Kanino maaaring tumanggap ng donasyon ang isang kandidato?

ni Jasmin Joy Evangelista | October 16, 2021

Kabi-kabila na ang diskarte ng kampo at tagasuporta ng mga kandidato para sa 2022 elections.

Kaugnay nito, patuloy na nagpaalala ang Comelec hinggil sa mga ipinagbabawal para sa mga aspirants.

Ayon sa Batas Pambansa 881 o Omnibus Election Code, bawal magbigay ng kontribusyon ang mga sumusunod:

* Public at private financial institutions

* Namamahala ng public utilities o may proyekto kaugnay sa likas na yaman

* May kontrata o nakatanggap ng insentibo mula sa gobyerno

* May higit 100,000 loan mula sa gobyerno

* Educational institutions na may P100,000 o higit pa na public loan

* Public officials, empleyado sa civil service, sandatahang lakas

* Foreigner, at foreign government at corporations

*

Sa loob naman ng election period mula Enero 9 hanggang Hunyo 8, 2022, bawal ding mangalap ng pondo para sa mga kandidato sa pamamagitan ng pasayaw, lottery, sabong, palaro, boksing, bingo, beauty contest, at iba pang entertainment performances.

Maaari raw madiskuwalipika ang sino mang kandidato na tatanggap ng bawal na kontribusyon sa araw ng halalan at araw bago ang botohan gaya ng transportasyon, pagkain, inumin, at ano mang may halagang bagay.

Maaari ring ma-disqualify ang sinumang kandidato, asawa, kamag-anak sa ikalawang civil degree, campaign manager, o kinatawan na magbibigay ng donasyon para sa mga proyekto tulad ng road construction at repair, tulay, school bus, clinic at ospital, at simbahan sa loob ng campaign period, isang araw bago ang botohan, at sa araw ng halalan - liban na lang kung tradisyon sa relihiyon at pagbabayad sa naka-schedule na bayarin ng mga scholar.

Ayon naman sa Commission on Elections (Comelec) at election watchdog Lente, lahat ng patakaran kaugnay sa mga kandidato ay may bisa lang kapag opisyal nang nagsimula ang campaign period na Pebrero 8 hanggang Mayo 7 para sa national candidates at Marso 25 hanggang Mayo 7 para sa local bets.

Samantala, dapat ihayag ang mga kontribusyon sa Statement of Election Contributions and Expenditures o SOCE ng mga magwawagi at talunang kandidato.

COMELEC nagbabala sa mga kandidato na tatanggap ng campaign donations mula sa ibang bansa

ni Jasmin Joy Evangelista | October 14, 2021

Nagbabala ang Commission on Elections (COMELEC) sa mga kandidato sa May 2022 elections na tatanggap ng mga campaign donations mula sa ibang bansa.

Ayon kay COMELEC commissioner Rowena Guanzon, mahigpit na ipinagbabawal ang mga kontribusyon mula sa dayuhan at mga foreign corporations.

Ito ay kanyang ipinahayag matapos inilunsad ang isang crowd funding page para sa pagtakbo ni Vice President Leni Robredo sa pagkapangulo.

Aniya, dapat i-report ang mga nasabing mga kontribusyon mula sa dayuhan dahil maaaring masampahan sila ng kaso na magreresulta sa diskwalipikasyon ng isang kandidato.

Naghain ng COC... 47K kandidato para sa local positions — Comelec

ni Lolet Abania | October 9, 2021

Mahigit sa 47,000 certificates of candidacy (COCs) para sa lokal na posisyon ang naghain na mga kandidato mula Oktubre 1 hanggang 8, batay sa report ng Commission on Elections (Comelec) ngayong Sabado.

Ayon sa Comelec, umabot naman sa 97 kandidato sa pagka-pangulo, 29 para sa bise presidente, 176 sa pagka-senador at 270 ang nominees para sa sectoral representation o partylist group.

Para sa local positions, mayroong 733 kakandidato bilang district representatives, 281 tatakbong gobernador, 226 sa pagka-vice governor, 1,951 para sa provincial board members, 4,486 sa pagka-mayor, 3,968 sa pagka-vice mayor, at 35,636 na tatakbong councilor.

Sa isang interview kay Comelec spokesperson James Jimenez, sinabi nitong ang mga kandidato ay daraan lahat sa mahigpit na screening process upang kanilang salain at piliin kung sino ang seryoso at iyong mga nuisance bets lamang na tatakbo sa eleksyon.

Sinabi rin ni Jimenez na posibleng mailabas nila ang final list ng candidates sa Disyembre. Sa Mayo 9, gaganapin ang 2022 National and Local Elections.