Wala raw alam sa poll body... TV contestant sa beauty pageant, inimbitahan ng Comelec

ni Madel Moratillo @News | Mar. 4, 2025

Photo File: Comelec Chairman George Erwin Garcia

Inimbitahan ng Commission on Elections (Comelec) ang TV contestant sa isang beauty pageant ng isang noontime show. 

Una rito, nag-viral ang video ng nasabing contestant matapos sabihing wala siyang masyadong alam sa Comelec nang tanungin ng host sa mensahe niya sa komisyon. 

Ang 20-anyos na contestant ay hindi pa rin daw umano nakakaboto. 

Wala rin aniya silang telebisyon at hindi rin umano masyadong lumalabas sa social media account niya ang tungkol sa Comelec. 

Ayon kay Comelec Chairman George Erwin Garcia, nais nilang ipaalam at ibigay ang mga impormasyon sa dalaga hinggil sa mandato at mga gawain ng ahensya. 

Batid ni Garcia na may ibang kabataan pa ang hindi lubos na nalalaman ang Comelec kaya't importante talaga ang pagpapaigting ng voters education.

Bagong botante, 2.5M na — COMELEC

ni Eli San Miguel @News | May 5, 2024

Umabot na sa higit sa 2.5 milyong bagong botante ang nairehistro para sa 2025 na pambansa at lokal na halalan, at malapit na nitong maabot ang tatlong milyong target na itinakda ng Commission on Elections (Comelec).

Nagpapakita ang mga datos na ibinahagi ni Comelec Chairman George Garcia sa mga mamamahayag, na may kabuuang 2,548,324 na aplikasyon ang naiproseso sa buong bansa, kalahati pa lamang ng tatlong buwan mula nang magsimula ang rehistrasyon ng mga botante.

Nagsimula ang rehistrasyon ng mga botante para sa midterm polls ng Mayo 2025 noong Pebrero 12, at magtatapos sa Setyembre 30, 2024.

Maaaring agrehistro ang mga aplikante mula Lunes hanggang Sabado, 8 ng umaga hanggang 5 ng hapon, sa anumang tanggapan ng Comelec sa buong bansa.

Bukas din ang Register Anywhere Program ng poll body para sa mga nais magrehistro upang bumoto sa mga itinalagang lugar tulad ng mga mall at paaralan.

Voter's registration, start sa Pebrero 12

ni Eli San Miguel - Trainee @News | January 10, 2024

Itinakda ng Commission on Elections (Comelec) ang panahon ng voter’s registration mula Pebrero 12 hanggang Setyembre 30, 2024.

Nilalayon ni Comelec Chairman George Garcia na makakuha ng karagdagang tatlong milyong bagong rehistrado. Sa kasalukuyan, 68 milyon ang rehistradong botante.

“Kinakailangan po na maunawaan ng mga kababayan natin kung paano magpaparehistro at kung anong mga requirements sa registration,” ani Garcia.

“Ito lang po isang babala, meron po kaming ilalabas na mga amendments, guidelines sa pagpaparehistro. Bawal na po ang company ID… Dapat po government-issued ID lang,” dagdag niya.

Ayon kay Garcia, mahirap i-verify ang mga company ID.

Ipapatupad din ng Comelec ang 'Register Anywhere Project.

“Ibig sabihin kayo po ay residente halimbawa ng Bicol, nagkataon na nasa Maynila, pupuwede po kayong magparehistro dito sa Maynila. Kami na ang bahalang magbato sa inyong registration sa kung saan talaga kayo bumuboto,” paliwanag ni Garcia.

“Ipapatupad na po namin sa lahat ng highly urbanized cities at municipalities or cities na capital ng isang probinsya,” dagdag niya.