintain the bar examinations so that we can sift those who are competent, considering the nature of the legal profession… The legal profession is vested with public interest,” paliwanag ng chief justice.

Giit ni Gesmundo, kinakailangang masiguro na iyon lamang may kakayahan ang papayagang makapasok sa legal profession at maisagawa ang kanilang tungkulin.

“Aside from the tradition, it is important that we make sure that those who join the legal profession are competent, that they can perform their duties as lawyers, not only to the court but also to their clients and to society as a whole,” sabi ni Gesmundo.

“So the qualifying exam for legal professionals should be therein continued,” diin pa niya.

Ayon kay Gesmundo, ang legal na basehan hinggil sa pagkuha ng mandatory bar exams para sa mga nagnanais na maging abogado ay nakapaloob sa Rules of Court.

Nitong Miyerkules, iminungkahi ni Bello na alisin na ang licensure exams para sa mga nurse, bar exams sa mga lawyers at iba pa dahil aniya sa mataas na gastusin sa pag-aaral at nadaragdagan pa ng pagkuha ng board exams.

Ipinunto rin ni Bello na basta ang isang estudyante ay graduate mula sa isang institusyon na accredited ng Commission on Higher Education (CHED), hindi na kailangan pang kumuha ng licensure exams.

Pinalagan din ng Philippine Nurses Association (PNA) ang panukalang ito ni Bello.

Face-to-face classes, ‘di na babalik — CHED

ni Mary Gutierrez Almirañez | May 26, 2021

Kinumpirma ng Commission on Higher Education (CHED) na hindi na makababalik sa traditional face-to-face classes ang lahat ng unibersidad at kolehiyo sa ‘Pinas, sapagkat na-adopt na ng institusyon ang sistema ng flexible learning, batay sa pahayag ni CHED Chairman Prospero de Vera.

Aniya, "From now on, flexible learning will be the norm. There is no going back to the traditional, full-packed face-to-face classrooms. The commission has adopted a policy that flexible learning will continue in School Year 2021 and thereafter."

Dagdag pa niya, “What will happen is a flexible system where universities will mix and match flexible learning methods appropriate to their situation.”

Paraan din aniya iyon upang mapaghandaan ang iba pang posibilidad na pandemyang susubok sa sistema ng edukasyon.

Sabi pa niya patungkol sa pagbabalik-eskuwela, “It also would have wasted all the investments in technology, in teacher training, in the retrofitting of our facilities… Old paradigm of face-to-face versus online will now disappear.”

Sa ngayon ay patapos na ang School Year 2020-2021, kung saan patuloy pa ring nag-a-adjust ang mga guro at estudyante sa sistema ng flexible learning, online classes at modular method.