Comelec, security forces: 'Pinas, handa na para sa Halalan 2022

ni Lolet Abania | May 8, 2022

Handang-handa at full alert na ang buong puwersa ng seguridad ng Pilipinas at Commission on Elections (Comelec) para sa Halalan 2022 bukas, Mayo 9, 2022.

Ngayong Linggo, maraming dumalo na mga Comelec commissioners at mga opisyal ng security forces ng bansa sa ginawang walkthrough inspection ng Philippine International Convention Center (PICC), kung saan ang National Board of Canvassers (NBOC) ay nakatakdang mag-convene sa Lunes.

Kabilang sina Comelec Chairman Saidamen Pangarungan, Commissioner George Garcia, Spokesperson Director John Rex Laudiangco, Philippine National Police (PNP) officer-in-charge Vicente Danao Jr., Armed Forces of the Philippines (AFP) Chief Andres Centino, at Philippine Coast Guard (PCG) Commandant Artemio Abu na nakiisa sa naturang inspeksyon.

Sa ginanap na press briefing, tiniyak ni Danao na mayroong 225,000 PNP personnel ang nakakalat at handang magsilbi para siguruhin at i-secure na tama at patas ang magaganap na eleksyon.

Gayundin, inanunsiyo ni Danao ang pagpapatupad ng nationwide total liquor ban, na epektibo ito noon pang Sabado nang gabi, Mayo 7 hanggang Lunes, Mayo 9.

Nagbabala naman ang PNP OIC sa mga susubok na magsagawa pa ng campaign activities ngayon dahil aniya, kanila itong huhulihin.

Binanggit naman ni Centino na ang AFP personnel ay full alert na rin, kabilang ang kanilang naval at air assets na handa na para sa May 9 elections.

“I have reminded our troops deployed all over the country to always remain non-partisan and neutral. And we assure the public that all our troops are on full alert as we have declared this full alert status yesterday. We will be ready with all our resources. Air and naval assets have been made available, and we are at this point- implementing the plans we prepared way before the election campaign,” ani Centino.

Sinabi naman ni Abu na ang Coast Guard ay handa na rin para tiyakin ang pagkakaroon ng ligtas na eleksyon.

“The guiding principle of the Comelec will be to protect the sanctity of the vote by all means and in whatever circumstances. Together with our partner agencies, the PNP, AFP, PCG, DepED, and other government agencies, we are going to pursue this to the end,” pahayag ni Pangarungan.

Red alert na ang NDRRMC at OCD para sa 2022 elections

ni Lolet Abania | May 6, 2022

Nasa red alert status na ang National Disaster Risk Reduction and Management Council (NDRRMC) at ang Office of Civil Defense (OCD) kaugnay sa nalalapit na May 9 national at local elections.

Susuportahan ng dalawang ahensiya ang Commission on Elections (Comelec) para sa tinatawag na “COVID-proofing” sa 2022 elections, kung saan ito ang kauna-unahang halalan na isasagawa sa Pilipinas sa gitna ng pandemya.

Sa ilalim ng Task Force Against COVID-19’s (NTF) Memorandum No. 6s na inisyu noong Mayo 2 ay nakasaad, “the OCD, all Regional Task Forces (RTFs), and Disaster Risk Reduction and Management Councils (RDRRMC) are mandated to coordinate and mobilize member agencies to adhere to the requirements and needs set by the Comelec through its field offices.”

Ang OCD, kasama ang kanilang Regional Offices, bilang head ng Task Group Resource and Management and Logistics, ay inaatasan din na mag-facilitate at i-coordinate ang mga nakalaang medical supplies at iba pang logistical requirements para sa COVID-19 operations.

“Despite these circumstances, we urge our countrymen to keep the ‘Bayanihan Spirit’ alive to ensure a safe and healthy national and local elections,” saad ni Assistant Secretary Bernardo Rafaelito Alejandro IV, OCD’s deputy administrator for operations.

Una nang sinabi ng Comelec na ang mga botante na nakikitaan ng COVID-19 symptoms ay papayagan pa ring bumoto sa nakatalagang isolation polling places.

Ayon pa sa Comelec, ang mga botante ay required na nakasuot ng face masks habang nasa mga polling precincts, at ang face shields ay optional na lamang.

40K balota ng local absentee voting, nasa Comelec na

ni Lolet Abania | May 5, 2022

Nasa kabuuang 40,000 local absentee voting ballots ang nai-deliver na sa Commission on Elections (Comelec) main office hanggang nitong Miyerkules, Mayo 4.

Subalit, ayon kay Comelec Commissioner George Garcia, ang Philippine Navy ay hindi pa nagpadala ng single ballot sa kanila dahil ito aniya sa tinatawag na logistical problems.

Ang mga natanggap ng Comelec na accomplished ballots ay ang mga sumusunod:

• Philippine Army: 11,305

• Philippine Air Force: 2,618

• Philippine National Police: 22,794

• Department of Education: 820

• Bureau of Jail Management and Penology: 738

• Bureau of Fire Protection: 47

• Media: 809

• Comelec: 687

• Department of the Interior and Local Government: 13

• Philippine Coast Guard: 157

• Department of Foreign Affairs: 1

• Public Attorney's Office: 2

• National Power Corporation: 9

Ayon sa Comelec, may kabuuang 84,357 botante ang pinayagang maka-avail ng local absentee voting (LAV), kung saan ginanap ito mula Abril 27 hanggang 29, 2022.

Gayunman, ang aplikasyon ng 9,341 indibidwal ay hindi naaprubahan dahil alinman sa kanila, ayon sa Comelec ay hindi nakarehistro o mga deactivated na.

Kabilang sa pinayagan ng poll body para maka-avail ng local absentee voting ay mga empleyado ng gobyerno at mga opisyal, miyembro ng Philippine National Police (PNP) at ng Armed Forces of the Philippines (AFP), gayundin ang mga media workers kabilang na ang mga photojournalists, documentary makers, technical at support staff, bloggers, at freelance journalists.

Samantala, ang Comelec office sa Intramuros, Manila ay patuloy na nakatatanggap ng mga local absentee voting ballots.

Ang mga balota ay nakalagak at nakatago sa mahigpit na guwardiyadong kwarto sa Comelec office, at bubuksan ito sa Mayo 9 para sa canvassing.