Bagong botante, higit 900k na

ni Eli San Miguel - Trainee @News | March 6, 2024

Umabot na sa 910,918 ang bilang ng bagong botante para sa 2025 national at local elections, tatlong linggo mula nang simulan ang panahon ng rehistrasyon.

Base sa datos ng Comelec hanggang Marso 4, naitala ang bilang ng pinakamaraming aplikante sa Calabarzon na may 165,702. Sinundan ito ng National Capital Region na may 140,638, at Central Luzon na may 98,976.

Naitala naman ang pinakakaunting bilang sa Cordillera Administrative Region na may 10,346 lamang.

Inaasahan ng Comelec na magpaparehistro bilang bagong mga botante ang hindi bababa sa tatlong milyong Pilipino sa buong bansa bago ang mga midterm polls sa Mayo 2025.

Nagsimula ang rehistrasyon ng mga botante noong nakaraang buwan, Pebrero 12, at magtatapos sa Setyembre 30, 2024.

Maaaring magparehistro ang mga botante mula Lunes hanggang Sabado, alas-8 ng umaga hanggang alas-5 ng hapon, sa anumang opisina ng Comelec sa buong bansa.

Comelec Chair Garcia, kinalampag sa disqualification case

ni Eli San Miguel - Trainee @News | January 3, 2024

Kinakalampag ng mamamayan ng Ibabang Pulo, Pagbilao Quezon si Chairman George Garcia ukol sa disqualification case na inirekomenda ni Provincial Elections Supervisor Atty. Allan Enriquez laban kina Brgy. Chairman Gina Amandy at Kagawad Arnel Amandy ng Brgy. Ibabang Pulo, Pagbilao, Quezon.

Napag-alaman kasing naiproklama na ang dalawa kahit may election violations ang mga ito tulad ng paglalagay ng mga oversized tarpaulins. Inaalam ngayon ng ilang nagpoprotesta kung kailan maaaksiyunan ang mga isinampang kaso sa dalawa.

Matatandaang nagpahiwatig na noon si Chairman Garcia na hahabulin pa rin ng Comelec ang lahat ng may campaign violations kahit naiproklama na ang mga ito.

Bukas ang pahinang ito para sa panig ng dalawang inirereklamo.

Comelec office sa Sta. Margarita, Samar, nasunog

ni Eli San Miguel - Trainee @News | November 3, 2023

Isang sunog ang sumiklab sa lokal na opisina ng Commission on Elections (Comelec) sa Sta. Margarita, Samar, ayon kay poll chairman George Garcia ngayong Biyernes.

Ani Garcia, walang dapat ipag-alala dahil tapos na ang proklamasyon ng mga nanalong opisyal ng barangay at Sangguniang Kabataan sa Sta. Margarita.

"'Yung kopya ng certificate of canvass of votes, ang proclamation ng mga barangay at SK ay intact," dagdag niya.

Noong Miyerkules, inihayag ng Comelec na tapos na ang botohan at pagkuha ng resulta sa lahat ng mga barangay.

Naganap ang BSKE noong Oktubre 30, maliban sa pitong mga barangay sa Lanao del Sur at Samar na isinagawa ang halalan kinabukasan.