Para sa 2022 May elections... Comelec, naglabas ng pansamantalang listahan ng mga kandidato

ni Lolet Abania | October 29, 2021

Naglabas na ang Commission on Elections (Comelec) ngayong Biyernes ng tentative na listahan ng mga kandidato para sa 2022 national at local elections.

Batay sa Comelec, mayroong 97 mga pangalan ng tentative o pansamantalang listahan ng mga presidential aspirants/candidates na karamihan sa kanila ay tatakbo bilang independent.

Gayundin, nakapagtala ang poll body ng 28 vice presidential at 174 senatorial aspirants. [Click here for list]

Ang Comelec ay naglabas din ng tentative na listahan ng mga tatakbo naman para sa local positions. [Click here for list]

Sa ilalim ng calendar ng Comelec para sa 2022 national at local elections, ngayong Biyernes, Oktubre 29, ang pagsisimula ng posting ng pansamantalang listahan ng mga kandidato.

Ayon sa poll body, inilabas ang tentative lists para payagan ang mga aspirants na ma-check ang kanilang mga pangalan na lalabas sa official ballot.

Ang huling araw ng paghahain ng request o koreksyon ng pangalan na dapat lumabas sa ballot ay sa Nobyembre 8, 2021.

“Aspirants whose names appear on the tentative list of candidates released by the COMELEC have until November 8 to submit their requests for correction of typographical errors in their listed names,” post ni Comelec Spokesperson James Jimenez sa Twitter.

Una nang sinabi ni Jimenez na ang Comelec ay nakatakdang i-publish ang pinal na listahan ng mga kandidato sa Disyembre.

Sinabi rin ni Jimenez na inaasahan ng poll body na matatanggal na ang mga nuisance candidates mula sa kasalukuyang listahan.

Huling 2 araw ng voter registration, dinagsa

ni Jasmin Joy Evangelista | October 29, 2021

Dagsa pa rin ang mga nais maging botante sa iba’t ibang Commission on Elections (Comelec) offices para magparehistro sa darating na halalan, na magtatapos na bukas.

Karamihan sa mga nagpaparehistro ay mga bagong botante.

Nagpaalala ang Comelec na sa unang step ng registration o verification ay dapat dala na ang mga requirements.

"We don't accept IDs na fake o matagal nang expired... I'm sorry po, pero di tinatanggp ang barangay ID at hindi rin po tinatanggap pati police clearance," ani Vic Fabella, Comelec officer.

Pinaalalahanan din niya ang mga magpapa-register na agahan ang pagpunta at huwag sa oras na malapit nang magsara dahil baka hindi umabot sa biometrics.

Ang extended voter registration period para sa Halalan 2022 ay magsasara na bukas, ika-30 ng Oktubre.

P100K panukalang multa vs. nuisance candidates, kinatigan ng Comelec

ni Lolet Abania | October 27, 2021

Nagpahayag ng suporta ang isang opisyal ng Commission on Elections (Comelec) hinggil sa lehislatibong panukala na magpapataw ng P100,000 multa laban sa mga political aspirants na idineklara bilang nuisance candidates.

Iminungkahi naman ng poll official ang tinatawag na automatic disqualification laban sa mga naideklarang nuisance candidates ng two consecutive polls o dalawang magkasunod na eleksyon sa anumang posisyon.

Sa ginanap na Senate electoral reforms committee hearing, sinuportahan ni Comelec Law Department Director Maria Norina Tangaro-Casingal ang House Bill 9557 na layong mapatawan ng stiffer penalties o mabigat na parusa sa mga nuisance candidates.

“We support the imposition of the fine of P100,000,” wika ni Casingal, na aniya ang Omnibus Election Code ay hindi nagpapataw ng multa laban sa mga idineklara bilang nuisance candidates.

“We also would like to propose that those who have been declared as nuisance candidates be disqualified from running for two successive elections,” saad ni Casingal sa mga senador.

Si Senador Imee Marcos, ang chairperson ng naturang Senate panel, ay sang-ayon naman sa panukalang ito ng Comelec , aniya, “This is a good idea.”

Nilinaw naman ni Casingal na iyong mga naideklarang nuisance candidates ay hindi maaaring maghain ng substitution para sa ibang kandidato.

“They can no longer substitute also, your honors, if they have been declared as a nuisance candidate for two successive elections, for any elective position. That’s our proposal,” sabi pa ni Casingal.

Ayon sa Comelec, umabot sa 251 filers ng certificate of candidacies (COCs) para sa pangulo, bise presidente, at senador, na idineklara bilang nuisance candidates sa panahon ng 2016 national at local elections.

Noong 2019, mayroon namang 84 idineklarang nuisance candidates para sa senatorial position lamang.

Ang HB 9557 ay layong magbigay ng episyenteng pamamaraan sa pagdedeklara ng isang nuisance candidate at pagpapataw ng mabigat na parusa sa nuisance candidate, at sinumang naging dahilan para maghain ng COC ang naturang kandidato sa pamamagitan ng pag-amend ng Omnibus Election Code.

Noong Agosto 2021, ang House of Representatives ay inaprubahan ang HB 9557 sa ikatlo at pinal na pagbasa.