19 patay sa eleksyon

ni Eli San Miguel - Trainee @News | October 31, 2023

Inulat ng Commission on Elections (Comelec) ngayong Martes na 19 katao ang namatay at 19 iba pa ang nasugatan sa halalan sa barangay at Sangguniang Kabataan ngayong taon.

“[There are] 29 incidents resulting in 19 deaths and we have 113 others which not necessarily resulted in deaths but are incidents which are still being validated," pahayag ni Comelec spokesperson John Rex Laudiangco sa ANC.

"For the confirmed injuries related to the elections, [there are] 19," dagdag niya.

Walang ibinigay na detalye ang opisyal tungkol sa mga pagkamatay na may kaugnayan sa eleksyon.

Sinabi ni Laudiangco na bagamat "medyo mababa" ang mga numero kung ikukumpara sa nakaraang barangay election noong 2018, patuloy pa ring sanhi ng alalahanin ang mga bilang na ito.

"We really have to improve this situation. We have to…normalize elections to the people that it must not result in any form of violence," sabi ni Laudiangco.

Sa naunang datos ng pulisya, naitala na walo katao ang namatay at pito ang sugatan sa karahasan na may kaugnayan sa eleksyon mula Agosto 28 hanggang Oktubre 25.

Insurance assistance ng mga titser sa BSKE, tiniyak ng DepEd

ni Angela Fernando - Trainee @News | October 30, 2023

Nangako ang Department of Education (DepEd) ngayong Lunes na bibigyan ng tulong medikal at insurance ang mga guro na naglingkod para sa Barangay and Sangguniang Kabataan Elections (BSKE).

Sinabi ni Michael Poa, tagapagsalita ng DepEd, sa mga mamamahayag sa tanggapan ng Commission on Elections na bukod sa mga benepisyo na ibinibigay ng Comelec, ibibigay din ang tulong medikal at personal accident insurance sa kanila.

Dagdag pa niya, nakipag-ugnayan na ang DepEd sa Comelec upang tiyakin na makukuha ng mga BEI ang kanilang honoraryo para sa tungkulin sa halalan.

Nagkakahalaga ito ng P9,000 hanggang P10,000. Sa kasalukuyan, pinoproseso na ng DepEd ang mga kailangan para sa mas maagang pagpapalabas ng honoraryo.

Ang benepisyo para sa may mga tungkulin sa halalan ay dapat mailabas sa loob ng 15 araw.

292 kandidato sa Abra, umatras sa BSKE

ni Eli San Miguel - Trainee @News | October 30, 2023

Umabot na sa 292 ang mga kandidato sa Abra na umatras sa Barangay and Sangguniang Kabataan elections (BSKE), ayon sa Philippine National Police ngayong Lunes.

Sa isang press conference, sinabi ni PNP chief Police General Benjamin Acorda Jr. magkasama sila ni chairperson ng Commission on Elections (Comelec) George Garcia na nagtungo sa lalawigan noong Linggo upang suriin ang sitwasyon.

“We were personally briefed together with the Comelec chairman doon. And we itemized iyong mga nag-withdraw na candidates. Actually a total of 292 iyong nag-withdraw doon,” ani Acorda.

Ayon sa PNP chief, ilang mga kandidato ang umatras dahil sa alegasyon ng mga banta.

Bukod sa mga kandidato, may ilang guro na itinalagang maging mga miyembro ng electoral board ang umatras din sa Abra. Sinabi ni Acorda na 39 miyembro ng pulisya ang itinalaga bilang mga kapalit na miyembro ng board.

Nagpadala ang PNP ng karagdagang 352 na miyembro ng pulisya sa Abra.