Mula 6AM-7PM.. Oras ng pagboto sa 2022 elections, extended — Comelec

ni Lolet Abania | November 10, 2021

Inianunsiyo ng Commission on Elections (Comelec) ngayong Miyerkules na ang oras ng pagboto para sa Mayo 9, 2022 national at local elections ay mula alas-6:00 ng umaga hanggang alas-7:00 ng gabi o pinahaba ng isang oras kumpara sa itinagal nito noong 2019 midterm polls.

Sa ginanap na pagdinig sa House Committee on Suffrage and Electoral Reforms ngayong Miyerkules, sinabi ni Comelec commissioner Marlon Casquejo sa mga mambabatas na inaprubahan na ng en banc ang resolusyon hinggil sa itatakdang voting hours.

“Just this morning the en banc already approved general instructions for the Electoral Board... Voting hours start 6 in the morning and end at 7 [p.m.],” ani Casquejo.

Ang mga botante na ayon sa opisyal, “within 30 meters” sa labas ng mga polling precincts na umabot sa closing time ay kanila pa ring pagbibigyang makaboto.

“However, at 7 there’s still voters outside the polling place in front, 30 meters, we will still continue w/ the voting... We do not expect it will end at 7 but we will continue until such time... [that voters within] 30 meters in front will be catered,” sabi pa ni Casquejo.

Kung ikukumpara, ang naging voting hours sa panahon ng eleksyon bago pa ang pandemya ng COVID-19, 2019 midterm polls -- 6AM-6PM; 2016 national at local polls – 6AM-5PM.

Matatandaang sinabi na rin ng mga Comelec officials na “tiyak” na extended ang voting hours sa Mayo 9, 2022, kung saan hindi nila sinang-ayunan ang panukalang magkaroon ng isang multi-day election sa gitna ng COVID-19 pandemic.

Matapos ang extension… Dagdag 400K sa botante

ni Jasmin Joy Evangelista | November 1, 2021

Mula sa target na 300K ay umabot pa hanggang 400K ang mga humabol na nagparehistro sa pinalawig na Comelec voter’s registration.

Ayon sa Comelec, marami ang humabol na babae at mga kabataan.

“We think it was generally successful. Masyadong maraming dumating at talagang dinagsa tayo," ani Comelec Spokesperson James Jimenez.

May field office na agad nagsara dahil nawalan ng kuryente, tulad sa Marawi, pero ayon kay Jimenez, hindi na magkakaroon ng panibagong extension.

Bagaman nag-extend ay masusunod pa rin daw ang Comelec schedule para sa halalan dahil nakapag-adjust sila.

“Kasi lahat naman ng schedule, may slack time nang kaunti para unforeseen circumstantes. Basically ngayon kinain na lahat 'yon so talagang medyo kritikal na ngayon," ani Jimenez.

Naglabas na rin ang Comelec ng tentative list ng mga kandidato para sa 2022 elections at may hanggang Nobyembre 8 para magsumite ng request of correction kung may error sa mga nakalistang pangalan.

63M target registrants, naabot na... Last day ng voter registration, dinagsa – Comelec

ni Lolet Abania | October 30, 2021

Dagsa pa rin ng mga indibidwal na nais na humabol sa huling araw ng voter registration para sila makaboto sa 2022 national at local elections ngayong Sabado, ayon sa Commission on Elections (Comelec).

“Ngayon po’ng last day, asahan po talagang marami ang nais pang magpa-register, dagsa ang tao ngayon,” ani Comelec Director for Education and Information Department na si Elaiza Sabile-David.

Sinabi ni Sabile-David na ang target ng Comelec na bilang ng mga registrants ay kanila nang naabot.

“Ang target natin nasa 63M lang as of October 18 at hindi pa tapos ang registration at hindi pa namin nakuha ang ibang data from the field offices, nasa 63,600,000 na po tayo,” sabi ng opisyal.

Ayon kay Sabile-David, mas marami ang mga lalaki kumpara sa mga babae mula sa mga bagong nagparehistro.

“As of Oct. 18, makikitang mas marami nang kaunti lang ang mga lalaki sa babae, nasa 3,102,854 at ang sa babae naman nasa 3,059,268. Historical data, kadalasan mas marami ang babae pagdating sa registration. Hindi pa naman tapos at wala pang kumpletong datos,” saad ni Sabile-David.

Batay sa datos ng Comelec nitong Setyembre 30, nasa 374,000 ang nagparehistro sa vulnerable sectors, may 557,000 indigenous people, 10 milyong senior citizens at 23 milyong mga kabataan.

“Hindi pa po tapos ang registration niyan,” pahayag ni Sabile-David.

Aniya pa, ang ibang mga registrants ay nasasakop sa edad 31 hanggang 59-anyos.

Paniwala naman ni Sabile-David na mahihigitan pa nila ang naging turnout ng mga registrants ng nagdaang eleksyon.

“Nu’ng 2019, national and local elections din po ‘yun pero hindi siya presidential, nasa 76 percent tayo. Nu’ng 2016, dahil presidential elections po ‘yun, umabot tayo ng 82 percent. We will expect po sana na for this 2022, baka it’s more than our turnout in 2019 dahil presidential elections din po siya,” wika ng opisyal.

“Ang challenge lang dito is the pandemic na sana hindi rin maging hadlang po talaga para makakuha ng malaking turnout,” dagdag ni Sabile-David.

Gayunman, una nang sinabi ng Comelec na hindi na nila palalawigin pa ang voter registration matapos ang ginawang extension nito ng hanggang Oktubre 30.

“Maagang nagsimula ang registration. Hindi na po sana nangyayari ‘yung hindi nasasama sa cutoff kung nakapagparehistro lang sana nang mas maaga. Pero kami ay natutuwa kasi ito ay isang mensahe rin na marami pa talaga sa ating mga kababayan ang nais makilahok sa ating eleksiyon,” paliwanag pa ni Sabile-David.