COC filing, simula na ngayong araw

ni Jasmin Joy Evangelista | October 1, 2021

Ngayong araw na nakatakdang magsimula ang paghahain ng certificate of candidacy (COC) para sa mga nagnanais tumakbo sa susunod na halalan.

May ilang pagbabago sa proseso ng filing ngayong taon kung saan imbes na sa tanggapan ng Commission on Elections (Comelec) sa Intramuros, Maynila, sa isang tent sa hotel sa Pasay City tatanggapin at ipoproseso ng komisyon ang mga COC ng mga tatakbo para sa national positions.

"It is not possible anymore to hold it there (Intramuros)... very limited space, very limited holding areas," sabi ni Helen Aguila-Flores, Comelec deputy executive director for administration.

Ang filing of COC ay tatagal hanggang October 8, kasabay din sa paghahain ng Certificate of Nomination and Acceptance (CONA).

Bilang lang ang mga papayagang pumasok sa venue, mapa-kandidato, tauhan ng Comelec, o miyembro ng media.

Kailangan din munang magnegatibo sa COVID-19 swab test ang mga pupunta sa venue. May libreng on-site antigen test din sa mga kandidatong ayaw gumastos.

Sakaling magpositibo sa test on-site o makitaan ng sintomas ng COVID-19, dadalhin sa isolation area ang nagpositibo at dadaan sa regular na protocol ng Inter-Agency Task Force.

Hanggang 2 katao lamang ang puwedeng isama ng mga kakandidato sa lokal na posisyon at pagka-senador habang 3 naman sa mga tatakbong pangulo at bise presidente, at 1 sa mga party list.

Hanggang Okt. 30, 2021.. Voter registration, extended — Comelec

ni Lolet Abania | September 29, 2021

Nagkakaisa ang naging boto ng Commission on Elections (Comelec) en banc ngayong Miyerkules hinggil sa pagpapalawig ng voter registration para sa 2022 national at local elections.

“Extension is unanimously approved,” ani Comelec Spokesperson James Jimenez sa mga reporters.

Sa post sa Twitter ni Comelec commissioner Rowena Guanzon, ang ekstensiyon ng voter registration ay mula Oktubre 11 hanggang 30, 2021, alas-8:00 ng umaga hanggang alas-5:00 ng hapon.

Una nang sinabi ni Comelec chairman Sheriff Abas na ang pagpapalawig ng voter registration ay mula Oktubre 9 hanggang 31.

Ang Oktubre 9 ay natapat na Sabado habang ang 31 naman ay isang Linggo. Paliwanag ni Guanzon, walang registrations kapag Sabado maliban sa Oktubre 30, ang huling araw ng voter registration.

Sinabi pa ng Comelec commissioner na maaari namang isagawa ang reactivation sa pamamagitan ng e-mail o personal na magpunta sa kanilang opisina. Tatanggapin naman ang mga registrants sa lahat ng mga election offices at registration sites sa mga malls.

Samantala, ayon kay Jimenez, lahat ng registrations services ay kanilang isasagawa kabilang na rito ang transfer ng voter registration at reactivation. Extended din ang overseas voter registration ng dalawang linggo, mula Oktubre 1 hanggang 14.

“Note that for overseas voting, the filing of COCs is not an issue, thus the extension starts immediately,” sabi ni Jimenez. Nabuo ang desisyon ng Comelec en banc dahil ayon kay Guanzon, “As requested by the Senate.”

“As I have voted a month ago, I voted again today to extend voter registration because of the necessity for it and to ensure access of all voters to the elections,” saad pa ni Guanzon.

Kaugnay nito, sa isang interview naman kay Abas, sinabi nitong napagdesisyunan din nila na ipagpatuloy ang voter registration matapos ang Oktubre 1 hanggang 8 na paghahain ng certificate of candidacy para sa mga nais tumakbo sa 2022 elections dahil aniya, batid nilang ang Comelec ay magiging sobrang abala sa pag-accommodate ng mga kandidato sa buong mundo na gustong pumasok sa pulitika.

Hanggang nitong Setyembre 11, sinabi ni Abas na umabot na sa 63,364,932 registered voters para sa eleksyon sa 2022. Mayroong 9 milyong karagdagang botante para sa darating na halalan.

Sa naturang bilang, 5 milyon ay mga bagong registrants, 3.2 milyon ay nai-transfer na voter registrations, at tinatayang nasa 871,000 ay reactivated registrations.

One-week extension ng voter registration, pinag-aaralan ng Comelec

ni Lolet Abania | September 23, 2021

Pinag-iisipan ng Commission on Elections (Comelec) na magkaroon ng 1-linggong pagpapalawig ng voter registration.

Sa halip na isang buwan na pagpapalawig na itinutulak ng Kongreso, iminungkahi ni Comelec Commissioner Marlon Casquejo na magsagawa na lamang ng one-week extension ng voter registration matapos ang paghahain ng certificates of candidacy mula Oktubre 1 hanggang 8.

“Our proposal is to use a one-week extension after the filing of COC,” ani Casquejo, sa isang pagdinig ng Joint Congressional Oversight Committee on Automated Election System.

Samantala, maraming mambabatas naman na hinihimok ang Comelec na pagbigyan ang kanilang suhestiyon na 2-linggong ekstensiyon na lamang.

“Baka puwedeng dagdagan kahit dalawang linggo,” sabi ni Cavite 4th District Representative Elpidio Barzaga Jr.

“Ang layo ng one week na ibinibigay ng Comelec sa one month na hinihingi ng legislature,” saad ni Senador Imee Marcos.

Parehong ang Kapulungan ng Kongreso ay humihiling na i-extend ang voter registration period hanggang Oktubre 31, habang itinakda naman ng Comelec ang deadline sa Setyembre 30.

Gayunman, ayon kay Casquejo, agad na susunod ang Comelec kung isang bill ang maipasa at maging batas.