Kahit walang 'vote for' — Comelec.. Campaign poster, post online, bawal

ni Madel Moratillo @News | August 29, 2023

Pinaalalahanan ni Commission on Election (Comelec) Chairman George Garcia ang mga maghahain ng certificate of candidacy (COC) para sa Barangay and Sangguniang Kabataan Elections na hindi pa maaaring mangampanya.

“Basta lahat po ng mag-file ng certificate of candidacy simula bukas hanggang September 2, kayo po ay considered nang kandidato. Bawal ang premature campaigning. Lahat ng mga materials na mayroon kayo, kailangang tanggalin. Bawal maglagay ng kahit anong materials, kahit walang nakalagay na 'vote for'. Kinakailangan na nasa social media post, kailangan tanggalin lahat,” ani Garcia sa isang panayam.

Dagdag pa ni Garcia, lahat ng magsusumite ng COC ay maaari nang masampahan ng reklamong premature campaigning at disqualification.

“Kaya po kayo ay kandidato na, puwede po kayong ma-file-an ng kasong kriminal na premature campaigning at disqualification kung kayo ay mangangampanya na pagkatapos mag-file ng certificate of candidacy,” ani Garcia.

Nagsimula nang tumanggap ng COC ang Comelec kahapon, Agosto 28 na tatagal hanggang Setyembre 2.

Magsisimula naman ang campaign period sa Oktubre 19 hanggang 28.

Election period at gun ban, start na

ni Mai Ancheta @News | August 28, 2023

Epektibo na simula ngayong Lunes, Agosto 28, ang gun ban para sa Barangay at Sangguniang Kabataan Elections (BSKE) na itinakda sa Oktubre 30, 2023.

Nangangahulugan ito na bawal ang pagdadala ng baril simula ngayong araw hanggang Nobyembre 29, 2023, alinsunod sa resolusyong inilabas ng Commission on Elections para sa Ban on Firearms and Security Concerns.

Sa ilalim ng gun ban, bawal ang magdala ng baril sa labas ng bahay, trabaho at sa lahat ng pampublikong lugar.

Bawal din ang pagkuha ng serbisyo ng security personnel at bodyguards; o pag-transport at mag-deliver ng baril at explosives.

Ang mga lalabag dito ay may katapat na kulong mula isang taon hanggang anim na taon at hindi na makakaboto kahit kailan.

Ang mga exempted sa gun ban ay iisyuhan ng Certificates of Authority.

Magsisimula na ring tumanggap ang Comelec ng certificates of candidacy ngayong araw at magsisimula ang campaign period mula Oktubre 19 hanggang 28.

Tatakbo sa BSKE na 'nagpaparamdam' na, 6 yrs. kulong — COMELEC

ni BRT @News | August 23, 2023

Binalaan ng Commission on Elections (Comelec) ang mga kakandidato sa 2023 Barangay and Sangguniang Kabataan Elections (BSKE) na iwasang masangkot sa maagang pangangampanya.

Ayon kay Comelec Chairman George Garcia, maaari lamang mangampanya ang mga kandidato sa official campaign period para sa halalan na itinakda sa Oktubre 19-28.

Paliwanag ni Garcia, ang premature campaigning ay may katumbas na kulong na isa hanggang anim na taon at diskwalipikasyon.

“Bawal umikot. ‘Yung pamimigay ng ayuda na wala namang ayudang dapat ipamigay at

hindi naman regular na ginagawa ay pangangampanya na ‘yan,” aniya pa sa isang panayam,

Batay sa calendar of activities na inilabas ng Comelec, magsisimula ang election period sa Agosto 28.

Ang botohan naman ay nakatakda sa Oktubre 30.