Kung walang 'K' ang kandidato.. COC, 'di na tatanggapin ng COMELEC

ni Madel Moratillo | April 23, 2023

Puwede nang tanggihan ng mga tanggapan ng Commission on Elections (Comelec) ang nais kumandidato sa Barangay at Sangguniang Kabataan Elections.

Nabatid na maglalabas ang Comelec ng patakaran hinggil sa paghahain ng certificate of candidacy (COC).

Ang paghahain ng kandidatura ay una nang itinakda sa Agosto 28 hanggang Setyembre 2.

Ayon kay Comelec Chairman George Erwin Garcia, ang mga hindi lang naman tatanggapin ay mga hindi kwalipikadong aspirante.

Paliwanag ni Garcia, sa mga nakaraang halalan ay tinatanggap nila lahat ng mga COC nang hindi na tinitingnan kung kwalipikado ang mga nais kumandidato o hindi.

Ilan sa mga titingnan ay ang edad ng mga kandidato, nationality, residency, at iba pa.

Inihalimbawa ni Garcia noong 2018 BSKE kung saan umabot sa 6 na libo ang mga kaso para sa kanselasyon ng hindi kwalipikadong kandidato.

Napakahaba rin aniya ang proseso dahil sa kinakailangan itong pagdesisyunan pa ng Division office ng Comelec.

Petsa ng paghahain ng COC, binago

ni Madel Moratillo | March 23, 2023

Binago na ng Commission on Elections (Comelec) ang petsa ng paghahain ng Certificate of Candidacy (COC) para sa mga kakandidato sa Barangay at Sangguniang Kabataan Elections.

Ayon kay Comelec Chairman George Garcia, sa halip na Hulyo 3 hanggang 7, gagawin ng Agosto 26 hanggang Setyembre 2 ang petsa para sa paghahain ng kandidatura.

Ayon kay Atty. John Rex Laudiangco, naging konsiderasyon dito ang kahilingan ng ilang senador na ikonsidera ang pagbabago ng filing ng COC.

Masyado umanong malayo ang petsa ng paghahain ng kandidatura sa mismong araw ng halalan.

Bukod dito, mainit din umano ang tensyon sa mga kandidato sa BSKE.

Simula Hulyo 4-23 Voter registration, tuloy na — Comelec

ni Lolet Abania | July 3, 2022

Handa na Commission on Elections (Comelec) na ipagpatuloy ang voter registration na magsisimula sa Lunes, Hulyo 4.

“Ang pagpapatuloy ng voters registration ay magsisimula bukas, July 4, 2022 hanggang July 23, 2022... Lunes-Sabado, mula 8:00 a.m. hanggang 5:00 p.m.,” pahayag ni Comelec spokesperson Atty. John Rex Laudiangco sa isang radio interview ngayong Linggo.

Tatagal ang registration hanggang Sabado, Hulyo 23, na para sa lahat ng uri ng aplikasyon na in-person nang gagawin.

Ayon sa Comelec, ang mga voter applicants ay maaaring pumunta sa Office of the Election Officer sa kani-kanilang district o city o municipality sa mga nabanggit na petsa mula Lunes hanggang Sabado, alas-8:00 ng umaga hanggang alas-5:00 ng hapon, kabilang na ang mga holiday.

Sinabi ni Laudiangco na target ng Comelec ang mga bagong voters para sa Sangguniang Kabataan (SK) elections na magparehistro sa ibinigay nilang registration period.

“Ang target sa voters registration ay ‘yung mga bagong botante para sa Sangguniang Kabataan (SK)... Ito ‘yung mga magiging 15 years o 15 years old to 17 years old... Kung hindi pa 15 pero magfi-15 [years old] by December 5, 2022, pwede nang magparehistro,” aniya.

Kaugnay nito, ayon kay Laudiangco, ang mga kwalipikadong nag-apply na bumoto para sa regular elections kabilang na ang barangay elections ay iyong magiging 18-anyos na sa Disyembre 5.

“Para naman sa ating regular registration kasama na ‘yung sa barangay dito, ‘yung mag-e-18 years old on or before December 5,” sabi ni Laudiangco. Gaganapin ang barangay at SK elections sa Disyembre 5, 2022.

“Ang boboto sa SK sa December 5, 2022 ay ‘yung 15 to 30 years old; Sa regular barangay election, 18 and above... ‘Yung 18 to 30 years old, dalawang balota ang sasagutan nila dahil saklaw sila ng Barangay at SK elections,” paliwanag niya.

“Nakasaad sa batas na kailangan isagawa ang Barangay at SK elections sa December 5... Hangga’t walang batas para ‘wag itong ituloy, tuloy ang paghahanda ng Comelec,” giit pa ni Laudiangco.