OT ng mga guro sa BSKE, walang bayad — Comelec

ni Angela Fernando - Trainee @News | November 2, 2023

Hindi makakatanggap ng karagdagang bayad ang mga gurong nag-overtime para sa Barangay at Sangguniang Kabataan Elections (BSKE) dahil sa kakulangan sa badyet at sa patakarang nilapag ng Commission on Audit (COA).

Ito ang tiniyak ng Commission on Elections (Comelec) sa kabila ng hiling ng Teachers Dignity Coalition (TDC) na bigyan ng pondo ang poll body para sa overtime pay ng mga guro.

Isang sulat ang ipinadala ng TDC National chairperson na si Benjo Basas kay Comelec Chairperson George Garcia nu'ng Oktubre 31 kung saan hinikayat nila ang Comelec na magbigay ng opisyal na resolusyon para sa overtime pay ng mga guro.

Ngunit ayon kay Garcia, kahit pa gustuhin ng ahensiya na magbigay ng dagdag na bayad, may ibinaba ang COA-DBM circular na nagsasabing ang mga empleyado lang ng isang ahensiya ang maaaring humiling ng overtime pay, at kulang din umano ang badyet na kanilang natanggap para rito.

Mas maraming security personnel, ide-deploy sa "clash points" sa 2025 elections

ni Eli San Miguel - Trainee @News | November 2, 2023

Naglalayon ang Commission on Elections (Comelec) na dagdagan ang bilang ng security personnel na nakatalaga sa mga "clash points" sa gitna ng 'di inaasahang karahasan na naganap sa kamakailang halalan sa barangay.

Sinabi ni Comelec spokesperson Rex Laudiangco sa isang panayam na paiigtingin ng ahensya ang implementasyon ng seguridad sa nalalapit na halalan sa 2025.

Inililista ang "clash points" sa mga kategoryang green, yellow, orange, at red.

Ipinahayag ni Laudiangco na 'di inaasahan ang antas ng karahasan kaugnay ng eleksyon kahit na may sapat na bilang ng mga pulis at sundalo na inilagay sa mga clash points sa mga Barangay at Sangguniang Kabataan Elections (BSKE).

“The clash points like in Puerto Princesa, we really did not expect that, because Puerto Princesa City is not in the red category, neither in the orange category, it’s actually in the green category,” dagdag ni Laudiangco.

Itinigil ng Comelec ang operasyon ng ilang oras nang pasukin ng mga tagasuporta ng isang kandidato sa Barangay Kalipay ang isang clustered precinct at sumira ng daan-daang hindi nagamit na balota.

Iniulat ng Comelec na sa kabila ng mga hiwalay na insidente ng karahasan, pangkalahatang mapayapa ang halalan.

Maagang pagboto sa senior at PWD, inihirit

ni Eli San Miguel - Trainee @News | November 2, 2023

Nanghikayat si Senator Juan Edgardo "Sonny" Angara ngayong Huwebes, ika-2 ng Nobyembre, ng pagpasa ng panukalang batas na nagkakaloob ng pribilehiyo ng maagang pagboto para sa mga nakatatandang mamamayan at mga may kapansanan o PWDs.

Ipinanawagan ni Angara ang pagpapatibay ng patakaran na ito pagkatapos ng positibong resulta ng pilot implementation ng Commission on Election (Comelec) sa isang early voting scheme para sa mga senior citizen at PWD sa Barangay at Sangguniang Kabataan Elections (BSKE) noong Oktubre 30.

Sa pagpasa ng Senate Bill No. 777, sinabi ng senador na mahalagang palakasin ang kakayahan ng mga matatandang botante at mga PWD na makarating sa mga presinto ng botohan sa pamamagitan ng pagbibigay sa kanila ng pribilehiyo sa maagang pagboto, at dapat handa na itong ipatupad sa susunod na mga halalan.

“It is encouraging to hear from our Comelec Chairman (George Garcia) about the positive reception of our senior citizens and PWDs to the early voting scheme in the two pilot cities,” sabi ni Angara sa isang pahayag.

“It clearly shows that in spite of difficulties they experience, they always make it a point to exercise their right to suffrage,” dagdag niya.

Pinuri ng poll chief ang "blockbuster" na pagdalo ng mga senior at PWDs sa pilot implementation ng maagang botohan sa Naga at Muntinlupa City, kung saan nagpakita sila alas-5 ng madaling-araw, upang ibigay ang kanilang mga boto para sa halalan sa barangay.

Kasabay nito, nag-udyok si Garcia na ipasa ang hakbang na nagpapahintulot sa mga vulnerable sector na bumoto nang maaga o bago pa ang itinakdang halalan para maipatupad na ang patakaran sa buong bansa sa halalan sa 2025.

Sa paghahain ng panukalang batas, binigyang-diin ni Angara ang kahalagahan ng pagbibigay-kakayahan sa mga senior citizen at mga may kapansanan na bumoto sa loob ng hindi kukulangin sa dalawang (2) araw sa loob ng 15 araw bago ang mismong petsa ng halalan.