Sara para alkalde ng Davao City

ni Lolet Abania | October 2, 2021

Naghain na si presidential daughter Mayor Sara Duterte ng kanyang certificate of candidacy (COC) para sa muling pagtakbo bilang alkalde ng Davao City sa 2022 elections ngayong Sabado.

Inanunsiyo ito ni Mayor Sara sa isang Facebook post, habang kinumpirma naman ng kanyang spokesperson na si Liloan, Cebu Mayor Christina Frasco.

“Yes, I can confirm that Mayor Sara Duterte has filed her Certificate of Candidacy for Mayor of Davao City,” ani Frasco sa isang text message. Nagpasalamat naman ang presidential daughter sa kanyang mga supporters habang nanawagan ito sa lahat ng pagkakaroon ng maayos at makabuluhang eleksyon.

“I have been honored with the gift of trust and respect of many of our fellow Filipinos. Thank you to everyone who has expressed their support. Many of you do not know me and yet you carry me over your shoulders,” sabi ni Mayor Sara.

“Like the other millions of Filipinos, I share with you the same goal of living a peaceful and prosperous life in our country, today and in the many years to come. I call on everyone to work together for an honest, orderly, and credible election in May 2022,” saad pa ng alkalde.

Pagbibigay ng voter’s certification, stop muna — Comelec

ni Jasmin Joy Evangelista | September 24, 2021

Inanunsyo ng Commission on Elections na ihihinto muna ang pag-i-issue ng voter’s certification sa lahat ng office of the election officer at satellite offices sa barangay at mall sa buong bansa simula Lunes, Setyembre 27, hanggang Huwebes, Setyembre 30, maliban sa main office sa Intramuros.

Ito raw ay para mabawasan ang aasikasuhin ng mga taga-Comelec at matutukan muna ang registration dahil hanggang Setyembre 30 na lamang ang voter’s registration.

Ayon kay Comelec spokesman Dir. James Jimenez, inaasahan nila ang pagdagsa ng last-minute registrants hanggang araw ng deadline pero limitado lang ang bilang ng kanilang field personnel.

Para sa mga nais kumuha ng voter’s certification, pumunta lamang sa satellite office ng Comelec National Central File Division sa FEMII Building, Extension Cabildo Street corner A. Soriano Avenue. Magdala ng original at photocopy ng valid ID.

May multang P75, pero libre ito para sa senior citizens, PWDs, indigenous peoples, at solo parents.

Nauna nang iginiit ng Comelec na hindi na nila palalawigin ang deadline sa Sept. 30 dahil maaapektuhan ang paghanda para sa eleksyon pero bukas silang magbigay ng 1-linggong extension sa Oktubre pagkatapos ng filing ng certificate of candidacies.

Mga magpaparehistro sa Comelec, magdamag na pumila

ni Jasmin Joy Evangelista | September 21, 2021

Dumagsa ang mga magpaparehistro Commission on Elections sa Quezon City para sa halalan sa susunod na taon.

Bantay-sarado ng mga tauhan ng Philippine National Police, Task Force Disiplina at Quezon City Department of Public Order and Safety ang paligid ng tanggapan ng Comelec dahil sa dagsa ng tao.

Marami sa kanila ang magdamag nag-abang sa labas ng Comelec office, pero 300 slots lamang per district ang ibinibigay.

Napuno agad ang 300 slots ng Districts 2, 3 at 6 at tanging ang District 5 na lamang ang may natitira pang slots ngayong araw.

Para sa mga nais magparehistro na mga residente ng District 4 at 1, hindi sa Comelec office pipila kundi sa Trinoma Mall.

Umaasa naman ang marami na sana ay madagdagan pa ang slots ng mga magpaparehistro para makaboto sa darating na halalan.

Samantala, patuloy pa rin ang panawagan na i-extend ang voter’s registration hanggang Oktubre.