Sa yearend na — Comelec.. Pinal na listahan ng mga kandidato sa 2022 elections

ni Lolet Abania | December 14, 2021

Asahan na ang pinal na listahan ng mga kandidato para sa 2022 elections ay ilalabas bago matapos ngayong buwan, ayon sa Commission on Elections (Comelec) ngayong Martes.

Sinabi ni Comelec spokesperson James Jimenez na ang mga unresolved nuisance cases ang rason para sa bagong timeline.

Una nang inanunsiyo ni Jimenez na ang final list ng mga kandidato ay kanilang ilalabas sa Disyembre 15.

“The list of official candidates will not be released tomorrow as there are still a number of unresolved nuisance cases,” ani Jimenez.

“We expect that the process of finalizing the list of candidates will take at least two more weeks,” dagdag niya. Ngayong Martes, natapos na rin ng Comelec ang raffle hinggil sa order ng 166 party-list groups sa mga ballot.

Samantala, ngayon ding Martes umatras na sina Pangulong Rodrigo Duterte at Senador Christopher "Bong" Go sa kanilang kandidatura sa pagka-senador at pagka-presidente para sa 2022 elections.

Gayunman, hindi sinagot ni Jimenez ang kuwestiyon kung ang withdrawal nina Pangulong Duterte at Go ay nakapekto sa timeline ng paglalabas ng final list ng mga kandidato ng Comelec.

Mula 6AM-7PM.. Oras ng pagboto sa 2022 elections, extended — Comelec

ni Lolet Abania | November 10, 2021

Inianunsiyo ng Commission on Elections (Comelec) ngayong Miyerkules na ang oras ng pagboto para sa Mayo 9, 2022 national at local elections ay mula alas-6:00 ng umaga hanggang alas-7:00 ng gabi o pinahaba ng isang oras kumpara sa itinagal nito noong 2019 midterm polls.

Sa ginanap na pagdinig sa House Committee on Suffrage and Electoral Reforms ngayong Miyerkules, sinabi ni Comelec commissioner Marlon Casquejo sa mga mambabatas na inaprubahan na ng en banc ang resolusyon hinggil sa itatakdang voting hours.

“Just this morning the en banc already approved general instructions for the Electoral Board... Voting hours start 6 in the morning and end at 7 [p.m.],” ani Casquejo.

Ang mga botante na ayon sa opisyal, “within 30 meters” sa labas ng mga polling precincts na umabot sa closing time ay kanila pa ring pagbibigyang makaboto.

“However, at 7 there’s still voters outside the polling place in front, 30 meters, we will still continue w/ the voting... We do not expect it will end at 7 but we will continue until such time... [that voters within] 30 meters in front will be catered,” sabi pa ni Casquejo.

Kung ikukumpara, ang naging voting hours sa panahon ng eleksyon bago pa ang pandemya ng COVID-19, 2019 midterm polls -- 6AM-6PM; 2016 national at local polls – 6AM-5PM.

Matatandaang sinabi na rin ng mga Comelec officials na “tiyak” na extended ang voting hours sa Mayo 9, 2022, kung saan hindi nila sinang-ayunan ang panukalang magkaroon ng isang multi-day election sa gitna ng COVID-19 pandemic.

P100K panukalang multa vs. nuisance candidates, kinatigan ng Comelec

ni Lolet Abania | October 27, 2021

Nagpahayag ng suporta ang isang opisyal ng Commission on Elections (Comelec) hinggil sa lehislatibong panukala na magpapataw ng P100,000 multa laban sa mga political aspirants na idineklara bilang nuisance candidates.

Iminungkahi naman ng poll official ang tinatawag na automatic disqualification laban sa mga naideklarang nuisance candidates ng two consecutive polls o dalawang magkasunod na eleksyon sa anumang posisyon.

Sa ginanap na Senate electoral reforms committee hearing, sinuportahan ni Comelec Law Department Director Maria Norina Tangaro-Casingal ang House Bill 9557 na layong mapatawan ng stiffer penalties o mabigat na parusa sa mga nuisance candidates.

“We support the imposition of the fine of P100,000,” wika ni Casingal, na aniya ang Omnibus Election Code ay hindi nagpapataw ng multa laban sa mga idineklara bilang nuisance candidates.

“We also would like to propose that those who have been declared as nuisance candidates be disqualified from running for two successive elections,” saad ni Casingal sa mga senador.

Si Senador Imee Marcos, ang chairperson ng naturang Senate panel, ay sang-ayon naman sa panukalang ito ng Comelec , aniya, “This is a good idea.”

Nilinaw naman ni Casingal na iyong mga naideklarang nuisance candidates ay hindi maaaring maghain ng substitution para sa ibang kandidato.

“They can no longer substitute also, your honors, if they have been declared as a nuisance candidate for two successive elections, for any elective position. That’s our proposal,” sabi pa ni Casingal.

Ayon sa Comelec, umabot sa 251 filers ng certificate of candidacies (COCs) para sa pangulo, bise presidente, at senador, na idineklara bilang nuisance candidates sa panahon ng 2016 national at local elections.

Noong 2019, mayroon namang 84 idineklarang nuisance candidates para sa senatorial position lamang.

Ang HB 9557 ay layong magbigay ng episyenteng pamamaraan sa pagdedeklara ng isang nuisance candidate at pagpapataw ng mabigat na parusa sa nuisance candidate, at sinumang naging dahilan para maghain ng COC ang naturang kandidato sa pamamagitan ng pag-amend ng Omnibus Election Code.

Noong Agosto 2021, ang House of Representatives ay inaprubahan ang HB 9557 sa ikatlo at pinal na pagbasa.